譚詠麟「刻骨銘心」世界巡迴演唱會『終極篇-無言感激篇』

5月18日，睇到藝能宣佈譚詠麟世界巡迴演唱會，首站香港，約定9月紅館見。5月19日，竟然話係開『終極篇』，對上一次睇校長嘅個人演唱會已經係11年前嘅『譚詠麟銀河歲月40載演唱會』，所以搞到我和家人都好想睇，但又擔心買唔到飛。

6月22日專登調假，留係屋企，趁建行第一輪優先上網訂票嘅機會，訂購咗兩場嘅飛，可惜系統付款有啲問題，最後都多得有關機構嘅客服協助下，成功搶購咗9月13日『無言感激篇』4張及9月20『情不變篇』4張（最初公佈嘅最後一場）。優先訂購，係完全唔知買到邊個位，而且優先訂票每張飛都要額加$100手續費，兩場演唱會飛亦需另加$50x2嘅郵寄收費。

8月27日早上，門鐘一響，就知道係郵差派掛號信啦，一次過收咗兩封掛號信，好緊張，一睇信封面張貼紙就已經印上有關座位資料。

9月8日，專登搭地鐵去尖沙咀睇下官方快閃店，入面有賣好多限量精品，包括：浪漫星空雨傘、黑膠唱盤杯墊套裝、唱片封套盲盒布袋、經典唱片茶葉禮金、最得意嘅係 I-ALAN ，可以傾偈，查詢天氣等等，回答嘅聲係校長把聲。

9月13日晚，我和家人6點半到達紅磡站，行咗一陣，見到C出口有間官方限定嘅演唱會快閃店，門外都幾多人排隊。入面賣嘅嘢，同之前尖沙咀嘅快閃店一樣。

經過紅館場外嘅小賣側邊有張長枱，擺放咗好多唱片及最新精選CD，見到都好多人購買。

大約7：45，我哋就排隊進場，行到紅區44段，坐咁高，原因想感受下今次校長係紅館開四面台嘅震撼場面及睇哂成個舞台燈光效果。

今次坐$580嘅第1行位置對到正舞台及控制台，唯一係大電機頂部俾燈嘅支架遮咗少少，後面果幾行就更加難睇到大電視機啦，其他嘢都設計得好好。

呢場係『無言感激篇』嘅第三場，校長一人依然唱足3個鐘，首首歌都係經典好歌，超水準嘅演出，令到全場觀眾都 high 爆。

最後散場後，見到仲有好多歌迷等緊校長出嚟，而我和家人就行去搭車返屋企休息啦。

期待9月20日再去紅館睇『情不變篇』