慈山寺

慈山寺相信好多香港人都未聽過嘅寺, 但當講起李嘉誠用十幾億起嘅觀音寺, 就會有好多人都話聽過, 不過就唔知係邊, 更加唔知要預約才可入去...
而一個月前, 已於網上預約咗入慈山寺參觀嘅我, 今次帶住兩個老人家, 一直擔心交通及天氣問題...因為天文台話會有驟雨, 如果真係落雨, 行嘅一段路及參觀寺院都會好唔方便, 好彩當日早上嘅天氣都唔錯, 有藍天白雲.

當日我哋一早就坐東鐵去到大埔墟站, 再轉乘小巴20B(大約20分鐘), 就去到洞梓普門路口88號, 然後輕輕鬆鬆地沿路行上斜坡大約十分鐘就去到慈山寺入口登記,

各人帶上參學證後, 便可以入去參觀了, 今次無帶相機, 全程都只係用手機拍攝留念...

去到才知道, 原來每日只有上午10:30及下午2:30才有導賞團, 仲要行去參學服務處索取留位票, 一人一票, 名額有限, 我哋去到已滿額, 無得帶耳機跟住導賞團行, 起初都有點失落...點知原來仲有一個無耳機嘅團, 唔駛報名, 可以自由參加, 出發時間都係一樣, 10:30及2:30就會由地藏殿開始講解...

 

途經山門, 然後會見到歡喜地, 再行去彌勒殿,

 

後面就係大雄寶殿,

 

大殿後方有複製嘅經變圖(取材於敦煌壁畫),

再經過洛迦池及普門, 就會見到慈悲道兩邊嘅18棵羅漢樹及總高76米嘅觀音聖像,

正前方有個好大嘅青銅水盂. 名"千處應", 係為參學者供水之用(不設點香).

 

 

 整個行程, 男講師雖然無用講機講解, 但都講得非常清晰, 時間大約1.5小時, 非常充實及值得!!

   

散隊後, 大家就自由參觀, 而我哋就第一時間除鞋入去普門內抄心經, 就算寫字唔靚嘅我...抄完都好有滿足感, 哈哈~因為張紙已印上好靚嘅心經, 只需心靜地攞住支毛筆照抄便可!!

抄完寫上自己個名, 就會有人幫手蓋上印章, 然後就可以攞走留念!

最後行去齋堂食件蛋糕及飲杯靚茶 / 咖啡, 就更加感覺完滿啦!

離開時, 見到架私家車入去, 車牌LKS1, 都算有緣一見(架車)...哈哈~之後沿路行斜坡落去, 慢行唔駛十分鐘就到路口等返20B小巴出去大埔墟站, 真係好方便!

總結：（以下圖片來自慈山寺網頁）去慈山寺之前先一定要做咗網上登記「先到先得」，至於交通亦越來越方便，

睇埋入寺小貼士，

及寺院地圖就可以開心簡單地參觀寺院啦。