北京自由行5天

今次臨出發前六日, 才決定去北京自由行, 時間真係太急了!
因為唔夠七個工作天, 所以有好多本身做緊嘅平價套票, 都唔可以買啦~
每次咁急嘅時候, 我一定會去銅鑼灣恆隆中心6及7樓, 查詢價錢...
最後入咗間從未接觸過嘅卓越國際旅遊, 起初...覺得佢哋比較懶散, 後來...因為個職員幫我哋搵到想要嘅出發時間(即早機去晚機返)及想住嘅酒店, 而且價錢亦比其他旅行社平, 所以最後就揀咗同佢買啦!



而今次我選擇咗買本"正文社"出嘅"北京旅遊全攻略", 貪佢夠輕, 以及地圖亦比較清晰, 容易明白.



買多兩個轉插, 以便相機及手機充電,

仲有今次亦買咗個Lowepro Pro Runner 350aw 相機背囊, 雖然體積比較大舊, 外型亦較傳統, 前面拉鏈, 攞嘢比較方便, 再加上...上到飛機, 仲可以好放心咁擺上座位上嘅行李架內, 而唔駛擺係自己的座位之下, 又安心又方便!

 

第一天:

9月9日準時10:30搭乘中國國際航空出發, 大約3個半小時到達北京機場T3.

坐無人駕駛去攞行李...

然後再坐車去Novotel北京和平賓館(地鐵: 燈市口站B出口), 步行只需大約8分鐘便可到達, 非常方便! (最好笑係...地鐵指示B出口仍未啟用, 好彩本旅遊書資料正確!)







北京地鐵站真係可以去到好多景點, 最開心方便嘅係...無論搭去哪一個站, 都只係人民幣¥2

check in放咗行李入房之後...才出去食飯...



哈哈~第一餐就去九華山烤鴨店食北京烤鴨, 雖然唔夠全聚德出名，但係食過嘅人都會覺得係北京最好食嘅烤鴨店!



仲有芥末鴨已去骨嘅鴨掌, 以及勁新鮮嘅鹽水鴨肝...真係超好味!!





食飽飯後...去行吓鳥巢及水立方(地鐵: 奧林匹克公園E出口)

最可惜冇帶腳架, 唯有用高ISO影.

仲行過東北火炬廣場, 有一個奧運時安裝係場館頂上嘅大火炬.



之後返酒店休息...可能前一日太早起身, 唔夠瞓嘅原故...一瞓落床就大昏迷咁...勁好瞓!!

第二天:
瞓到好晏...醒咗之後...動作真係要加快, 否則時間真係過得好快好快!
一落街就走去地鐵, 沿途見到間麵包店就買咗幾個麵包當早餐...然後就搭地鐵去天安門



由燈市口站去天安門東, 只需轉一次共3個站, 超方便!

北京地鐵車廂有新亦有較舊, 仲有好多CCTV.

去到天安門仲多CCTV, 而且守衛亦比較嚴!

企係天安門廣場已經可以睇到人民英雄紀念碑、人民大會堂、毛主席紀念堂、中國國家博物館及國家大劇院...

午門

排隊買票入故宮(紫禁城)非常方便, 2人合共¥120, 雖然係第3次去到...但心情依然好興奮...

加上仲有難得嘅藍天白雲...哈哈~真係開心到...





行到太和殿就更加覺得興奮!

由於太和殿地位至尊, 所以每條垂脊上都有10個神獸.



而乾清宮是皇帝的寢宮(雍正之前), 所以屋脊的神獸有九頭, 代表九五之尊的皇帝.



日晷係中國古代利用日影測定時刻的計時器





銅龜和銅鶴為長壽的象徵



龍頭石雕, 龍口可排走平台積水





(前)交泰殿
(後)坤寧宮

係故宮內食午餐, 好少嘢可以揀, 大部份都係牛肉, 所以我只得一個選擇炸醬麵, 原來唔係熱嘅, 幾好味, 好啱夏天食!

滅火金缸係為防火而設嘅儲水器.



寧壽宮養性殿天花, 手工精細





哈哈~故宮真係好大...行到都唔記得咗咁靚嘅天花係屬於哪個殿!?

其中一個景點就係夫妻樹, 唔影都要望下...

估唔到慢慢行都行到就快黃昏, 所以盡快行去後面個景山公園影故宮屋頂...

(景山公園入場券每人¥2)

見到有個攝影師竟然請咗兩位仁兄搬個大鐵梯上去山上影相...真係有錢!

開心時間過得特別快, 睇到天都黑晒...好彩有幾個大陸青年用電筒照住行...哈哈~而我哋就跟到貼一貼, 否則都幾難落山!



跟住就坐公車去王府井, 去到當然食地道小食喇~

一入王府井小吃行就見到好多蠍子...

然後我哋就係小吃街內, 揀咗間嘢食晚餐...







食飽之後, 沿住王府井大街慢慢行返去酒店, 都只係15分鐘路程...

第三天:
一早坐地鐵到東門站B出口，行十分鐘左右，搭(東直門→紅螺寺)936冷氣巴，途中會直達慕田峪長城停車場，車程約2.5小時，行去慕田峪長城入口,

然後坐纜車上去第14樓, 再行落去...然後再行返上去...接近第20樓, 就再行第14樓去搭返纜車落去...





行到15樓, 先至知道係"非誠勿擾二"拍攝場地之一

每次去到萬里長城都覺得係中華民族嘅象征和驕傲!!好多外國人都好鍾意行嘅景點,

所以身為中國人就更加應該要去一次長城！



如果長城上播埋"中國人"這首歌...我覺得會更加激昂
哈哈~我覺得自己好好笑...
竟然俾我係YouTube搵到一位Roy Luo提供嘅影片, 取自美國國家地理嘅"長城"紀錄片, 加上"中國人"這首歌...嘩~簡直就係一流嘅配搭!! (所以一定要同大家分享!)

係長城仲見到好多小昆蟲, 仲見到條蛇仔...不過我驚到唔記得要影相...

去過3次長城, 最開心係今次, 因為無時間限制!

然後離開長城後, 就去食農家菜, 真係好好食!
之後去咗一個烤全羊嘅九十九頂氈房(北京規模比較大的蒙古料理餐廳)參觀...

九十九頂氈房聽聞係北京規模比較大嘅蒙古料理餐廳, 內有好多蒙古包, 睇完更加想去內蒙玩...

晚餐就去食炭煱涮羊肉火鍋...仲有芝麻糖餅甜品...



然後坐車返酒店休息.

第四天:
今朝改行去王府井食早餐, 沿途見到好多租用單車...



行到王府井大街，原來做緊旅遊推廣節, 難怪有咁多人啦。



上APM大食代食早餐, 先要去收銀服務台俾錢(仲要先俾¥10按金), 攞咗張卡再走去點想食嘅食店付款...走之前再去收銀服務台退卡, 取回按金¥10.



嗯...真係多此一舉!! 對唔識講國語嘅遊客...真係有一定嘅難度!

食咗嘢就行去地鐵王府井站, 搭一個去站天安門東, 然後行去中國國家博物館正門憑回鄉卡取入場券, 免費入場.

所有入場人士都要經過檢查...

裡面真係好大...有好多不同嘅展覽館...全部都係中華文化相關嘅文物.

行咗國家博物館後...再坐地鐵去搵朋友, 會合後再去郊區吸收大量嘅新鮮空氣!

晚餐去食北京羊蠍子火鍋...真係好好味...

食完晚飯後...再去長安大街影夜景, 當天安門十點鐘準時熄燈, 我哋就搭返地鐵返去酒店, 嘩~估唔到去到燈市口站才知道已落緊雷雨, 唯有等細雨才行...

第五天:
一早起身就食朋友送嘅特色糕點, 哈哈~估唔到都幾好味喎~





執好行李後, 就落去check out...然後行李擺係酒店大堂寄存, 才出去食嘢...

然後朋友再陪我哋去朝陽區食地道北京嘢...嘩~又開胃又好味! 真係估唔到地道北京嘢食都啱我.

之後經過世貿天階, 然後再行去一個好環保設計嘅商場- Parkview Green芳草地, 





天花板有冷吊頂嘅水流循環系統設計, 可以達到降溫的目標.
而循環的水流又可以透過雨水等廢水再循環利用...等等.





商場內有個由陝西雕塑家劉若望嘅藝術創作品“狼來了”



而十樓仲有個展覽館, 係王鲁炎嘅重要藝術觀念和方法論...

睇完之後, 就坐車去機場, 估唔到竟然大塞車...

5:30起飛, 4:30才到機場哎呀~點算!?

哈哈~真係好好彩, 竟然班機改咗6:00起飛, 否則...我哋就真係上唔到機啦!!

總結: 五天嘅北京自由行, 超Hea~ 超正! 真係玩到唔捨得走!!