家居裝修

時間過得好快，2015年發生咗好多事，由二月頭爸爸入院，8月中屋企開始裝修，9月21日原本係去睇祖兒克勤演唱會，點知變咗趕去醫院睇爸爸嘅最後一面，之後又要忙裝修，又要忙辦理身後事，然後仲要忙公司因轉代理，而要求舊公司遣散大家一事，忙到最後12月31日正式離開工作咗十七年嘅公司，總之2015就係難忘嘅一年…




今次裝修唔係因為搬咗新屋，只係因為屋企住咗十七年，好多嘢都開始殘舊損壞，趁同座樓宇有短期租出租，而且都唔想再拖延，驚越遲裝修，工程及物料費用就會越嚟越貴，而今次為咗盡量慳錢，整個裝修工程分咗四個唔同公司及師傅負責。

而講到點解我要自己咁辛苦分開幾間公司做唔同嘅工程，因為價錢可以平啲，以及方便日後跟進，今次最值得一提嘅係，如果舊樓裝修一定要更換埋煤氣喉，而換煤氣喉，首先搵咗煤氣公司報咗價先，再搵代理(永基工程- 亞寶)報多次，就會發現價錢可以相差好多，後者價錢合理，誠實可靠，以及經驗豐富，絕對值得選用!!



首先一開始就搵咗幾個裝修師傅上門報價，為咗方便報價，我一早就整咗張工程報價紙，俾每一位上嚟報價嘅師傅，方便清楚比較各項之收費，最後決定將整個工程分開四間公司做，主要係分開：(1)搭棚及換窗 (2)水電及泥水 (3)更換煤氣喉 (4)訂造及安裝傢俬。

當決定咗選用哪個水電及泥水師傅後，便約師傅於動工前一星期簽約，列明各項保養年期，以及大家嘅責任等等，之後才付第一期工程費，整個工程分三次付款(三三四)，即係30%、30%及40%，尾數於收樓後一星期才付。

裝修日期定咗，就買裝修保險，內有第三者責任保障一千萬，保險真係一定要買，絕對唔慳得！！

雖然只係搬上樓上住兩個半月，但都係要用紙皮箱入起所有物品，以便存放，哈哈～所以兩個半月就好似住咗係貨倉咁…

至於其它物料，包括：廳房、廁所及廚房所用嘅地磚及牆磚、全屋木門、門鎖、門較、浴缸、座廁、廚房石英枱面、窗台、雲石吸咀、冷氣機、洗衣機、浴室洗手盆櫃，都由我親自去買，好彩屋企大廈嘅大堂只有兩級樓梯級，如果再多一級，以上所有物品運送就要額外再收附加費用了。

到工程後期，又要趕去買抽氣扇、浴室鏡櫃、水龍頭、門鎖…等等，俾師傅安裝。期間不斷地去灣仔及旺角格價，總括大件嘢，例如：浴缸及座廁，就算同一間建材公司，灣仔分店竟然都會平過旺角分店。

 

但係HOYO鏡櫃、門較、木門…等等，就係旺角嘅細舖會平過灣仔嘅舖頭嘞，好似這款門鎖，係灣仔就要$750，而旺角新填地街買才$540。

而電掣面板(E8000系列)，我就去大角咀洋松街買，

地磚及牆磚，因為實在抽唔到時間去深圳揀，最後唯有旺角買，價錢當然一定貴過深圳，但係香港買磚，有個好處，就係如果啲磚有咩問題，隨時都可以打電話叫間公司跟進，貴咗嘅錢，唯有就當買咗保險。

至於LED燈就全部係深水埗鴨寮街賣燈嘅工程店舖內買，價錢同深圳差唔多，款式就俾深圳嘅更加啱我用，因為夠簡單，唔需要有任何花款嘅嘢，而水龍頭就係拍賣網買，比門市平好多。

另外屋企個大廈對講機，顏色實在太舊，亦買唔到鍾意嘅色，於是我和妹兩人合力噴咗灰色，襯埋個燈掣。

全屋裝修都以白、灰及淺木色為主，灰色窗簾布就係北角七姊妹道一間窗簾公司選購，只需四日就車好，送到屋企，並即時安裝埋路軌，快而妥，啱哂趕住用嘅我。

但講到傢俬，因為屋細，唯有上深圳訂造傢俬，價錢會平啲，因時間關係，唯有自己設計及量度尺寸，然後就攞去深圳地鐵田貝站，行大約三分鐘就到嘅五方家居，裡面間「極道裝飾」報價及訂造傢俬，去到職員嘅態度令人感覺毫無壓迫感，態度親切，有耐性，於是由原本訂造三件加到做五件，全部用夾板做，噴上白色焗油，當做好後，深圳葉先生會去工場影相，並用微信與我溝通有關安排送貨及安裝問題，大約三個星期，便送到上門，再由香港兩位父子檔木工師傅安裝及收口，即使尺寸有出入，師傅們都可即場更改，總括這次深圳做傢俬嘅經驗，令我非常滿意。

 

搬入屋後，上網訂床單、枕套及被單，全部都係灰色，因為屋企仲有好多七彩嘅皮禮士配襯，所以亦唔怕顏色太單調。

總結今次係我第一次親自全程投入安排及自費完成了整個裝修過程，雖然過程好辛苦，亦有撞過板，出咗啲錯，但好彩到最後...師傅們都幫我解決咗，工程亦全部都準時完成，又一次證明互相尊重及溝通係最重要嘅，雖然我係俾錢請佢哋嘅人，但我一直都非常有禮尊重及佩服所有幫過我完成各項工程嘅師傅們，今次我真係學識咗唔少嘢，經過今次嘅經驗，如果下次再裝修，就更加容易安排嘞! 如果有錢又怕麻煩嘅朋友，我會建議揀啲裝修設計公司一手包辦，哈哈～因為好似我咁樣做， 好似自己做咗大判頭咁，勁傷神...真係好攰。

就快過年嘞，希望新嘅一年，有新嘅開始，日日都可以開開心心，身體健康，繼續寫網誌！！ ^ ^

補充: 好後期才知道吊蘭可以淨化室內空氣，吸收傢俬散發出嘅甲醛，雖然已搬入屋住咗一段時間，不過最後都係買咗一盆返屋企，係街市買都只不過係三十幾蚊，值得一試。