台中清境自由行6天

今年去台中及清境自由行，順道去睇埋三大宗教盛事之一嘅"大甲媽祖遶境進香活動"。

因為上年見到好多有關大甲媽祖遶境嘅相片及報紙嘅報導後，再加上睇到台灣"周芸毅老師"所影嘅傑作之後(包括以下三張)，就一直都好希望可以親身去體驗吓現場氣氛...

 日子確實後...第一件事就係上網免費申請入臺證啦。

照舊一樣可以即時睇結果，而簽證有效期都係三個月，而由2012年9月10日起，只需列印1份入臺許可證，連同至少尚餘六個月有效期嘅特區護照入境，可停留台灣三十天。

https://nas.immigration.gov.tw/nase/

第二件事就係訂機票，而我都係揀華信航空(即中華航空)，因為可以揀早機去，晚機返。

一直都想係網上訂(4月7日)出發，(4月12日)回程嘅機票，另外再訂(4月9日)入住台中"寶島53行館"酒店一晚，以及(4月10日和4月11日)兩晚南投清境"香格里拉空中花園"，可惜"香格里拉空中花園"竟然一早已客滿。

唯有搵旅行社買自遊行套票，點知好多間大旅行社都無晒4月7日去台中嘅機票。最後最後...終於打去銅鑼灣專業旅運詢問，好彩有位姓吳嘅男職員真係幫到手，機票酒店全部幫我訂到，而且又一證明買套票比起自己網上分開訂平好多。 (今次係我第一次搵專業旅運買套票，感覺唔錯，夠晒專業! )

跟住就係搵台灣大車隊嘅司機蘇俊明先生，今次直接於蘇俊明個FB詢問車費及安排接送，而今次蘇先生報價係新台幣1300，都算非常合理。(因為我都參考咗以下車資計算方法，而且地方比較難去，所以唯有叫車比較安全!)

http://0123456789.tw/CALHTML/taxi.php

然後去咗百年找換店兌換咗台幣(HK$1 = NT$3.71)
http://bcel1985.blogspot.hk/

出發前當然要記得帶兩個旅行用嘅轉換插頭，以便手機及相機充電之用。

第一天:

4月7日早上6:45出門乘搭港鐵再轉機鐵，大約8點鐘去到機場食早餐，早上10：10乘搭華信航空AE1820去台中清泉機場(準時11:40到達) 。

而台灣大車隊嘅司機亦好準時地企係入境門外度等緊我哋! 然後上車去雲林縣西螺福興宮 ，去到大約係下午1：30。

我哋就係福興宮附近行吓，食吓小食，當然唔少得食嘅係大腸麵線啦 。

食完嘢就行返去福興宮參觀及影相，當日亦有義診服務，跌打、推拿、拔罐等等...真係好熱鬧， 

 

 

廟內仲有個好靚嘅用紙箱做嘅媽祖，以及有好多好得意嘅飾物...

仲見到好多信眾攰到係廟內多個位置瞓緊覺。

之後我哋上去擺定個腳架，霸定個靚位等夜晚可以影相，可惜今年廟宇嘅限制多咗，最有利影相嘅位置竟然圍住咗唔俾企。

影到都唔知幾點啦~跟住個彰化朋友就車我哋去搵旅館休息啦。(朋友都估唔到附近所有旅館都已爆滿...)

最後搵到間環境整齊清潔，包埋一份早餐，價錢NT$1200。

第二天:

4月8日我和朋友7:30落去食早餐，8點鐘去雲林縣元長鄉無極聖殿參觀，原來無極聖殿外...一早已有好多素食點心，供香客及接駕民眾食用。可惜我已食飽咗旅館個早餐，否則一定會再食，因為有好多我好鍾意食嘅素食。

之後我哋又去嘉義縣新港鄉源發老醬油店參觀，

然後又去另一個傳統產業景點參觀，嘉義縣溪口鄉美南村天赦庒睇個竹簍工場 ，

可惜我前兩晚都唔夠瞓，坐車有D暈車浪，所以就提早去新港鄉奉天宮附近等睇媽祖繞境進香活動啦。

沿途真係有好多唔同嘅嘢飲，又有好多嘢食，仲係免費任攞，最主要真係好好味呀!!!!就算飲好多水都唔駛驚，因為附近好容易搵到洗手間!

踏入黃昏時段，鑼鼓、煙火鞭炮齊鳴...場面相當熱鬧壯觀! 

大甲媽祖鑾轎所到之處信眾都爭相鑽轎底，希望帶來好運及平安。

奉天宮前煙火鞭炮更加多，場面更加震撼，簡直大開眼界。

行行吓…遇到周老師，更幸運地可以即場睇到佢D靚相，因為周老師大部份嘅靚相，都係唔會公開俾人睇嘅...我估可能係要留作比賽之用。睇到周老師嘅攝影技術，攪到我都封佢做偶像，勁佩服佢份毅力及攝影觸覺!

睇到夜晚11點幾，朋友就車我哋去鄰近彰化火車站嘅彰化縣富皇大飯店休息，價錢NT$1000。(太舊, 唔建議住!)

第三天:
4月9日瞓到8點幾，落街食早餐，竟然發現老担阿璋肉圓就係隔離喎~

哈哈~早餐一於食肉圓加排骨湯!

跟住又去到一間草屯芙玉日式鮮奶豆腐冰坊食嘢...估唔到...都幾好味!

然後準時12點返到飯店check out.
趁未落大雨，行去彰化火車站(只需3分鐘)，坐火車去台中。

車費勁平只需NT$40，

搭去台中火車站車程只需14分鐘，極之方便!

由台中火車站行去寶島53行館(都只係五分鐘即可到達)，因為未夠鐘可以入房，所以行李暫放於Lobby，又係趁未落雨嘅時候，周圍行吓先。

http://www.53hotel.com.tw/index.htm

附近就已經係魏清海太陽餅老店，如果想買手信都好方便。

http://www.sunnycake.tw/

行行吓...就行到台中公園，

原來公園內有好多好多隻松鼠，仲要係唔怕人嘅...

哎呀~最後竟然搞到我都有D驚驚地，因為望吓望吓...都有D似老鼠呀~

之後又想去返上年去過嘅永和豆漿，點知已經搬走咗，唯有去另一間分店。

叫咗幾樣食，可惜味道一般，下次就唔會再去食囉。

食飽之後，啱啱開始落雨，時間亦已過3點鐘啦，我哋決定返去酒店攞房休息吓。

第一次入住寶島53行館，感覺好好，又新又有香味，仲要服務一流! 浴室設備非常齊全，毛巾牙刷等，都已分開兩個顏色，完全感覺到酒店係有用心去為客人設想嘅。

夜晚就過對面街食餃子、湯麵及蒸飽，然後返上酒店房商討明天嘅行程。

原本想叫車...由台中酒店去到清境間民宿，竟然要NT$1800 (即係每人要NT$900)，所以最後我哋決定選擇搭巴士去清境, 因為兩人車費合共只需NT$524(即係每人NT$262)。

第四天:

4月10日，一早落去食早餐 哈哈~~環境唔錯，早餐都唔錯。下次再去台中，一定會再訂呢間酒店(HOTEL 53)!

 9:40離開酒店，沿住繼光街行去南投客運總站(其實HOTEL 53附近就已經有巴士站可以上車，不過我哋想方便擺行李，所以去總站買車票及上車)。

乘搭10點班車，準時12:20到達國民賓館站落車，步行約150公尺到達香格里拉空中花園。
http://www.shangrila-resort.com.tw/intro.htm

 

又係擺抵行李，行去紙箱王主題餐廳食嘢，食滿NT$300可得小瑞士花園入場門票一張。

而我哋叫咗兩個餐，埋單NT$770，就已經有兩張門票啦，估唔到兩個餐都幾好食，而且餐廳環境唔錯。

http://www.cartonking.com.tw/dkrest.asp?BKID=1&SKID=4

食完就可以去小瑞士花園行吓...影吓相。

仲可以買飼料餵D鴨...

估唔到行行吓開始落大雨，唯有提早行返去香格里拉空中花園休息吓。

由民宿望落去...都幾靚架!

夜晚行落去搵嘢食都好方便...

第五天:

4月11日，太好瞓啦...又係攪到8:30至落去食早餐，D早餐真係好啱我食。

8:50坐民宿安排嘅免費車上清境農場青青草原，門票NT$160一位。

好彩落雨都仲有羊睇...

仲見到一對新人係度影婚紗相，最估唔到嘅係有D小朋友原來見到羊係會驚架。

不過講真D羊都幾唔怕人，仲追住問人要嘢食，又搶走一個小朋友包糖，好彩無走埋我度，如果唔係...我都會驚架。

最乖係D馬啦~

沿路行去睇，途經一間店舖，買咗D熱嘅羊奶嚟飲，味道唔錯。

睇完馬術秀仲可以落去同D表演者及馬匹影吓相，

點知好快就俾D霧氣罩住晒，能見到極低...

跟住沿路行返去食嘢...去到法國小鎮間洋食館食嘢嘅時候，又開始落大雨啦。

估唔到凍凍地嘅時候，最好食嘅就係烏冬湯麵啦，而且價錢都比較合理NT$150。

趁細雨嘅時候，行去國民賓館附近個商場買櫻花麻糬，返香港俾屋企人及朋友試吓，口感唔錯! 有好多種味道，可以自己揀28粒NT$180。

唉~落大雨...唯有周圍影吓間民宿啦，呢間民宿又真係幾正...俾人一種好warm嘅感覺。

跟住行返去民宿食晚餐，而呢餐住客優惠價每人NT$600，雖然貴咗D，不過真係好好食，加上一路聽住D舊嘅英文歌，氣氛好似去咗歐洲咁...

第六天:

4月12日早上食完早餐後，見到停咗雨，忍唔住自已走咗出去行山影相。

影影吓相，突然又落大雨...唉~唯有快D行返去民宿休息吓。

今次最可惜嘅係天氣唔好，所以唔可以坐觀日出專車到合歡山睇日出...

如果天氣好...每人車費只需約NT$400（含來回車資及導覽，共3~4小時）。通常由零晨4:30出發. 我估最好唔好揀春季去清境及合歡山， 因為雨季好唔方便， 影相都唔會靚。

大約12點再去到食午餐，哈哈~又係去洋食館叫，仲叫返同一個餐，所以無再影相啦。

食完嘢之後...又開始大霧啦...

跟住就慢慢行返去民宿，等車嚟接我哋，今次叫咗民宿幫我哋叫咗共乘車，每位NT$550 直接車到機場。

當我到達機場嘅時候，我仲以為去錯咗機場，因為靚咗好多，原來係前一日，即2013年4月11日才開嘅台中機場國際航廈，預期航班會再增加，日後可能會增設台中捷運機場站.

嘩~如果係嘅話，一定會有更加多嘅攝影發燒友去台中玩啦...

哈哈~而我到時再去探朋友就更加方便啦。

新翼設有一個好靚嘅旅遊服務中心，大家可以唔駛買旅遊書或地圖，因為旅遊服務中心有好多旅遊指南可以任攞。

記住攞本”大玩臺中”(即係下面張相最左邊個本)，第10-11頁有介紹臺中市區公車刷咭乘前8公里免1優惠，加上4條行經超多景點嘅環線公車，亦可手機下載APP程式[i84] ，可以即時查詢公車動態。

仲有實用資訊:

1)1-300跑市區公車刷卡搭乘前8公里免費...

2)臺灣通、悠遊卡、高捷卡、ETC卡，4卡通用...

3)幹線公車 班次超密集...

4)環線公車 全程搭免錢: 90-93路環線公車為臺中市100年推出嘅免費公車，不論是否持卡都可享全時段、全免費嘅優惠。

如果唔得閒係香港換錢嘅朋友，去到台中新機場都可以以港元兌換台幣。

仲有一間中華電信，

可以俾遊客買電話及上網咭，

新翼開嘅第二日仲未有Wi-Fi，唯有行到舊翼才可以用，去到舊翼當然要影返張相留念吓啦...

然後夠鐘辦理check in 手續，之後行去...左手邊睇自己個行李是否無問題，才再去登機...

雖然登機大樓唔大，不過內外都有嘢食...

仲有個網際網路區，以及手機充電站。

超準時18:15起飛，19:50準時返到香港。

六天嘅台中自由行話咁快又完啦...最開心嘅係可以親身體驗到台灣人對媽祖嘅虔誠與熱鬧嘅場面。
仲有被譽為”霧上桃源 ”嘅清境，真係夠晒清靜，係渡假嘅好選擇!

如果下次去台中，可以由台中航空站(即台中清泉崗機場)乘搭115線快捷公車去台中火車站，車程只要40分鐘(收費好似係每人NT$49)。
如果要去清境，就再行過幾條街轉南投客運，直接坐到去清境(車費每人NT$262)，不過要留意清境有好多民宿，所以去之前一定要查清楚自己所住嘅民宿近哪一個站，否則落咗車之後再搵…分分鐘行成個鐘，車上會有顯示下一站個名，如果係國民賓館站，車程就大約2個半鐘。

或者搭共乘車會比較方便(車費每人NT$550)，好似香港嘅七人車咁(不過最多都係坐6位乘客) ，直接由台中機場坐到去清境各民宿，車程大約2個半鐘。

希望下次再去嘅時候可以睇到藍天白雲啦！