玫瑰痤瘡、濕疹及敏感皮膚(二)

2015年嘅下半年真係好忙，所以一早計劃咗16年1月及2月在家休息, 3月才開始搵工, 點知到1月及2月嘅氣溫變化，令我手腳經常冰冷，所以食飯時都趁熱食及趁熱飲，仲打咗兩次邊爐，加上無返工變得更加夜瞓及晏起身，早餐都成十一點才食，生活習慣完全亂哂，引致多年來控制到嘅玫瑰痤瘡於二月尾再度出現於兩邊臉頰，今次仲出埋粒粒及又紅又痕，感覺唔止係玫瑰痤瘡，仲有濕疹，忍唔住都會照鏡及自拍睇有咩變化，搞到個心情都差咗好多。

於是我再三反思，首先先改瞓覺嘅時間，飲食都改跟以前一樣，唔食熱及唔飲熱，諗住開始見工嘅我，當然想塊面快啲好返，睇到YouTube有一個標題係“BB濕疹患者玫瑰痤瘡皮膚癢救星 -芫荽水”係一位好心嘅媽媽分享咗佢用芫茜㷛水加鹽嘅方法去令到佢可愛嘅囡囡難搞嘅濕疹都搞掂，點擊率相當高，亦有好多人回應有用，而我當然一定會試下嘞，試咗一星期，無好到，反而皮膚紅嘅位置角質增生變厚咗，相信呢個芫茜水方法只可對於濕疹比較有用，但又未必適合所有濕疹人士，因各人體質不一樣，而有玫瑰痤瘡皮膚嘅人，皮膚亦都比較敏感，因此我個人就唔建議用呢種方法嘞，因為濕疹同玫瑰痤瘡(酒糟鼻)係完全唔同嘅皮膚病，所以醫治方法亦有所不同。

(2月29日)
唯有去中環卡佛大廈睇返幾年前睇過嘅皮膚專科梁X西醫生，佢話我塊面有三種問題，有濕疹玫瑰痤瘡及皮膚敏感發炎，開咗抗組織胺嘅藥食及含類固醇嘅藥膏 Mometasone (早晚薄薄地一日搽兩次於患處)，第二日隨即消失哂之前嘅皮膚問題，患處位置嘅毛孔仲變得好細好滑，覆診時嘅心情亦好咗好多，

醫生叫我繼續搽，因為仲有啲未清，搽咗唔夠三星期，下巴位置竟然出咗粒瘡瘡，醫生就幫我轉咗幾年前食過嘅抗生素Klacid MR 500mg及搽過嘅消炎藥膏Fucidin，今次因為診所就快放復活節假，所以醫生開咗十二日藥俾我(診金及藥費共$1200)，無諗到今次只係食咗一次藥及搽咗一次藥膏，瞓醒嘅第二朝就變到嚇死人，塊面竟然出咗好多好多好恐怖又痕嘅瘡瘡，原本幼滑咗嘅毛孔竟然變粗咗，仲要好多一條條白色嘅嘢，總之好嚇人，好想喊，唔想見人，起初都有諗過是否藥物敏感，但睇返記錄以前食過及搽過都無出現敏感，而且今次出嘅位置都係玫瑰痤瘡嘅位置，所以繼續食及搽，直至第三日，仍然未散，仲越嚟越差(下圖唔希望嚇親人，所以揀咗無咁恐怖嘅四張合為一張)。

趁診所假期前一日，走去俾醫生睇下，問佢是否藥物敏感，佢話係，仲話以後唔好咁遲才去睇，然後諗咗一陣(比平時諗耐咗)，諗轉咩藥，於是我問佢剩下嘅九日藥(下圖)是否退返俾佢，佢竟然話叫我留起以後再用，今次轉嘅藥，佢話應該唔會再敏感，叫我假期後即時返去覆診(今次再收診金及五日藥$850)，

點知佢開嘅藥膏，竟然係Rozax Metronidazole gel (專用於玫瑰痤瘡嘅抗生素藥膏)，因二月尾我俾佢睇症嘅時候，有俾佢睇過我之前搽過呢支藥膏(下圖)，亦清楚講明此藥膏對我嚟講，係無用嘅，而當時佢亦認同佢呢隻藥膏係無用，估唔到今次去到咁嚴重嘅情況下，佢竟然開俾我用嘅就係呢隻藥膏 (只不過唔係俾成支裝，係用藥膏盒)，而我都非常聽話地照做，當然都無改善到問題，依然好恐怖好紅，最慘之前約好咗要見工，又不能再改期，唯有鼓起勇氣出去，有人見到都唔敢問我塊面嘅問題，只係用好奇怪嘅眼神望我，搞到我自己主動解釋及叫佢哋唔駛擔心，唔會傳染…(期間我明白到點解啲人想死嘅心情)。

而今次去到咁嚴重，我好相信唔係梁醫生所講嘅藥物敏感，而係一開始就唔應該搽類固醇嘅藥膏，因為我上網睇到玫瑰痤瘡用類固醇藥膏後，好多時都會比之前變得更加差，五日假期終於完，原本要覆診嘅我，真係對梁醫生無哂信心，因一個月內睇咗佢五次用咗$4750，竟然去到咁恐怖嘅情況，而且食咗成個月西藥，左手有時控制唔到嘅手震(以前從未試過)，相信係食得太多西藥引致。

(3月30日)
決定去搵中醫醫治，但係玫瑰痤瘡，對於好多中醫嚟講，都唔知係咩，於是就上網睇幾個中醫嘅簡歷，最後就揀咗睇萬邦行嘅崔博士，搏一搏，因為佢之前做過西醫，所以一講玫瑰痤瘡佢就知係咩病，當佢見到我塊面嘅時候，佢好似好有把握，佢話飲四劑會無咁紅，我揀沖劑比較方便，一日兩次，飲咗四次後，的確真係無前兩日咁紅，可惜之前嘅問題實在相當嚴重，血管發炎及瘡瘡，仍要慢慢醫治及調理，

至於洗面及潤膚，依舊用緊 Aquanil cleanser 及 Physiogel Intensive cream，而呢幾日天氣非常潮濕，以前成日返工慣咗係一個四季都一樣溫度及濕度嘅工作環境，依家無做嘢，真係短短幾個月嘗盡四季天氣變化，而呢幾日非常潮濕，所以買咗支有機純洋甘菊水(下圖)試下，用於T字位較油位置保濕， 至於 Physiogel Intensive cream 只搽較乾嘅位置，暫時皮膚對 ALTEYA Organic Bulgarian Chamomile water 有機洋甘菊花水未有特別嘅反應，最緊要沒有敏感，所以仍有待觀察。

另一隻之前有用過嘅 CeraVe Moisturizing cream 保濕潤膚膏，適合問題皮膚，如玫瑰痤瘡、濕疹異位性皮膚炎人士使用。近來亦有好出名嘅皮膚專科醫生送試用裝俾有問題皮膚病人試用(下圖)，

可惜香港買就好貴，如果美國及加拿大買可以平成一半價錢，所以我今次已拜託咗一位加拿大好朋友於八月來港時幫我買支返嚟。

飲咗十日中藥沖劑後，效果對於我嚟講，係理想嘅，當然中藥會比較西藥慢見效，但起碼無西藥嘅副作用！左手無再手震，手腳暖咗，相對塊面就無之前咁熱，遠望明顯好咗好多，所以我仍會繼續覆診，期待中藥可以完全根治到玫瑰痤瘡！

(7月4日)
時間過得真係好快好快，咁又過咗三個月，塊面嘅玫瑰痤瘡依然未完全消失，仍然日日夜夜陪住我，而我仍努力想擺脫佢哋，所以我每星期都會搵崔博士覆診，繼續飲中藥。
以及趁另一位朋友去美國工作時，幫我買咗CeraVe Hydrating Cleanser 及 Moisturizing Lotion，嘗試在七月這炎熱的夏天開始使用，希望可以使塊面舒服些(等我用多一段時間，再睇下個成效)

而今年嘅夏天真係感覺特別熱，塊面亦好容易就紅，有一日同事叫我試下用少少海鹽(超市可以買到嘅日本海鹽)加水敷面，話可以有降溫嘅效果，塊面無咁紅。用後個人覺得海鹽加水敷面及有機洋甘菊水兩樣都係無醫治玫瑰痤瘡嘅作用，只係短暫舒緩塊面嘅熱及紅，所以最後我都無再用啦。

(8月15日)
時間過得真係好快，崔博士放大假嘅時候，我試睇咗於東華三院(東區醫院)嘅皮膚科中醫師李澤恩，之前完全未睇過，只係想搏一搏，收費適合長期要飲中藥調理嘅我，

(9月15日)
睇咗幾次塊面嘅瘡瘡明顯快謝咗，估唔到效果比我想像中理想，又一次證明東華三院其下嘅高級顧問中醫師係掂嘅！

唯一問題係要揀一個時間及交通方便自己嘅，因為有玫瑰痤瘡嘅人真係唔可以太熱及太急，亦唔建議睇到人哋講邊個醫師好，就山長水遠咁走去睇，因為玫瑰痤瘡真係需要一段長時間調理，如果長時間趕來趕去地睇一個交通及時間唔方便自己嘅好醫師，老實講…我好肯定咁樣做對病情係唔會有好處嘅! 而我亦唔會公開中藥藥方，原因玫瑰痤瘡嘅症狀雖然大多一樣，但係各人體質有所不同，所以一定要親自俾醫師睇症開藥，而且每次覆診都會視乎情況改藥方，所以有玫瑰痤瘡嘅朋友們唔好心急，更加唔好亂咁自己煲藥呀！

提醒有玫瑰痤瘡嘅朋友們，如果眼乾一定要滴滋潤眼睛嘅眼水，因為玫瑰痤瘡唔止影響臉部皮膚，連眼都會特別容易乾，太乾會引致不適，甚至角膜炎，有時乾到痛而流眼水，繼而就會鼻紅(好似喊過咁)，所以我平時就會滴不含防腐劑嘅“適然”高清滋潤眼藥水或“亮視”滋潤滴眼液或“淚然”人工淚液眼液，可減低眼乾情況，大多數藥房、萬寧及屈臣氏都有得買，當眼乾流眼水時，亦唔好直接用手抺眼，建議用棉花加蒸餾水抺眼臉，除可抹走睫毛上嘅塵，亦可舒緩眼部不適，減低玫瑰痤瘡引致嘅眼瘡問題。

(小心好似我咁，好多年前已經係東華東院眼科專科做過4次眼瘡放膿，於眼臉打麻醉針嘅痛，真係諗起都驚，當時連眼科醫生都唔明點解我咁容易生眼瘡，後來我先至知道其實係玫瑰痤瘡引致嘅眼瘡。)

再次提醒有玫瑰痤瘡嘅朋友們:

1) 千祈唔好搽類固醇藥膏
2) 唔好曬太陽
3) 要多食蔬果
4) 戒食煎炸焗及辛辣嘅食物
5) 唔可以打邊爐 
6) 唔好飲太熱及冰凍飲品
7) 十一點前上床瞓覺
8) 要放鬆心情
9) 唔好亂咁飲涼茶
10) 唔好亂用化妝品及護膚品


(11月2日)
時間過得真係好快好快，又到11月份嘞，上個月塊面試過好滑好舒服嘅感覺，只能夠維持咗好短嘅時間，又因轉天氣再度出現反覆嘅情況，不過可能每日都仲飲緊中藥，所以反覆嘅情況都比之前容易接受及面對，仍繼續覆診及飲中藥調理中，希望今個冬季塊面可以順利度過。

(12月2日)

嘩，不經不覺又一個月啦，11月中嘅時候，額頭兩邊及塊面T字位(連個鼻)突然出咗濕疹，又紅又痕癢，連個身都有啲痕癢，唉～總之就好唔舒服，好彩痕咗幾日就覆診，之後飲咗幾日李醫師開嘅中藥及全面都搽CeraVe Moisturising Lotion 後，唔夠三日，身就已經唔痕啦，塊面嘅濕疹亦已經消失哂啦。至於玫瑰痤瘡暫時只係控制到，但因天氣及環境問題，玫瑰隨時都容易再走出嚟，所以仍繼續搵李醫師醫治，而我亦有心理準備，呢個病至少仲要睇多大半年。

踏入12月嘅溫差比較大及濕度低，塊面嘅玫瑰痤瘡特別容易走出嚟，所以早晚洗完面後，我都轉咗搽CeraVe Moisturizing Cream，比起Lotion更加滋潤。

(2017年3月9日)

踏入春季，三月份嘅天氣一時乾燥，一時又潮濕大霧，早晚溫差都幾大，亦係皮膚病最容易病發嘅日子，而我塊面間中都有少少痕癢及紅，不過情況仍算穩定，每日早晚仍會繼續飲中藥調理。

接近一年嘅中藥醫治，整體我都覺得…哈哈哈哈，唔好意思，唔可以講得太白，因為玫瑰都好似小朋友咁，容易小器

(2017年7月23日)

好多人都關心我仲要飲幾耐中藥，其實我可以隨時停，只係我自己仲想調理身體，所以依家一個月仍去睇兩次。

至於有玫友問我仲有冇面紅，哈哈哈哈，我真係覺得玫瑰好小器，不過可以肯定地同大家講，只需要有耐性地睇中醫(知道咩叫做玫瑰痤瘡嘅醫師)，唔好亂搽嘢，就一定可以脫離玫瑰，希望大家會明白！！

(2018年8月17日)

時間真係過得好快好快，咁又一年啦，好多謝玫友們嘅關心，我依家情況穩定，如果唔識我嘅人，都睇唔出我係玫友，依家我都只係幾個月才去搵李醫師一次，攞啲中藥飲下，當作保健之用。

(2018年9月28日)
今年暑假及強颱風對我塊面嚟講，都算好好彩，無咩大問題發生，今日散步時竟然見到萬寧又有返CeraVe 嘅清潔護膚產品上咗架，而且價錢亦比之前更加合理。(大家以後可以於指定萬寧及屈臣氏購買啦！)

總結：
香港有玫瑰痤瘡嘅人數，真係有好多好多，有位女醫師嘅文章，提到本港有五分一人患有玫瑰痤瘡，數字真係好驚人！而我個人認為應該係皮膚病人當中有五分一人係玫友，雖然無綫電視新聞亦有講過此病，可惜到依家唔知道咩叫做玫瑰痤瘡嘅市民仍然非常之多，所以我真係好希望多啲人會認識咩叫做玫瑰痤瘡，更加希望唔好再有玫瑰痤瘡嘅病人被人誤會及歧視！

自從有此病，身邊多咗好多朋友推介我用好多唔同嘅健康補充劑，全部都講話對痤瘡及濕疹等有療效之用，其實我真係好希望佢哋搞清楚咩叫做玫瑰痤瘡先！亦在此提醒有玫瑰痤瘡嘅朋友們，唔好浪費金錢去試太多嘢，有機會令病情更嚴重！所以我都只係贊成飲中藥調理及醫治。

仲有上年夏天塊面好痕癢又有瘡嘅時候，我試過洗面後薄薄地搽上茶樹油於粒瘡嘅位置，當時可以有舒緩痕癢感覺，不過經過上年秋冬及今年夏季只係各搽咗一次，就即時敏感，所以再次提醒玫友們，茶樹油唔適合搽於玫瑰痤瘡皮膚，敬請留意！在此亦希望所有有此病嘅朋友們，唔好灰心，只需要有耐性，一定可以好返！

 而我亦會隔一段時間，再分享最新情況，加油呀！玫友們！

玫瑰痤瘡、濕疹及敏感皮膚(三)

因有好多玫瑰嘅朋友問我有關李醫師嘅診症時間及收費，所以我搵埋佢診症嘅地址及預約電話，方便有需要嘅朋友致電查詢及預約，留意兩間收費不同，以前只收現金，由2018年4月開始已經可以收VISA / MASTER card/ EPS。

東華三院其下中醫專科門診

逢星期一、三、五及六 : 東華三院 － 香港大學中醫臨床教研中心 (東區)

香港柴灣樂民道三號東區尤德夫人那打素醫院專科門診大樓地庫四樓 (預約及查詢：3197 2000 )

逢星期二及四 : 東華三院黃大仙醫院 － 香港浸會大學王李名珍中醫藥臨床研究服務中心 

九龍沙田坳道124號東華三院黃大仙醫院C座地下 ( 預約及查詢：2354 3000 )

附加：2021年1月收到玫友嘅通知，李澤恩中醫師已由東區轉了去廣華中醫專科門診，最新診症時間，已附加於玫瑰痤瘡、濕疹及敏感皮膚（五）內。