Anita 開心簡單...: 墾丁高雄自由行4天

今次去旅行真係決定得好遲, 因為屋企有啲事...令到我暫時都唔敢出去旅行, 最後臨放大假前5日才決定去墾丁鬆鬆幾日, 當日坐係屋企上網揀酒店, 最後揀咗墾丁住凱撒酒店, 而高雄就住Hotel Dùa及去高雄航班時間後, 隨即打去各旅行社問套票價, 比較後其中有一間細行價錢最為合理(仲平過自己上網訂), 所以我亦好快咁馬上確認訂位, 及於網上申請咗台證https://niioa.immigration.gov.tw

於6月23日(第一天)早上同朋友坐香港機場快線, 8 點鐘去到香港機場, 辦理完寄艙行李後, 就即刻入閘, 然後去Plaza Premium Lounge食早餐,

之後等乘坐中華航空去高雄, 因為班機遲咗飛, 所以去到高雄機場都已經12點啦, 個心就有啲急啦, 因為我訂咗12:30由高雄坐去墾丁嘅機場快線巴士, 除咗要等攞行李外, 我又未換台幣, 原本想係香港百年換, 可惜一直都抽唔到時間去換...

最後決定咗去到高雄機場才換, 好彩最後都可以好快地攞咗行李及兌換咗台幣, 當日機場兌換價HK$1=NT$3.85 以及手續費NT$30 (而香港百年對3.87兼免手續費), 好彩相差好少, 唔駛排隊等, 已慳咗好多時間!!

而由高雄機場直接去到墾丁嘅機場快線巴士, 車程只需100分鐘, 收費每人NT$400, 亦都係出發前一日才上網訂嘅www.ptbustour.com/airplan.aspx

12:30司機準時到達機場內集合地點點名, 值得一讚嘅係司機非常有禮貌, 仲好有耐性及盡責地等埋另外兩位乘客!

哈哈~原來今次架車只有我哋兩人及另外兩個女仔, 合共4人, 坐架又新又大又舒適嘅巴士去到各人所入住嘅酒店門口, 一個字形容就係"正"!!!!

當去到酒店, 酒店嘅職員亦隨即幫手攞行李到大堂, 好快就辦理完check in 手續,

上到房除咗有兩樽蒸餾水外, 仲有一隻香蕉及兩個水晶梨免費享用, 哈哈~當然好快就已經落咗我個肚啦!

然後就出去行吓, 睇吓酒店嘅設施, 首先見到我最鍾意嘅鸚鵡, 然後周圍參觀...

除咗泳池, 地下仲有好啱小朋友玩嘅休閒中心,

而今期酒店仲有好多"侏羅紀"嘅裝飾, 連出面條街都有一個小心恐龍嘅告示牌,

對面就已經係小灣沙灘, 其實酒店內都有條通道去到沙灘, 不過就要經過草叢, 都幾多蚊,

去到沙灘見到好大浪, 亦剛掛咗紅旗, 而我覺得返酒店內游會比較安全,

之後再沿大街方向行5分鐘, 途中見到一間旅遊服務中心, 睇到有好多墾丁半日遊及一日遊, 包保險及所有景點門票, 而我哋就揀咗一日遊NT$1600, 因為我和朋友都唔想坐包車(私家車), 雖然價錢差唔多, 但係要坐足一日, 我哋都係揀旅遊巴, 報名只需留姓名及酒店名便可.

之後行大約3分鐘就到咗大街, 沿途有好多小食, 怕熱氣嘅我...最鍾意食嘅係一杯杯冰凍嘅生果(冇影相, 哈哈~只係掛住食), 最後又入咗一間100熱炒食晚飯, 食完飯就開始落大雨, 唯有早啲行返去酒店休息,

(第二天) 一早七點鐘就落去食早餐, 估唔到凱撒酒店嘅早餐有咁多選擇, 真係食飽都唔想走...因為個境真係好靚, 藍天白雲, 又一證明台灣天氣報告係唔準確嘅!

8點鐘觀光旅遊巴準時到酒店門口接我哋上車, 仲有每人派一支蒸餾水, 跟住導遊又問我哋兩人想食咩, 如果唔食可以每人減NT$300, 因當日只得我哋兩人報咗一日遊, 其他8人都只係報咗半日遊, 最後我哋都係決定由佢安排午餐, 隨即交埋費用, 而巴士就沿路去各飯店接載已報名嘅旅客, 之後就正式開始行程啦,

首站去出火(竟然見唔到出火, 連導遊都估唔到無專人嚟點火, 而佢當然唔敢點啦, 佢都話未見過無火嘅出火) 大家影完相後, 繼續行程→

港口吊橋→

(加送行程)風吹沙→

龍磐公園→

途經條路好靚, 聽聞好多電視劇取景嘅地方,

之後再去鵝鑾鼻公園→

貝殼砂島→

船帆石風景區→

午餐90分鐘→

導遊真係好好人, 問咗我哋想食海鮮亦或台灣菜, 我哋揀咗後者, 佢就安排咗我哋去凱撒酒店附近嘅青年中心裡面間中菜館食午餐, 兩個人揀咗坐張大圓枱, 五餸一湯白飯任裝, 仲有西瓜, 唔錯! 真係幾好味, 食到清哂!!

食飽後仲可以慢慢行吓, 然後行返酒店, 等佢再嚟接我哋...

1:30正式開始出發去剩下嘅半日遊, 估唔到下晝嘅參加嘅人會多過上晝, 其實下晝去嘅地方真係唔多, 如果唔想去睇海洋生物, 可以報上午嘅半日遊, 只需NT$500. 下晝行程如下:

海生館→

貓鼻頭風景區→

關山夕照(可惜太多蚊, 又熱又焗, 團友都唔願意再等日落...)→

唯有回程(大部份嘅團友都揀係大街落, 好彩今日天氣唔錯, 可以慢慢行慢慢食...)

食完晚飯後, 又再慢慢行返去酒店休息...

(第三天) 今日好hea 哋瞓到好晏, 9點才落去食早餐, 食到10:30才返房執行李, 11:00落去check out, 又見到兩隻鸚鵡係度玩, 而其中一隻見到我影佢, 仲表演俾我睇, 反轉咬石柱...原本想再影吓相...可惜快樂嘅時光真係過得特別快, 又到11:30要上酒店嘅專車去高雄啦,

兩個鐘車程, 準時13:30去到高雄左營站,

原來墾丁有4間酒店都有免費專車送旅客到此站, 分別係: 凱撒, 福華, 夏都及福容.

原來左營公車站, 就已經有高鐵站及捷運站, 交通非常方便! 而且捷運車費亦好平, 由左營坐到機場亦只係NT$50, 可以直接去到機場, 真係平過香港好多!! 而我哋就坐到美麗島站亦只係NT$25, 去到站嘅大堂就見到...

「光之穹頂」號稱全世界最大的玻璃藝術, 設置全球最大的圓形地下車站建築內, 由水仙大師繪製並與享譽歐洲的德國Derix工作坊合作, 耗費四年半所創作. 直徑達三十公尺, 面積六百六十平方公尺, 結合美麗島事件追求民主自由的過程, 表達重生與包容的內涵以水、土、光、火四個區塊, 代表了宇宙的誕生、成長、榮耀與毀滅, 每一塊玻璃都是一段故事作品.

沿住6號出口, 一出就見到婚紗街, 轉左手邊行唔駛一分鐘就見到今晚住嘅Hotel Dùa

之後就出去附近行吓, 食午餐之後, 再坐捷運去三多商圈站, 原本想上去睇吓85大樓, 不過去到樓下見到咁舊就無趣上去, 改為就圍行...行行下竟然見到個好新嘅建築物, 原來係高雄市立圖書館, 裡面好靚, 睇書一流! 仲可以去頂樓睇景!

去完圖書館後, 又係就圍行...途經見到好多電單車, 忍唔住又攞相機出嚟影相...
再行去中央公園附近嘅大立精品涼冷氣, 夜晚仲可以睇埋外牆七彩繽紛閃動嘅圖紋.

跟住一直行...行錯咗路...搞到大約行咗大半個鐘才去到六合夜市,

最後一晚係高雄, 當然又係食台灣人食嘅晚餐啦, 食完飯再行吓夜市, 見返幾年前最多人飲嘅木瓜牛奶, 今次我哋都無飲, 改飲另一間嘅楊桃湯, 消暑一流!

之後行返去飯店休息, 攞哂相機及手機嘅電池出嚟充電,

(第4天) 又係9點鐘才上去頂樓食早餐, 嘩~入到去個人好精神, 因為估唔到有咁多人入住, 而且餐廳個氣氛及裝飾都好特別, 唔同平時嘅酒店, 早餐又係一個字形容"正"!!!!
仲可以望到85大樓及大立精品等嘅市區景色, 再加上藍天白雲, 真係令人好想再返去墾丁玩吓水上活動, 哈哈~竟然有唔想返香港嘅感覺...

11點check out 後, 行李寄存於飯店, 出去買吓手信, 天氣真係熱過墾丁, 唯有搭一個站去中央公園站, 行吓新崛江商圈, 午餐亦係附近食, 不過今次就食吓日本拉麵,

然後再行去中山二路間有70年老字號嘅鍾家高雄綠豆大王食碗冰凍嘅綠豆湯, 消暑...否則真係會中暑, 以後都唔揀夏天去高雄, 因為真係好曬好熱!!!!!!

最舒服都係返飯店休息吓, 坐係大堂, 真係唔捨得走, 間飯店除咗交通方便, 房間及大堂都設計得好新潮, 如果去高雄, 我一定會再揀Hotel Dùa