林憶蓮《迴響巡迴演唱會》香港站(第二場)

5月17日我哋一行4人搭港鐵去啟德主場館睇林憶蓮演唱會。沿途經過啟德體育園零售館2，已經見到好多憶蓮嘅粉絲係門外及商場2樓排隊影相打卡。

而我哋就係商場內食飯後，起程去主場館，入場前排隊安檢，點知就一肚氣，原因係我哋出門口前都已經睇過今次演唱會嘅活動指南內嘅埸地規則，

寫明:

嚴禁攜帶即棄塑膠飲料瓶、玻璃瓶 / 杯、鋁罐、保温瓶 / 杯 

No disposable plastic bottles for drinks, glass bottles / cups, aluminum cans, thermal flasks / cups, and bottle lids

可攜帶容量不超過600毫升可重用的塑膠 / 硅膠水瓶 / 杯入場，並移除蓋子及倒掉杯內液體

Only empty plastic / silicone bottle / silicon cup, with no cap, 600ml or less is allowed 

點知負責安檢職員，唔俾我哋帶可重用及已移除咗蓋嘅膠樽入場，後來問咗幾個職員，都係話唔可以，竟然話只係可以帶即棄嘅冇蓋膠水樽入去。

因時間關係，所以我哋都冇同佢哋理論喇，亦唔想將啲膠樽掉落大會嘅回收袋（忘記影回收袋，勁多可重用嘅膠水樽）。

唯有快啲行去辦理寄存，原本諗住就係體藝館門口寄存（收費$80），後來諗諗下都係急急腳地走去零售館2嘅順豐自助櫃寄存，揀咗個最細嘅櫃，因為收費只需$38。

之後就順利過安檢，臨入場前，我哋就攞住4張飛影返張相先，然後就分開兩個閘口入場喇。我妹和朋友就由 E 閘口入，因佢哋係買$1188嘅飛，

佢哋嘅座位係110段，D行，之前我參加導賞團去過嘅位置。

而我和媽就由 F 閘口入，扶手電梯上去，上到去見到每段入口位都有兩部水機及兩筒平底紙杯，於是我就攞個紙杯斟咗少少水，然後用紙巾蓋住個杯口，俾媽媽攞上去，萬一佢喉嚨乾想咳嘅時候可以飲用。

行行下見到有個小食亭，影完相後，我哋兩個就行入509段，我買兩張飛係$788，屬於高嘅位置，因我好想俾媽媽可以感受下由高望落去嘅震撼感。我哋坐低後，大約15鐘左右，演唱會就正式開始啦。

今次坐嘅位置，屬於側邊位，雖然睇唔到成個舞台嘅正面，不過都算近個舞台喇叭，所以聽出嚟嘅音響都好正。

因為唔可以帶專業相機及攝影機入場，就唯有用眼及耳去欣賞整晚嘅表演，期間忍唔住就攞已用咗快7年嘅手機出嚟影幾張相。

成晚憶蓮都係以唱廣東歌為主，我和媽都唔係鐵粉，所以有啲歌都未聽過，雖然佢唱得好好，不過我哋就無咩感覺。如果可以唱埋當年最受歡迎及最多港人唱K 鍾意唱嘅《至少還有你》、《傷痕》、《愛上一個不回家的人》就更加好啦，就算唔唱國語歌，其實都可以諗下趁佢換衫時間，或其他歌嘅前奏前或後加插呢幾隻歌嘅音樂，相信粉絲都會想聽。

唱到 Encore 嘅時候，全場觀眾都好熱烈，好多人都跟住唱及揮動瑩光棒，將整晚嘅氣氛推到最高點。而我亦忍唔住錄咗 Encore 頭兩首歌，一分鐘都市一分鐘戀愛 + 瘋了。

因為係尾場，所以大家都唔捨得走，Encore 咗2次才正式完滿結束。散場時，勁多人擁去洗手間，不過好快就出嚟，因為格數真係好多好多，就算人多，都唔需要排好耐，好快就可以出嚟。

出口通道多，所以亦好快可以離開主場館，去零售館2攞返寄存嘅水樽，然後行去啟德站搭港鐵返屋企喇。

總結：今次嘅演唱飛係於3月16日早上用東亞銀行信用卡優先訂購嘅，搶購咗兩張$1188及兩張$788門票，除門票票價外，快達票另收取每張門票$100 嘅手續費，個人感覺手續費太貴喇，加上係優先訂購，無法自選座位，不過... 最緊要都係可以買到飛，可以帶到媽媽去感受下啟德主場館幾萬人同場嘅熱烈氣氛，就覺得抵喇。

最後希望香港可以快啲實施「實名制」購票，咁就可以令真正嘅粉絲可以得到公平嘅購票機會！！