（2026年3月22日）
媽媽食湯麵嘅時候，突然發覺用咗兩年嘅活動假牙托少咗隻假牙，而呢隻牙之前用唔夠一年已經崩過一次，當時已攞過俾香港牙醫整過，估唔到修補後一年，又係同一隻出問題，今次竟然可以成隻唔見咗，於是我哋對呢位香港陳XX牙醫已失去信心。
後來我就提議去深圳整牙及順便試下洗牙，因之前一直都有聽過幾個同事講，深圳麥牙及愛康健洗牙又抵又舒服。最終決定去愛康健口腔醫院，原因可以用醫療劵，加上我有工聯會會員卡，亦有免費洗牙優惠，於是我就用 WhatsApp 同佢哋查詢及預約。
（2026年3月26日）
由金鐘站轉搭東鐵，大約1個鐘就到達羅湖站，過香港海關，我哋就用非觸式e-道，勁方便！羅湖過關，唔想排人工通道，我和媽就行去用智能通到過關，當諗緊點樣擺張回鄉證時，部機因掃到個樣，原來可以揀用人面識別過關，唔需要出示回鄉證，真係又快又方便。
行出羅湖口岸就見到左邊係羅湖商業城，右邊個指示牌原來有寫咗直行200米至火車站售票處隔壁就係我哋要去睇牙嘅地方，我都無留意到，只係心急向前行，枱頭見到左邊一樓位置有間深圳希華愛康健醫院嘅招牌，就以為到咗，點知入到去，櫃檯女職員就叫我哋出門口向左轉，行到尾就會見到入口再搭電梯。
我哋兩個行出去後，行到一半，向前望極都望唔到有指示牌，以為自己聽錯，只見到轉角有個招牌嘅位置，轉入去搭電梯上到5樓，先知去錯地方。
原來真係要行到尾，先見到牆上嘅招牌，最後成功上到5樓接待處辦理登記手續，過程簡單快捷。
（環境同網站嘅相片一樣）原本諗住坐係大堂等叫名嘅時間，攞手機出嚟影相，點知未坐低，就已經有負責洗牙嘅女牙醫嚟咗帶我哋去洗牙喇。
洗完就行返去接待處付款，我哋兩個都係揀超聲波洗牙，我就免費，而我媽長者優惠價人民幣￥58，醫療劵扣港幣$66，收費就真係平過香港好多好多。
之後女牙醫再帶我哋上7樓做轉診登記，而我就同層做埋口腔 CT 掃描（免費），
之後再等見另一個牙醫帶我哋落去6樓睇牙，個男牙醫講嘅廣東話，超似香港人口音，亦好有禮貌，幫媽媽睇咗要整嘅假牙後，再叫咗另一個女牙醫入嚟睇一睇，報價人民幣￥500，問我哋整唔整，雖然比我預計嘅貴咗啲，不過知道可以即日攞，就緊係整喇，男牙醫幫我媽做咗牙托印模後，我媽就行去接待處用醫療劵付款，同香港一樣，快捷方便。
之後我和媽就乘搭酒店電梯落樓出去對面嘅商場食晏，之後行咗一陣，先知道原來由口岸一出，向前直行，就係深圳地鐵1號線「羅湖站」及深圳火車站。
沿住廣場行到尾，就見到口腔醫院嘅正門入口，
6樓口腔醫院接待處個女職員一見到我哋，就認得我哋，完全唔需要再做任何登記，好有禮貌地同我哋講：「返嚟喇，坐下先，等見牙醫」。
坐咗一陣，男牙醫睇完一對香港夫婦後，就輪到帶我媽入去試牙托啦，而我就全程坐係度睇住，牙醫幫媽帶上假牙後，調較和做咬合檢查，我媽好快就話無問題，然後好開心地離開口腔醫院，再經羅湖口岸返香港。
最後值得讚嘅係口腔醫院負責嘅洗牙嘅一位姓周及一位姓馮嘅女牙醫及負責接診姓馮男牙醫都非常專業及態度親切，至於姓韋嘅女牙醫，因為只係入嚟望一望，然後報價，所以無評語俾到佢。
總結：當日所有嘢都好順利，搭車有位坐，過關唔需要點排隊，仲有洗牙及補假牙都好快完成，口腔醫院內嘅環境真係又大又乾淨（包括洗手間），難怪咁多香港人上去睇牙喇。
沒有留言:
發佈留言