香港樂杖行2026

2026年1月頭，於 Facebook 睇到一個帖文，有個香港首次舉辦最大規模嘅北歐式健走活動，名為「香港樂杖行2026」，於是我就上網睇下呢個係一個咩嘅運動，樂杖行（ Nordic Walking） 原來係一種源自芬蘭嘅北歐式健步行，係一項中等強度嘅帶氧運動，利用兩支特製健走杖於步行時嘅推杆動作，鍛練全身90％嘅肌肉，而且唔傷膝蓋，適合任何年齡層嘅人士參加... 等等。

今次呢個活動有5km、1km及300m 三個組別，因從未玩過 Nordic Walking，所以一開始我就諗住報1km 試下，但係好鍾意行路嘅我，又真係覺得1km 太短，於是就報5km 喇。

2月21日至26日參加者可以去尖沙咀領取參加者物資，有一塊背面有晶片嘅活動號碼布和中國建設銀行贊助嘅運動涼感毛巾一條以及有我最想要嘅一對全新健走杖，因為想快啲攞返去試下行下，所以我就係21號就去攞喇。

上網睇咗太多唔同嘅北歐健步行嘅短片，搞到我越睇就越亂，開始有啲擔心，驚到時動作會出錯，唔識行，於是就決定唔再睇啦，到時去到再算。

終於到咗3月1日，準時去到金鐘添馬公園參加首屆『香港樂杖行2026』，去到先寄存咗個背囊，然後就去報到，在係集合點聽大會教練嘅指導，再由工作人員帶領前往起點。

每隔10秒就俾2位參加者起步，而我同一個唔識嘅女參加者一路行一路傾偈，原來我哋都係有共同目的，都係想趁呢次活動嚟推動家中嘅媽媽學樂杖行，希望媽媽們唔好覺得揸住兩支杖行路就代表「老」。

步行期間，沿途都有好多工作人員做指示，仲幫大家打氣，而我行咗大約1小時就行到終點，完成5公里行程，一啲都唔覺得辛苦。

之後我妹和媽都嚟搵我，幫我影相留念，最開心係個天竟然無落雨，仲有啲陽光，當佢哋見到在場咁多人攞住對杖步行，佢哋亦即場用對杖嚟行咗幾步，都覺得同日常步行係有唔同，上半身嘅肩及背嘅肌肉都會郁動到，仲話日後都想學下北歐健步行。

總結：上網睇先知道原來東區醫院好多年前已舉辦過北歐健步行班，近期亦見到 Facebook 有免費參加北歐式健步行嘅活動，希望日後會有更多唔同嘅機構都可以係唔同嘅地區舉辦多啲呢種活動，令更多人認識呢個運動嘅好處。