AIA 嘉年華

朋友送咗兩張AIA 嘉年華嘅入場劵俾我，我就決定帶媽入去感受下啲氣氛。於1月21日乘搭港鐵去到中環站，行過去海濱大約5分鐘就到，沿路都已見到好多外籍人士及內地遊客。

因持有入場券，所以唔需要排隊，直接行VIP通道，然後於服務窗台用入場券取代幣，2人合共送20個代幣，為免麻煩我哋就入落同一張代幣卡內，跟住就正式入場喇。

一入去氣氛超熱鬧，周圍都係笑聲，場內有好多款機動遊戲，有發現號洗衣機、極限混音、混沌鐘擺、飛天鞦韆、青蛙跳、急降跳樓機、飛天小象友誼小船、星空滑翔傘、旋轉過山車、充氣彩虹滑梯...等等。

個人覺得最刺激嘅機動遊戲，就係洗衣機，如果我玩，一定嘔，雖然我和媽都唔敢玩，只係企係度睇玩嘅人大叫，都睇到我哋兩個好開心，人哋尖叫，我哋大笑。

至於攤位遊戲，我哋兩個都玩過幾個，亦睇到好多人掟中咗，抱走超大隻嘅公仔，睇到都替佢哋開心。

場內都有小食區，仲可以坐係度欣賞舞台上嘅音樂表演，又係另一種嘅感覺，加上天氣好，人都特別開心。

離場前，將代幣卡放入回收箱，再行上天橋去中環站搭車返屋企，見到兩排紅色燈籠，好靚！

總之就開心簡單，好快就農曆新年，祝大家龍年大吉大利！身體健康！心想事成！合家平安！