維修天花石屎剝落

2018年廁所天花開始出現裂紋及輕微嘅隆起，當時搵咗大廈維修工程顧問公司嘅人員上門堪察，就話係層樓舊，天花鋼筋老化生銹，唔似係樓上問題。

事隔兩年後天花隆起嘅位置，就更加明顯，面積亦比之前大咗，而我就覺得似係樓上滲水引致，不過就無水漬，後來大廈又咁啱轉咗另一間維修顧問公司，於是又搵另一個專業人士上門檢查，而呢個就話似係樓上單位嘅問題，佢話會代我向樓上業主講，可惜之後都係無咗件事，因為大廈嘅業主立案法團出咗啲問題，最後亦無用到呢個顧問公司。

拖下拖下，到咗2023年10月，廁所天花頂嘅隔氣杯滴水（屬於樓上負責嘅隔氣），於是我就揾樓上業主，點知原來佢早幾個月前已經搬走，而新物業管理主任又話無新業主資料，後來唯有搵地產經紀聯絡新屋主，先知道原來間屋已幾個月無人住，後來新業主亦說該單位即將進行裝修，亦會叫師傅做好防水問題。

後來我見到樓上裝修時度門上有個密碼鎖匙盒，盒上印咗陳記工程，當樓上大拆嘅時候，我見到佢哋都有有為公眾地方做好保護，所以我都趁呢個機會，聯絡咗佢哋其中一個師傅Alex ，報維修天花嘅價錢，雖然佢報嘅價唔係最平果間，不過最後我都係揀咗佢哋嚟做，原因佢哋公司係附近都有工程做緊，維修天花亦會比較方便，唔會因為要趕兩三日內完成，而草草了事。

今次施工期間，唔需要搬出去住，只係拆天花石屎及磨牆時要做好遮蓋保護，其他感覺都同平時一樣，早晚仍可梳洗，沒有因維修而帶來不便。

而我點解拖咁耐先整，係因為問題未解決，就算搵人嚟做維修，都會好快再有機會出現同樣問題。所以我覺得今次真係好彩，終於可以等到樓上做好防水工程後，至開始做我個廁所天花維修。

當睇到師傅拆落嚟嘅呢塊大石屎，就更加覺得好好彩，因為呢舊正正就係座廁對上，如果跌落嚟，就真係無眼睇。

另一個好好好彩，就係遇到個好師傅，除咗會講解維修過程，亦教咗我少少嘢，而我即晚就學以致用，檢查到廚房天花亦有空鼓聲，第二日師傅又幫我整埋。

仲有講都唔信嘅，就係由2015年裝修後，所有屋內嘅天花燈，都未壞過，哈哈，點知讚完嘅即晚，廚房嘅燈就唔著啦，好彩第二朝師傅嚟到，佢睇到係燒咗，叫我去買燈，佢幫我換埋。

仲俾咗啲立邦批牆灰俾我，之後我亦自己去買咗啲工具，方便可以自己執下牆身嘅小問題。

上網試過搵過呢間陳記工程嘅資料，不過睇唔到啲咩。只知道佢哋幾個師傅幫樓上裝修時，真係好勤力，每日都好早開工，好遲至收工，我試過攞嘢水上去俾師傅飲，係門口望入去，見到手工唔錯，間屋整得好靚，上個月尾新屋主亦已經入咗伙。

自從2015年家居裝修後，收到好多人電郵問我攞泥水師傅資料，我就一直都無俾過，係因為之前嘅手工未如理想，舖地磚亦唔跟客人嘅要求去做。

而今次維修天花嘅裝修師傅，真係好好，會聆聽及商討，所以如果再有人問我有冇好嘅裝修師傅介紹，我會建議可以試下搵呢個叫佢報價，不過可能等覆嘅時間會耐少少，因為佢真係好忙，當日我搵佢報價後，佢都唔係即刻可以嚟做，都隔咗半個月先抽到時間上嚟整。

總結：最緊要安全! 所以天花維修就真係一定要揾專業人士嚟做，而普通家居維修，就仲可以自己上網睇，然後自己試下做，遲啲得閒再分享下我做過嘅簡單家居維修。😆