[免費] 心肺復甦法及去顫法課程

時間真係過得好快好快，10月某日上網見到香港聖約翰救傷會又有何東爵士基金贊助嘅心肺復甦法及去顫法課程，即刻心動，隨即網上報名。

於11月28日早上搭地鐵去到金鐘站，力寶中心出口附近轉搭12A巴士上去麥當勞道2號聖約翰大廈，

再乘搭電梯到7字樓胡文虎禮堂，因大家都早到咗，所以都企係禮堂門外等候。

而門外貼咗8組上課嘅考生人名，當夠鐘入場時，大家就要於有關組別名單上簽到，然後所有考生都不分組別，坐係禮堂內聽老師講課。

之後再按組別上課，每組一個老師，平均教6至8個學生，而我果組6個人，當中3個都有急救證書，包括我在內，因我係最近期學完急救，所以就由我第一個做CPR俾老師及同學睇，當上完CPR課後，就再出去禮堂聽課，然後有一小時午餐時間。

老師同大家講，聖約翰大廈最近嘅餐廳就係樓上8樓cafe Bar，其次係對面YWCA間食店，而我就揀咗去附近嘅香港動植物公園度坐低慢慢食我帶嘅吞拿魚包及飲蒸餾水，食完仲可以慢慢行下公園，吸下新鮮空氣，仲可以用飲完嘅水樽係公園內嘅加水站補給飲用水。

一小時後，跟住又繼續上課，聽老師教用AED機，當大家上完實習課後，就全部考生坐係禮堂考筆試，考完就可以自行離開，考生可以於12月28日放榜日致電查詢考試成績。根據上次考急救嘅經驗，如果合格，大約第3個星期就會收到合格證書。

而我今次亦好開心，係聖誕節前幾日收到合格證書，連埋之前張急救證書，就可以申請做聖約翰救傷隊義工，雖然暫時都好忙，未等閒申請住。

總結：之前學完急救，再加埋今次嘅課程，的確會令到我更加有信心去用部去顫器（AED機）及心肺復甦法（CPR）去幫助有需要嘅人。所以我亦極力推介大家可以去報讀呢個一日嘅實用課程！

最後在此預祝大家2024新年快樂！身體健康！