急救證書

趁有大假未放，就揀公司無咁忙嘅日子去報讀一個好想讀嘅「急救證書課程」。上網睇咗時間及地點後，就決定報讀聖約翰救傷會舉辦嘅4日課程。

第一次去位於大坑嘅St. John港島總區總部，感覺成棟建築物都有一定嘅歴史，無電梯，只有樓梯，無水機，只有汽水機，後來才知道原來已經被列入二級歴史建築。

第一堂簽到時，導師會派發報名時所購買之課本及繃帶包。可能係暑假關係，同班同學絕大部份是年青人，有男有女合共30人。

而導師係一位相當有經驗嘅好老師，4日共30小時嘅訓練課程，真係不停地好用心地教導所有學生，整個課程安排得好好，大家都好用心機聽老師講課，一啲都唔會悶，而且佢仲會分享好多過往經驗，分享好多真實過案，而且佢對所有學生都有一定嘅要求，佢都希望大家讀完可以日後幫到有需要嘅人。而同班同學中，有護士，有救生員，佢哋工作上都需要讀急救，攞證書，而我就純粹個人興趣，學嚟希望日後可以方便做義工，同樣亦希望可以幫到有需要嘅人。

讀完4日課程，兩星期後就考試，而我就趁考試前幾日搵媽媽幫手，俾我練習有關骨折及出血嘅包紥法。

至於CPR心外壓，除咗上堂有得練習外，返去就真係搵唔到代替品嚟練，後來上網睇到一篇報導，我就學日本人嘅方法，用膠樽練習CPR，真係按落去嘅感覺有啲似。

到考試8月29日晚，我和同學於金鐘站乘搭巴士上麥當勞道聖約翰大廈，入到大堂後就可以見到部大電視機，顯示當晚所考試課室嘅安排。大部份考生都好早已經到達試場門外，互相練習包紥法，大家都好緊張。

夠鐘入場後，先考筆試，之後再分兩批人，一批輪住考CPR，一批輪住考包紥法，

而我係第一個出去考CPR，面對幾十個考生望住我嘅時候，今次我竟然無之前咁怕醜，有啲好似上咗身咁，感覺最好笑係，上堂練習嘅公仔係小姐，無諗到考嘅時候，個公仔係先生，所以拍公仔時嘅叫法，都唔同咗，改咗叫「先生先生」，做足5轉CPR，之後再等考包紥，三樣都考哂，就可以離開試場。

9月26日收到封信，好開心，竟然唔使等到中秋節正日，就知道結果，呢個真係我收到最好嘅中秋節禮物，希望遲啲有時間再去報讀其他進修課程。