去聽蔡天鳳案

(2026年10月7日）

第一次去金鐘高等法院聽蔡天鳳案，9點鐘去到，坐係延伸庭等睇電視直播。大約9點15分左右，陸續開始見到辯方律師到場。

首先有幫前老爺嘅 Oliver Davies，

跟住又見到幫前大伯嘅 Trevor Beel 

及幫前夫嘅 Andrew J. Raffell。

之後亦見到主控官郭沙樂 Charlotte Draycott，

當然仲有辯方嘅律師團隊，陣容龐大。

亦見到好多人關注嘅蔡媽及其家人。10點鐘開庭，好快又休庭，搞到好晏先傳召蔡媽作供，而辯方律師不停圍繞及盤問蔡家嘅實際財產及買樓能力，感覺好悶，聽到1點鐘休庭，我就搭車返屋企啦。

（2026年10月29日）

第二次去聽審，今次傳召咗拘捕前夫嘅警員林津及政府化驗師溫厚玲博士出庭作供。辯方律師不斷地「製造不合理嘅懷疑」，令人覺得有啲討厭。

（2026年11月2日）

第三次去聽審，估唔到全日都係睇 CCTV，仲要係高清，有啲仲收到聲嘅片。包括以下幾個重點：

(15/2/2023) 鄺港傑係工金店買兩卷黑色牛皮膠紙、1把圓頭鐵槌及一卷雙面膠紙。

(11/2/2023) 鄺球係電訊店內買2張電話卡

(17/2/2023) 鄺球係深水埗買咗一個二手雪櫃

(20/2/2023) 睇到鄺港傑攞住一個嬰兒浴盤轉交鄺球攞返去大埔龍尾村涉案單位。

(21/2/2023) 睇到佢哋兩兄弟各自係加多利山屋企嘅片段，之後兩人係新世紀廣場 Starbucks 會合，兩個坐係度傾偈時嘅動作，明顯睇到有按頭、揮打及笠頭套嘅動作，兩人傾咗差唔多50分鐘，之後兩人一齊離開。

同時，蔡天鳳就係加多利山親自接待兩個女人睇樓，兩女睇完樓離開後，蔡天鳳獨自坐係梳化睇手機。下晝2點25分蔡天鳳上咗大伯揸嘅白色7人車（車牌AA3383) ，2點28分架車去到旺角基堤道行人路旁停低咗，睇到企係街上嘅前夫上咗白色7人車，原本應該前往學校接仔女放學，點知架白色七人車經獅子山隧道後，與鄺球揸嘅另一架同款白色七人車（車牌VY9157）會合。

3點11分，兩架車一齊去到大埔汀角路龍尾村的涉案村屋門外，專登將兩架車泊唔同嘅方向，鄺球落車後，就打開係佢揸嘅車尾箱攞咗個大膠箱出嚟，

交俾鄺港傑攞入屋，膠蓋就放入蔡天鳳坐駕內，等鄺港傑擺好咗膠箱內嘅雜物後，再將空膠箱交俾鄺球，即係鄺球連同膠箱都係蔡天鳳坐駕內，鄺港傑就企係車外把風，隔咗一段時間，就睇住鄺港智鬼鬼鼠鼠地係蔡天鳳坐駕車門邊出嚟，車門打開時，見唔到入面，因為有塊布簾遮咗，兩兄弟好合拍地交換負責崗位，

最大隻嘅鄺港傑同鄺球係車內搞咗一輪後，見到佢哋兩人合力一人一邊，搬個膠箱入屋，由車尾箱嘅倒影，睇到係裝咗個好重嘅物體，似係蔡天鳳被塞咗入去。

之後鄺球就係屋內，屋內傳出一啲聲。鄺港智最後攞住一袋嘢行咗出去，而鄺港傑就清理車內後，又係車門附近地下執起一條膠索帶，亦企係架車嘅附近打電話，叫佢阿媽快啲去代接小朋友放學... 睇到4點半聆訊夠鐘結束。

第二日我要返工，去唔到睇，唯有放工返去才聽 KOL B 姐講啦，因為我每次都見到佢好用心地聽，對人都好有禮貌。。

估計播完CCTV 片後，審訊就會係集中法證出嚟講證據啦。

總結：坐係延伸庭只能靠電視直播嘅畫面睇犯人嘅動作，雖然睇唔清楚個樣，不過都睇到佢哋嘅動作。

坐最前嘅鄺港傑（前大伯）翹住雙手擺係胸前，當播 CCTV 片時，甚少枱頭睇，只係不停寫嘢，休庭時又係咁同律師講好多嘢。

而坐第2行係鄺球（前老爺）體態明顯比實際年齡老，坐係度，周圍望，亦有抬頭睇電視播嘅 CCTV 片，休庭時亦有同佢嘅律師講過嘢。

至於第3行鄺港智（前夫），坐最後，好少郁動及木無表情，感覺好深沉。

最後真係好希望佢哋3個都可以得到應得嘅裁決，期待聽到『謀殺罪名成立，判終身監禁』啦！