壹日急救重温課程

時間過得真係好快好快，7月中突然攞起張急救證書睇一睇，先知今年已經係第3年，即8月尾就到期。當我發現急救證書就快到期時，我就諗咗一陣，因為對我嚟講張證書真係冇咩用，但係諗深一層，我學急救嘅目的，都係希望有需要時可以第一時間幫到人，但係個腦又好似忘記咗好多3年前學過嘅骨折及止血嘅包紥方法，所以最後都係決定上網報讀香港聖約翰救傷會8月12日嘅「壹日急救重温課程」及即日考試。

原本諗住有差唔多一個月嘅時間，可以係屋企練下包紥，點知7月19日媽媽突然唔舒服，需要睇急症，仲住咗幾日院，出院後，我哋兩姊妹每日返工前及放工後都要輪住照顧媽媽。直到8月7日，先至抽到時間睇 YouTube 嘅急救包紥教學影片。

8月11號晚，先得閒執一大袋要用嘅物品，包括上堂及考試要用嘅包紥用品、醫護手套、大毛巾一條、急救手册、原子筆及塗改液。

8月12日早上，搭港鐵去到金鐘站 B 出口（轉右），乘搭12A 單層巴士上麥當勞道YWCA 站落車，行過對面就已經係聖約翰大廈。上到4樓竟然見到走廊近洗手間角位有部飲用水機，早知就唔買兩支蒸餾水啦，又重又唔環保。

準時9點上課，每兩人一組，練習包紥。

然後就放一小時食飯時間，我同個 Partner 就過對面 YWCA 6樓間社企餐廳食晏，味道唔錯，又免加一。

食飯後，返到去課室就開始練習CPR，阿 Sir 就攞咗5個假人出嚟，分4組輪住做，每人做4輪，之後就休息大半個鐘，大家都趁呢個時間溫書。

大約5:30，兩位考官入嚟，6點開始筆試（半小時30條選擇題），之後開始分6組做包紥，做完包紥嘅學員就過隔離房排隊等做 CPR 。

最後做完，發覺右手背紅咗，盆骨、臀部及大腿肌肉出現痠痛，因為一個晏晝做咗超過750下按壓動作，平時少郁嘅肌肉，開始痠痛，痛咗兩日，之後就慢慢好返啦。

而原定9月2日放榜，點知今日8月31日打開信箱就收到張合格證書，真係好開心。

總結：第一次讀壹日急救重温課程，感覺好開心，好實用，因為可以幫我增強施救嘅信心，所以我決定每3年都會去考一次。

並祝大家都身體健健康康！！日日都開開心心！！