香港花卉展覽2025

 

3月20日，天晴，晏晝3點半，即興地叫媽同我一齊去維多利亞公園行花卉展。

今年同往年一樣，搭地鐵去到銅鑼灣站出，行到維園，就已經見到有好多人排隊入場。

一入場就見到架迷你電車，車內除咗熊貓公仔，仲有好多肉肉植物。

入到花展內，見到啲人都好開心，有好多人用手機影相，

亦見到多咗好多後生仔女用單反相機影花，亦有畫畫嘅人，不過就唔多。

今年花卉展主題係「綻放英姿」，以秋英為主題花，場內場外都有好多好靚嘅秋英花。

而最受歡迎及最多人圍住影相嘅亦然係鬱金香花海，不過可能係因為前幾日落咗一場大雨後，所以今次睇到鬱金香嘅花朵好似少咗好多，場內除咗秋英、鬱金香，仲有好多好靚嘅花。

跟住我哋就行去大草坪內，見到今年大會提供咗好多戶外露營椅俾人坐低休息。

大草坪內最多人係搵熊貓嚟影相，而全運會及殘奧會嘅展覽就比較少人留意，最多都係影吓全運會吉祥物「吉洋洋」及「樂融融」。

後來我哋亦行咗小食亭，買咗（魚蛋+燒賣+腸粉+豬皮）$30套餐嚟食，賣相可以，可惜食落就好一般。

之後行返去欣賞其他園林造景，有非洲動物、希臘藍白小屋、北京天壇... 等等。

仲有著燈後嘅禮物盒，真係好靚，難怪夜晚7點後都仍然有好多人入場。

場內亦有好多售賣盆栽嘅攤位，價錢亦相當抵買。

行完之後，我哋就由天后嘅出口離開展區。

 

總結：今年天氣唔錯，晏晝仲覺得有啲熱，到黃昏就好舒服，好似秋天咁乾爽，大會整體嘅安排設計都做得唔錯，如果覺得攰，可以入去觀眾席度坐低休息一陣。

最後我於3月24日晏晝，專登行去維園睇下花卉展後嘅清理情況，見到場內有好工作人員烈日當空下工作，佢哋都唔會貪快而摧毀啲盆栽，真係值得一讚，而我亦覺得我哋只係俾$14就可以入場睇咁靚嘅展品真係非常超值！