第一次係酒店房睇國慶煙花

 

（2024年10月1日）

一向鍾意睇煙花嘅我，今年好開心收到朋友嘅邀請，去酒店房欣賞煙花。咁難得嘅機會，我點都叫埋媽媽及妹妹一齊去啦。

每次掛住影相，都無真真正正地用眼睇哂成個煙花表演，所以今次就專登唔帶相機，試下專心地欣賞今次嘅煙花表演。今次天氣唔錯，有東風吹散濃煙，所以可以好清楚地睇到所有嘅煙花嘅效果。近尾段時，我亦忍唔住攞起部手機手持擺係心口位置拍片留念。

回憶對上嘅（2024年2月11日）年初二係灣仔會展海旁睇煙花嘅情景，真係人多到完全無辦法搵到合適嘅位置影相，試過係人群中開腳架影相，影影下，又有人突然由坐轉做企，又或者行到太貼鏡頭位置，搞到無辦法影到煙花。

另一次就係（2023年12月31日）歷年最大規模嘅除夕倒數2024跨年煙花表演，又係搵唔到想要嘅位置，

不過都係堅持開腳架用相機影咗幾張相，影唔到自己想要嘅相，去到尾段亦企定定專心欣賞咗一陣，感覺真係好正。

總結：今次對比以往嘅經驗，可以嘆住冷氣，又可以隨時行去洗手間，的確舒服好多，又可以慳好多時間，又唔需要同人逼，不過隔住玻璃就感覺唔到果種超震撼嘅煙花爆炸聲及同場市民嘅歡呼聲，所以各有各好處。