2024 維園中秋綵燈會

(2024年9月13日) 

今年真係比較忙，中秋節前後嘅日子都要返工，於是提早帶媽去維園睇吓中秋綵燈。今年綵燈會以「國風 x 港味」為主題。有熊貓、有中國著名地標、有12米高嘅唐裝旗袍、有中秋兔、有燈籠、有大大碗叉燒飯、仲有城寨...等等。

一如以往有兩個入口，一個銅鑼灣站，一個就係天后，而近天后方向有個中秋市集，仲有個舞火龍直播區，條龍只會係中秋節當晚10點半至會舞入維園指定範圍內。

今次只係行咗一陣就落起雨嚟，好彩好快地用手機都影咗啲相，然後就離開維園啦。唔知係我忙，亦或懶，上年係筲箕灣愛秩序灣公園影嘅綵燈，都未出post，就趁今次貼埋一齊。

最後祝大家中秋節快樂！健康平安！