筲箕灣譚公誔巡遊2024

（5月9日）

放工趕到去筲箕灣東大街睇今年新增嘅「閃耀東區夜飛龍」，一出地鐵站就已經聽到鑼鼓聲，於是就走過去睇下，點知原來未夠7點，條龍就已經到咗東大街，而東大街嘅兩旁行人路亦已經企滿哂人，於是矮細嘅我，唯有行到一個路口位，企係度影條龍嘅經過。

今次呢條夜光龍長達328米，出動超過200人舞龍，所以我亦有叫咗媽和妹嚟睇，哈哈，亦帶咗佢哋入去同條龍近距離地「與龍共舞」。

當活動完結後，我哋亦行咗去工廠遊樂場內，由台上望落去睇條龍捲起後嘅狀況，以及影相留念。

（5月15日）

時間真係過得好快，咁又一年啦，農曆四月初八佛誔，亦係譚公誔，點都走去趁下熱鬧，今年朝早10點左右去到電車總站時，又咁啱見到姜氏龍獅隊在場獻技，可惜晏咗啲去，人群太多，所以睇唔到最精彩嘅表演，當睇過網上其他人拍嘅精彩片段後，決定下年要更加早出發去睇。

今年一如以往兩旁都企滿市民，當龍頭經過，行人都忍唔住走近摸龍頭。

亦多咗外國人嚟睇，仲見到兩個外籍女士企係度繪畫。

今年嘅巡遊隊伍，真係比往年再多咗好多小朋友及年青人參與。

仲有今年好多龍獅隊去到譚公廟為譚公爺賀壽時，都舞得好精彩，氣氛超好。

總結：當日天氣唔錯，雖然我有帶帽，不過雙手無做任何防曬，所以睇到1點鐘左右，雙手已曬到紅咗，怕曬嘅我，於是就無再企係度睇啦，決定跟住巡遊隊伍行到亞公岩船廠附近，就當睇完今年嘅賀誔活動了，明年再續。