香港花卉展覽2024

 

3月19日，陰天，下晝4點陪媽咪去維多利亞公園睇香港花卉展覽2024。

閒日都好多人入場睇花展，所有位置都變咗打卡位，仲見到一位蜘蛛俠打扮嘅男士。

今次嘅主題係「雀躍全城」，主題花係香彩雀（又名天使花），快速地影咗幾張相後，趁天未黑，就行去中央大草坪睇下。

一入去見到一個小食亭，有枱有櫈，唔怕日曬雨淋，仲有餐具站，可以免費借用。

大草坪內最多人嘅地方，當然係向日葵花海，而我哋又係好快地影咗幾張相後，又行返過去球場度，繼續欣賞其他園林造景。

當聽到好大聲音樂嘅時候，原來已經係7點半，勁多人圍觀睇「花影之旅」燈光秀，當人群散後，我哋兩個先睇到鬱金香花海，不過點都好，又係返幾張相先。

後來又遇到上年花展見到嘅攝影愛好者，今次佢仲有個朋友陪佢一齊帶同模型公仔影相，雖然佢哋已經準備收拾攝影器材時，經過嘅人見到咁靚嘅公仔，都忍唔住停留影幾張相先，哈哈，而我就係其中一位啦。

臨離開花展時，點都望下側邊兩旁嘅商店，見到好多蘭花都好抵買。

最後點都影埋最多人打卡嘅「京韻」，然後就順路由近泳池嘅出口離開，去天后站搭地鐵返屋企啦。

總結：今年花展嘅花好靚，只係我自己因為月中開始眼皮敏感，未痊癒，所以亦無逗留太耐，不過都真係好開心，因為無落雨，又唔算太濕熱，希望下年可以好似啲攝影愛好者咁，帶埋長鏡去影相啦。