玫瑰痤瘡、濕疹及敏感皮膚（六）

 

前日睇到一則新聞，標題寫『戴口罩致臉頰狂生粒粒或玫瑰痤瘡發作』，而我覺得最主要係玫友皮膚一般都係特別敏感，如果太焗就會引玫瑰出嚟，所以一定要帶透氣唔焗嘅口罩！

而我最近亦試過戴過公司提供嘅某個牌子口罩，感覺始終一般，唔啱我面形，而且鼻嘅位置唔夠貼，仲磨到鼻嘅皮膚有少少敏感。最終都係要買返以下呢個口罩，真係夠貼面，而且戴咁耐都無出現敏感，戴住返瑜伽班時，感覺都特別安全啲。

我覺得如果玫友戴開都無事嘅口罩，就唔好成日轉牌子啦，始終每個玫友嘅皮膚都特別敏感！

（2021年4月）

而踏入春季，都係我最擔心嘅季節，驚玫瑰出返嚟搵我。而上個月頭就真係試過瞓醒發現個鼻嘅皮膚特別油，仲生咗幾粒瘡，痕痕地，個鼻嘅皮膚又紅紅地，總之就唔舒服啦。

而我自己就覺得今次可能係［蟎蟲］引致，因為我本身T字位都係比較易出油，如果唔理佢，我驚會變咗「酒糟鼻」。

於是上網搵下有咩方法可以唔需要飲藥（因為只係鼻嘅位置，其他無嘢），最緊要盡快可以抑制皮脂分泌、滅菌及減少蟎蟲作怪。竟然睇到有好多個案都係用『硫磺皂』洗面，解決皮膚生瘡嘅煩惱，而且仲可以止癢殺菌。不過就唔可以經常使用，因為硫磺皂鹼性強，適合有皮膚炎等問題嘅人使用，而好嘅皮膚就唔好用啦。

咁究竟邊度有得買呢？原來國貨公司有得買，而且價錢超平。買咗一舊返去試，只係洗鼻嘅皮膚。

用咗幾日，估唔到就已經有好明顯嘅效果，鼻嘅皮膚爽咗好多，啲粒粒都無埋，毛孔收細咗，洗面嘅時候，摸到個鼻嘅皮膚滑返，心情都好好多。

用咗3星期，都無出現過皮膚敏感。直至現在，我每星期都會有三至四次用上海硫磺皂起泡洗下個T字位最多油出嘅位置，暫時結果都好滿意。（而我覺得硫磺皂仲好啱因帶口罩而出瘡嘅人用。）洗完嘅位置我都無搽潤膚，

而塊面其他位置，我繼續用 CeraVe Hydrating Cleanser 洗面，然後薄薄地搽上 CeraVe Moisturizing Lotion 。如果有興趣買嘅玫友可以留意下 CeraVe  嘅專頁，可以睇到萬寧及屈臣氏經常都會有做優惠。

至於沖涼，我就一直都用緊澳洲膚潤康燕麥沐浴露，用咗都差唔多十年啦，前兩日見到澳洲膚潤康專頁嘅帖文，先知屈臣氏攞咗去做獨家發售，希望價錢唔會加價啦！

沖完涼最緊要盡快搽甘油，做足保濕咁就一定唔會出濕疹或皮膚敏感啦！至於甘油就無特定牌子，每次去到藥房見到有咩甘油就買咩甘油啦，大概$18至$30，效果都係一樣。

總結：好彩今次小問題，好快自己就搞掂，如果唔係就要過海搵李澤恩醫師啦！又係果句，「玫友自己才是主診醫生，原因無人比自己更加清楚問題嘅來源」。嚟近夏天嘅天氣，一定會好熱，係度提提玫友們，帶住口罩，盡量留係有冷氣嘅地方，可以去商場散下步，以及記住飲多啲水呀！仲有一定要早啲瞓呀，我呢排都好唔聽話，成日都成一點半至瞓，所以鼻紅都係自己攞嚟。😂

補充：今次呢篇野，我用咗好多網上人哋嘅圖，因為我覺得佢哋啲圖，真係好易明，所以係度分享俾玫友們睇。🙏

玫瑰痤瘡、濕疹及敏感皮膚(七)