玫瑰痤瘡、濕疹及敏感皮膚(七)

由3月份開始，我已收到好多玫友私訊問我，會唔會接種新冠疫苗，因為大家都知道玫友對好多嘢都好敏感，怕副作用引致玫瑰痤瘡復發，又怕濕疹再起...等等嘅問題。

而一向感冒都唔食西藥嘅我，都好抗拒打疫苗針，因為真係唔知究竟打咗會唔會因敏感而發生唔想見到嘅嘢。

做前線工作嘅我，每日返工都會接觸到好多唔同國籍嘅客人，其實都好擔心，萬一有事，點好呢！？ 最唔想影響到屋企人，所以呢幾個月，我一直都好留意及關心身邊打咗針嘅朋友，而呢班朋友，好多都係好鍾意食好嘢嘅人，所以好多身體都有唔同嘅慢性疾病，再加上公司有疫苗接種優惠送俾顧客，而我亦趁呢個機會，詢問客人接種後嘅反應，最後我就決定咗預約接種新冠疫苗啦，我揀嘅係科興，因為 BioNTech 接種後嘅副作用比率較科興高。

於是6月尾，上網預約7月頭嘅期，都好 full 好難預約到，連私家都係，最後咁啱俾我見到7月7日我放假嘅日子有位，相信係有人改咗期，而變咗有位。

（2021年7月7日）

身為玫友嘅我，食完晏晝，就搭車去香港中央圖書館社區疫苗接種中心，排隊打針，整個過程，中心都安排得好好，打完第一針後，手臂打針位置有啲啲酸痛，亦係正常反應，坐30分鐘後，就可以離開啦，一離開，我就飲好多清水，原本想去散步，但又擔心會唔舒服，所以都係返屋企啦。整晚都只係打針嘅手臂有啲酸痛，最緊要係皮膚都無出現過任何過敏反應，身體亦無出現任何唔舒服！

（2021年7月8日至8月3日）

第二日已返工，完全無不良反應，無出現任何副作用，一切如常。

（2021年8月4日）

事隔第28天，終於去打咗第二針，估唔到，第二針，更加無反應，連打針嘅手臂都無第一次嘅酸痛。

（2021年8月10日）

打完第二針後嘅一星期，一切安好，照做瑜伽運動，皮膚亦無出現任何問題。

總結：我有玫瑰痤瘡及濕疹，接種新冠疫苗後都無出現不良反應，其他人是否適合就無一定性，至於打邊一隻疫苗，就要靠自己去決定啦，因為玫友自己就係主診醫生，應該會比較清楚自己皮膚狀況及敏感來源。至於打咗都係要繼續做好防疫措施，戴口罩及勤洗手，希望全世界嘅疫情可以快啲消失，大家都可以繼續去旅遊觀光！

補充：今次有好多圖片都係來自政府網站