第八屆 Canon 攝影馬拉松2016香港站

今年時間過得真係好快好快，仲有唔夠兩個半月就2017。
2016除咗返工，就係去覆診，所有戶外活動，包括旅行都唔敢參加，原因塊面未好，怕塊面嘅玫瑰痤瘡再度惡化，因為戶外嘅濕熱溫度及紫外光都會直接影響及誘發玫瑰痤瘡嘅病情，但係有一個活動真係唔參加一定會唔開心，而唔開心其實都會影響病情，所以就更加要參加啦，哈哈哈哈～呢個就係一年一度嘅 Canon攝影馬拉松。

雖然只係一日嘅活動，但係都要避開去高溫局促嘅地方，以及中途盡量搵地方休息，以減低體溫，唔好令到塊面發熱，咁就可以完成整個活動。而今年好好彩，可以優先報到名玩挑戰組，影相唔掂嘅我，由2014年開始，每年都好期待參加 Canon舉辦嘅呢個活動。

每年嘅主持人都唔同，2014係阿 Lo(林曉峰), 2015係阿旦(鄭丹瑞)，2016係森美(梁志健)，三個都好識攪氣氛，每年影大合照時，大家都好開心，







而且每年活動當日都會見到會展有好多好多攝影愛好者，有黑衫嘅挑戰組和紅衫嘅公開組，

無論攜帶嘅器材有幾重，不分國籍性別，大家都好開心地分享攝影嘅樂趣，無論自己一個人亦或成班朋友一齊去攝獵香港，都覺得時間係唔夠用嘅，因為開心嘅時間真係過得特別快嘅，亦好開心於10月7日收到大會影嘅幾張相片，趁今日比較得閒，一於擺上網誌，分享樂趣，期待下年可以遇到更多朋友參加，一齊感受『攝』之樂趣