玫瑰痤瘡、濕疹及敏感皮膚（五）

 

（2020年12月）

首先想講下，有玫瑰痤瘡嘅朋友，有一半可能都會有眼玫瑰痤瘡嘅問題，例如：眼乾、對光敏感、眼皮發紅及生眼瘡等，有時嚴重到損害到角膜，稱為玫瑰痤瘡角膜炎或結膜炎。而我2020年12月，因天氣變化，時暖時寒又乾燥又加上長時間戴口罩，對我嚟講，最大影響唔係皮膚，而係對眼。

於12月23日晚，朋友送咗個好大嘅香蕉蛋糕俾我，因為唔想浪費食物，又唔想媽咪同妹食太多，於是我都食埋一份，不過真係好甜，食完我都已經好擔心。

點知第二朝起身後，就發覺左眼開始有少少唔舒服，開頭我都以為眼乾，點知返工搭地鐵嘅時候，覺得左眼嘅唔舒服唔似平時嘅眼乾。返到公司發現原來左眼紅咗，眼皮都有少少怪，睇真啲原來係玫瑰痤瘡結膜炎。

無去睇醫生，繼續開工，隔幾個鐘就用 Blink lid-clean 冰藍潔眼棉來清潔眼簾，令到對眼舒服啲，夜晚收工後就返去用濕棉花熱敷左眼，臨瞓前再滴一滴 Alcon GenTeal Gel 潤眼啫喱於左眼，然後飲多少少暖水，好彩好快兩日就退咗紅，之後連續幾晚瞓覺前，都有用潤眼啫喱滋潤雙眼，用後覺得潤眼啫喱比潤眼水更適合乾眼症及特別容易眼乾嘅玫友們係冬天寒冷乾燥天氣使用，每晚只用一次就已經夠啦。

如果玫瑰痤瘡結膜炎兩日都無退紅，我就會去睇醫生，通常醫生都會開抗生素眼膏/眼藥水，而我亦一定會提醫生唔好開口服抗生素及含類固醇嘅眼藥水/眼膏，因為我一定唔會用。

至於面部皮膚，因為長時間戴住口罩，塊面都無咁容易乾，今年冬季我洗完面，仍然好似夏天咁，只係搽 CeraVe Moisturizing Lotion，唔需要好似往年咁，冬季要改搽Cream。

至於有關抗疫期間，好多玫友都因戴口罩而皮膚敏感，引致出玫瑰痤瘡，而問我呢個皮膚超敏感嘅玫友。好彩我無戴口罩敏感嘅問題，我戴過 CareHK 嘅 Level 1口罩超過半年，而後來因疫情嚴峻咗，做零售前線嘅我，更加要加重裝備，於是就選用咗 HKMM 嘅Level 3 口罩，戴過以上兩個牌子，貼得嚟又唔會引致皮膚敏感！

仲有經常要洗手及用酒精搓手液嘅我，每晚都會搽 Neutrogena 無香料護手霜，滋潤雙手，搽咗都唔會敏感，滲透快，仲好滋潤，覺得好好用，通常我都會去藥房買，價錢抵好多。

總結：玫友一定要戒口，一定要靠自己去揾致敏源，例如：天氣、食物、情緒等等，再加上中藥調理，一定可以好過食西藥！！仲有寒冷乾燥嘅天氣，每日沖完涼後，最好搽甘油保濕全身嘅皮膚，咁就唔會咁容易出濕疹啦。

補充：

1月嘅天氣，好似過山車咁，上上落落，玫友們真係一定要小心保重身體，萬一皮膚因天氣敏感，都要放鬆心情，等天氣穩定咗，就會好好多，千祈唔好擔心而影響皮膚呀！

最近收到玫友嘅通知，李澤恩中醫師已由東區轉了去廣華中醫專科門診。如果想搵李澤恩中醫師睇症嘅玫友，請留意以下時間：

東華三院其下中醫專科門診

逢星期一、二及五 ：東華三院黃大仙醫院 - 香港浸會大學王李名珍中醫藥臨床研究服務中心

九龍沙田坳道124號東華三院黃大仙醫院C座地下 ( 預約及查詢：2354 3000 )

逢星期二、四及六：廣華醫院 - 香港中文大學中醫藥臨床研究服務中心

九龍油麻地新填地街202號東寶閣地下及一樓 ( 預約及查詢：3742 0333 )

玫瑰痤瘡、濕疹及敏感皮膚（六）