上海4天遊

9月尾兩姊姊都放幾日假，最後決定帶媽去上海行下，唔想媽行得辛苦，最終我哋都係揀跟團。

9月26日（第一天）

三母女坐的士去機場，向領隊報到後，等攞埋登機證後，就各自去辦自助寄艙，之後我哋就辦理出境手續，繼而去PLAZA PREMIUM LOUNGE食個早餐，然後9點鐘準時起飛去上海浦東機場，飛航時間大約2.5小時。

辦理完入境手續及攞埋行李後，就坐旅遊巴（約1.5小時）去到浙江西塘古鎮，導遊請咗大家食一碗地道嘅小雲吞。

然後就開始坐船遊西塘，感覺好舒服，空氣都好好，之後就帶我哋慢遊古鎮，有煙雨長郎、石皮弄、永寧橋...等等，

就去食晚餐，跟住就各自行西塘特色夜酒吧，每人派一張券，可以有20家酒吧任揀其中一間，包送兩杯啤酒。因為我哋食飽都唔想再飲嘢，

最後都係漫步行返煙雨江南賓館梳洗休息，因為太早起身，所以一瞓落床，就好快已瞓著。

 9月27日（第二天）

8點鐘起身落去賓館內食早餐，

之後上房慢慢執下行李，11點乘坐旅遊巴離開浙江，正式入上海市中心，車程大約兩個鐘，

去到黃浦江海龍舫食午餐，除了食物味道好，望出去嘅風景都好靚。

之後坐車去世紀匯商場地庫嘅1192弄行下，好似去咗舊上海咁，亦見到好多上海女人著旗袍影相，好似去咗個舊上海咁，好懷舊，亦有好多地道小食。如果自由行嘅，可以坐地鐵去世紀大道站（11號口出）就會見到1192弄啦，好方便。

之後再坐車去多倫路名人街，三十年代嘅時候，多倫路係文學巨匠魯迅、茅盾、郭沐若等經常出沒嘅地方，而1988年更定為「文化名人街」。慢步欣賞下多倫路新舊交織嘅建築。如果自由行可以坐地鐵去虹口足球場站出，行大約20分鐘。

之後坐車遊上海中心、環球金融中心、金茂大廈、東方明珠，然後就坐車去食晚餐，再坐一小時車程去上海卓越鉑爾曼Pullman酒店休息。

9月28日（第三天）

全天自由行，不過好多團友，包括我和家人都參加由導遊及領隊所帶嘅一天遊，因為可以全程坐旅遊巴，方便好多，車上可以擺嘢，又有樽裝礦泉水飲。

而且時間唔趕，朝早我哋起身後，仲可以慢慢梳洗，又有充足嘅時間俾我哋慢慢享用酒店嘅自助早餐。

十一點出發去田子坊，如果自由行可以坐地鐵去打浦橋站，泰康路一號出口，對面街就已經係田子坊入口，小小嘅馬路，有市集及上海老式石庫門民宅，

巷子內有好多小商店，最多女仔入嘅係大白兔店，內有好多大白兔糖味嘅香水、潤唇膏、潤手霜及精品等等。亦有些小食店有大白兔糖味嘅雪條，仲有好多小食都值得一試。

後來我和家人行咗去一間朱新年食午餐，真係好多當地人入去食，而且價錢抵又好食。

之後去新天地，（如果自由行可以坐地鐵去新天地站出便可），而我哋繼續坐旅遊巴過去，車程只需十分鐘左右，落車後首先步行經過中國共產黨第一次全國代表大會會址，見到有好多年青人，一班班輪流企係個石碑前唱國家，我忍唔住行前影咗幾張相，佢哋都好大方地俾我影，而且個個都好開心，因為過幾日就係建國70週年。

上海新天地原本係舊區被重建後，依然保留上海建築特色，加入新嘅建築意念，將石庫門改造成休閒廣場，有好多精品店、咖啡店、酒吧，感覺好似去咗歐洲，所以吸引咗好多外國遊客到此一遊。

然後再坐車去到南京路，步行上海最繁華嘅商業大街，

行外灘，又見到有班人排排企好開心地唱國歌，於是我又走過去影咗幾張相，佢哋完全唔介意，任我影，真係令我感受到上海好自由，人民生活得好開心。

之後又坐車去碼頭附近食晚餐，因時間及地點關係，就揀咗食湯麵及餃子，然後就趕去排隊上船遊黃浦江，估唔到國內同胞更加早排隊，所以上到船，唯有企係二樓度影下相，全程大約45分鐘，之後我哋又坐車返酒店休息啦。

9月29日（第四天）

一早起身，落去食酒店嘅自助早餐後，就上房攞行李落去大堂，然後出發去廸士尼小鎮，嘩，上海廸士尼小鎮比起香港真係大好多呀，

之後又坐車去奕歐來奧特萊斯（Outlet)，行下坐下食少少嘢，

之後就坐車去機場，車程只需20分鐘，點知去到機場先知班機延遲4個鐘起飛，

好彩上海機場有環亞貴賓室，今次真係可以慢慢食慢慢飲，食飽我哋又轉行去另一個位置區，坐低休息下，

之後坐8點20分嘅KA875班機回港，亦好彩地，到香港後好快就可以攞行李，最開心係有得搭機鐵返香港島，再轉地鐵，好快就返到屋企休息啦。

總結：

大家都好滿意今次嘅上海4天 hea 遊，而且團費加其他所有費用，加埋都唔算貴，食住都好滿意，仲有旅行社送嘅中移動手機數據SIM卡，可以用到 WhatsApp 及 Facebook 真係好方便。

而我部舊手機 Nexus 5已用咗6年，內置電池已開始出現問題，要經常充電，好唔方便，於是趁今次出外前買咗部華為於9月20日發佈 P30pro 最新嘅墨玉藍色，我唔係特別喜愛呢隻色，而我係好欣賞部機嘅攝影功能，可惜未有時間了解部機嘅運作，經過今次旅行，真係覺得用華為手機，當相機都抵，輕過單反好多好多，希望日後可以利用呢部手機於日常生活中盡量多啲練習攝影嘅構圖。