珠頸斑鳩﹑禽蟎

2024年11月尾，係我第一次見到住嘅大廈有珠頸斑鳩築嘅巢。之後就有一隻坐係度，幾日後就見到有兩隻蛋，跟住每朝都會聽到叫「咕咕咕」，就知道佢哋交更，輪流飛嚟孵蛋。

蛋孵化後，大斑鳩每日輪流照顧及餵兩隻小斑鳩食嘢，每次交更前必定聽到佢哋大叫，而我哋就會走去窗邊睇小斑鳩食嘢。

試過大嘅見到我，就飛上嚟望住我，谷到成身漲咗，好似警告我咁，怕我會傷害佢哋，其實我又點會搞佢哋呀，我哋係好奇及關心佢哋就真。

後來去咗幾日旅行，回港返到屋企，就即刻望下對小斑鳩，點知只見到得返一隻，另一隻就無再出現了。

大約一星期後，細嘅開始識飛，竟然飛上嚟，望住我哋，行嚟行去，好似同我哋道別咁，之後就飛走咗啦。睇住佢成長，飛走，都替佢開心，不過見到佢哋痾到周圍都係，搞到好污糟，就開始擔心有菌啦。

隨後隔唔夠一個半月，又輪到另一對飛嚟生蛋、孵蛋，睇住兩隻細嘅一齊成長，

亦感覺到佢哋唔多鍾意逗留係個咁污糟嘅巢內，日頭會企係另一單位冷氣機頂上休息，最後睇住佢哋輪流飛走。

點知唔夠1星期，再有第3對斑鳩飛嚟睇環境，執多咗幾支樹支仔嚟舖係舊嘅巢上，好快就開始生蛋啦，但今次就孵咗兩星期左右，就放棄無再孵啦，之後兩三日都無見過佢哋飛嚟，只留下兩隻棄蛋在巢內，暫時都無新來者。

當第3對斑鳩夫婦放棄兩隻蛋後嘅幾日，我手臂突然覺得好痕，有2粒似被蚊針過嘅蚊眼，紅腫痕癢，但係痕嘅情況就從未試過，超超超痕，痕到瞓唔到覺，後來上網搵資料，先知道係被禽蟎咬嘅。

而我屋企係無養寵物，所以根據網上資料，推斷係大斑鳩飛過掠衫架，而佢身上嘅熱帶禽蟎可能沾附係我件衫度，而我就被禽蟎咬咗手臂及腋下。

最後真係痕咗成3星期，期間早晚都有用茶樹油搽紅腫痕癢嘅位置，心理上覺得會有啲用，不過實際上都係無用，都係好痕好痕，捱足成個月，好彩之後無再痕啦。不過俾禽蟎咬過嘅位置，留下嘅印，隔兩個月都依然好深色，有別於蚊針及蝨咬。自此之後，我係街上見到鳥類都會行遠啲，因為我驚咗佢哋身上嘅禽蟎。

最近攞嘢去綠在東區回收時，突然見到一大群嘅野鴿飛落一棵樹下面搶食，原來係有位女士經過放咗好多雀粟係地下，就急急腳地走咗，唉，呢啲行為真係唔應該做！因為會搞到啲野生雀鳥慣性係社區聚集，影響環境維生等問題及傳播禽流感嘅風險，所以希望啲人真係唔好亂咁餵飼野鳥！