香港花卉展覽2023

時間過得真係好快，原來對上一次去睇花卉展覽已經係2017年嘅事，而今次花卉展由3月10日開始，咁啱係我放假，所以同埋媽咪一齊去行下。

我哋搭地鐵去到銅鑼灣站出，行去維多利亞公園嘅路上都見到有好多人好多人，無諗過星期五都會咁多人，開頭以為係維園花卉展嘅人流，點知行到皇室堡時，見到商場內有好多好多人圍住個舞台，就知佢哋等睇偶像，於是我哋入去行咗一圈，見到三層都企滿人，原來佢哋等睇韓國女團ITZY。

而我哋兩母女，就繼續向維園方向前進，遠望花展嘅入口位，已經有好多人排緊隊入場，用八達通付入場費就可以喇，又快又方便。

入到去，每個大型展品，都有好多人圍住影相。雖然今年主角係繡球花，不過個人感覺最多人鍾意影嘅花依然係鬱金香，可惜開得無以前咁靚，就算主角繡球花亦有啲殘，加上人太多，真係影相都有難度。

反而到天黑，有啲位置嘅燈光著咗，效果唔錯，見到好多人就咁用手機影相都影得好靚。

場內有個典禮台，兼有個好多座位嘅觀眾席，我媽行到攰就入去坐下休息下，直至睇埋7點半嘅幻燈音樂匯演後，我哋就搭車返去食飯喇。

總結：今年嘅花卉展多咗好多家長帶埋小朋友入場睇花，而啲小朋友都睇得好開心，仲可以聽到好多笑聲，加上天氣唔錯，成個感覺就令人覺得好貼今年花展嘅主題『繡麗綻放，幸福滿載』，最可惜係太晏入去，搞到仲有好多嘢未睇，下次睇花展都係早啲入去會好啲。