自備抗疫藥物

 

（2022年2月23日）

收到一個朋友嘅訊息，佢開始咳，仲發冷發熱，症狀與Omicron相似，於是佢就自己用快速測試做檢測，點知真係有2條線（T線好淺色），

於是佢打電話去24小時熱線：22804772，可惜點打都唔通，唯有自己留家抗疫，可惜佢屋企無任何抗疫用品，於是我就將我屋企唯一一盒「連花清瘟膠囊」送俾佢，亦去咗藥房買咗「無糖京都念慈菴」及「羅漢果止咳沖劑」，然後分咗啲「維他命C」、「高纖橙粉」、「善存」...等等俾佢，希望佢可以早日康復！

（2022年2月25日）

為咗陪媽打第2針，我和妹專登預約同一日兼同一時間一齊去打第3針。3個打完都無不良反應，一切正常。

之後我哋仲專登去咗華豐國貨睇中成藥，去到見唔到我哋想買嘅中成藥，包括:「連花清瘟膠囊」、「金花清感顆粒」及「藿香正氣散」，全部俾人搶購哂。

而屋企亦已準備好快測包，血氧機、測體溫槍、幸福傷風咳素、必理痛、維他命C、橙粉、益生菌及京都念慈奄。

（2022年2月26日）

而身為玫友嘅我，點都要買啲中成藥嚟看門口，先安心啲，於是去咗工聯會睇下有冇得買，好彩都買到「板藍根沖劑」一盒（仲要係最後一盒），唯有再買埋「牛黃解毒片」一樽。

（2022年2月28日）

終於收到舊同事係內地寄嚟嘅「連花清瘟膠囊」，而我妹亦收到公司老闆送嘅「鄧老清冠飲」。

（2022年3月8日）

聽咗幾個確診嘅朋友都服用過「連花清瘟膠囊」，包括有三高嘅朋友都讚「連花清瘟膠囊」幫到手，對退燒及喉嚨刺痛都好有用，及睇咗顧小培博士從科學、藥理分析「蓮花清瘟膠囊」後，

我都決定去買啲嚟看門口，經過屈臣氏見到有貨就買咗兩盒（每盒$48），行去華豐國貨見到有「金花清感顆粒」，亦買咗5盒（每盒$68）。因為屋企3個人住，所以買多少少，以防萬一！

係網上見到幾張中醫抗疫小錦囊，亦留起來作參考，

每個人嘅體質徵狀都唔同，如果可以嘅話，當然係搵中醫師診症最好啦，所以又收起以下四間大嘅中醫診所嘅資料，呢四間都係為確診者免費網上診症、煎藥等，費用全免！

「浸大中醫」、

「博愛中醫」、

「北京同仁堂」及「東華三院」

（2022年3月13日）

綜合幾個確診過嘅朋友，當時佢哋嘅發病徵狀，大部份都係先發燒發冷，然後就開始喉嚨痛（形容痛到好似刀割咁），跟住就開始咳，咳到夜晚瞓唔到，聲都沙哂，仲要係好多好多痰，又無胃口食野，其中一個仲要無咗一日嘅味覺，之後仲耳仔痛咗好幾日。

而於2月26日至3月5日快測呈陽性嘅朋友，有兩個驚要送去隔離，就索性唔申報，而有個未打第2針嘅朋友，因為需要攞確診證明，就拖到足14日後至上網申報，

另一個無打針嘅朋友於3月10日做快測呈陽性，即日上網申報，3月12日叫咗抗疫的士車佢去到預約咗嘅指定診所睇醫生，攞咗幾包藥，包括退燒、止痛、消炎、咳藥水及喉糖，仲有一張＜新冠疫苗接種醫學豁免證明書＞，而佢哋兩個都讚「快測陽性呈報平台」申報程序簡單方便，佢哋都唔需要送去隔離營，都只係居家隔離。

其中一個於3月13日門鐘響，開門見唔到人，不過就見到一袋由政府送嘅「抗疫物資包」，打開嚟睇，竟然有一盒「連花清瘟膠囊」，哈哈，搞到佢都好開心。

總結：打咗兩針嘅朋友病情會輕過一針，有一個打咗3針嘅，就幾乎係無病徵。

而我預備嘅抗疫物品除咗藥物外，口罩方面我試過戴兩個唔同牌子嘅外科口罩，或者一個外科口罩＋一個布口罩，亦試過戴一個KF94及KN95，至於邊一款最好，真係每個人都唔同，最緊要就係戴得貼面，而我亦無因為戴兩個口罩而皮膚敏感等，後來我妹亦買咗一盒3M嘅N95 用嚟看門口。

最近每日確診數字仍然過萬，雖然數字上似有回落，但好肯定係有好多確診人士係無申報嘅，近呢半個月，藥房每日都有好多人排隊買中西成藥自救，所以真正嘅確診數字一定唔止咁少！大家絕對都不能鬆懈！人多嘅地方，真係唔好去，因為現時有好多確診或無病徵嘅人都有出街，依家真係大家要保護好自己，唔需要返工嘅，最好留家抗疫，如果要返工嘅，一定要做足防疫措施！

以下係政府家居隔離指引：

最後：衷心感激所有醫護人員嘅付出！！

亦祝所有前線工作人員都可以身體健康！百毒不侵！加油！