澳門自由行2天

趁11月底天氣唔熱又唔凍嘅時候帶埋媽咪過澳門探一位好耐都無見嘅親友，順便睇下氹仔近呢幾年開嘅酒店，於是就計劃去兩日一夜。

於是就上網格價，最後都係決定唔買旅行社嘅酒店船飛套票，而選擇去工聯會買香港去澳門來回船飛套票，每套只需$260(普通位)。

至於酒店就揀咗經Trip.com訂澳門君悅酒店(Grand Hyatt Macau Hotel)豪華房，因為房間面積大，而且有兩張床，最主要係網上評分好高。

然後上網買一張聯通港澳三日上網數據卡$34。

於11月29日乘坐TurboJET 下午1：45班船，由上環去到澳門外港碼頭大約一個小時，之後再坐穿梭巴去酒店，一入酒店大堂，就覺得間酒店好新，唔似開咗咁多年，而且酒店職員個個都好有禮貌，其中一位仲帶我去排隊check in ，當時因為人客較多，所以都排咗成十分鐘才輪到我，又因為(非吸煙層)無哂我預訂嘅2張床嘅房，酒店職員就幫我免費升級一間可以加多張床俾嘅房間，面積大咗，仲可以對正永利皇宮嘅噴泉，令到我更加開心。

當我哋攞咗匙卡後，上到去打開門一睇，嘩，真係好有“家”嘅感覺，6百幾平方呎(哈哈，大過我間屋)，除咗可以望到永利皇宮嘅噴泉，仲可以望到少少嘅澳門機場及澳門輕軌列車。房間設備齊全，而且全部都好新及好乾淨。洗手間花灑水力勁，廳房都各有部大電視機，仲有咖啡機及好香嘅茶葉，可以沖茶嚟飲，免費4支蒸餾水，浴室仲有兩個洗手盆，梳化枱櫈都好乾淨。加上酒店位於新濠天地範圍內，所以乘搭穿梭巴士亦非常之方便，性價比極高，絕對絕對值得推介俾親友入住！

之後帶媽去附近行下，順便去巴黎鐵塔睇下，不過就唔好信佢網頁嘅兩項宣傳，完全睇唔到有3D嘅光效。。

最令人失望的是有關澳門巴黎人官網寫明：

冬日巴黎溜冰场

巴黎鐵塔七樓觀景台的冬日巴黎溜冰場是今年冬天金光綜合渡假區的重點活動之一。賓客可穿上溜冰鞋，在這個戶外真雪溜冰場一展他們出眾的溜冰技藝，並可欣賞精彩娛樂表演及品嚐節慶美食，度過一個與別不同的白色冬日。

地點： 澳門巴黎人　巴黎鐵塔七樓觀景台
日期和時間： 2018年11月15日至2019年1月6日，下午4:00至10:00
特色：冬日樂園、真雪溜冰體驗、人造飄雪、冬日美食區
入場費用： 活動區免費入場；溜冰體驗（30分鐘）– 澳門幣50元

竟然去到，連職員都話唔知有此事，一定要遊客買入場券才可去七樓，仲強調溜冰等都無開，搞到成班遊客都好失望而走。

然後我哋行咗一陣，就返酒店攞嘢，再坐穿梭巴士去澳門半島會合親友。

今次親友請咗我哋去澳門半島商業大馬路AIA廣場地下間「帝皇樓」食粵菜，除咗前菜，首先每人都有一個燉湯，餸菜有黑松露菌素帶子炒蛋、焗釀蟹蓋、枝竹生菜羊腩煲、羅漢腐皮卷、蒸紅瓜子斑，仲有蛋白及紅豆沙糖水，全部都整得好好味，難怪連續四年都攞『米芝蓮★一星級』食府。

食完飯本來諗住過對面馬路坐酒店穿梭巴士返酒店，不過親友堅持澳門好細，係都要車我哋返去，仲介紹我哋去酒店對面間永利皇宮坐纜車，估唔到十點幾都仲有得坐，最開心係免費及唔使點排隊，坐纜車圍繞一圈後，再睇埋個音樂噴泉表演，搞到媽咪好開心，係咁揸住部手機拍片。

之後我哋行返去酒店，返到房又再睇多次噴泉表演，梳洗後就瞓覺休息啦。

第二朝同媽咪去咗新濠天地間「左麟右李」食早餐，感覺就真係一般，味道略鹹，服務還可以，價錢都算合理。

然後中午12點係美獅美高梅會合親友，因為我一早於網上報咗「典藏導賞團」，由一位女職員帶大家參觀清代年間，絲綢與金銀線所織成嘅地毯，至今僅存300張，當中嘅28張御製地毯藏品現存於MGM，我揀咗以粵語嘅時段，大家都可以聽得比較清楚易明，時間大約半小時就結束。

之後我哋四個就行去「淳」餐廳飲茶，叫咗8款點心，

以及叫咗宮廷御點(供應日期由11月1日至12月31日) 乾隆皇帝最愛嘅3款糕點(荷花酥、豆沙芸豆卷、藕粉丸子)及其中2款茶嚟飲(江南春、玉中錦)。無論賣相、味道、環境、服務，我都覺得好好，呢餐又係親友請我哋食，搞到我真係唔好意思。

食飽後，親友去接仔放學，而我和媽咪就行咗一陣MGM，然後坐穿梭巴士去新濠影匯，行咗一陣，

臨走前，見到「狂電派」嘅電單車及越野車，

然後就坐穿梭巴去澳門港外碼頭，不過比我買嘅船票早咗大半個鐘去到，原本想排後補，點知5點後，真係好多人搭船，所以最後都係坐返6點船返香港。

總結：今次嘅兩日一夜Hea遊澳門，無論食住都好好，而且穿梭巴士又多又方便，可以穿梭氹仔幾間大酒店、官也街、碼頭、機場及澳門半島，真係又方便又唔需要錢，一個字形容『正』！

補充：有興趣去澳門玩嘅朋友們可以上網登記，並於2019年6月8日至7月28日逢星期六及日(上午9點至下午5點)於信德中心二樓中庭扶手電梯旁，出示身份證及顯示Facebook 證明已Like咗有關post，就可以免費獲得澳門24小時無限上綱SIM卡一張。