海洋公園生日免費入場

真係好多年無去過 Ocean Park 海洋公園玩啦~
趁海洋公園仲有"香港人生日免費入場"嘅優惠, 一於帶埋媽咪入去玩吓!
難得我生日, 而媽咪又65歲, 即係我哋兩個都可以免費入場...哈哈~

於銅鑼灣時代廣場側邊嘅鵝頸橋下面個巴士站搭 38 / 42 / 72 / 77去海洋公園極為方便!
於第二個站落車, 行大約10分鐘, 就可以去到海洋公園啦~

憑身份證就可以攞到免費入場門票一張, 原來生日仲會送一套六張嘅coupon:1) 買紀念品滿$300可享九折之優惠券兩張.
2) 惠顧小食亭八折之優惠券一張.
3) 特價$78購買5R留影站相片一張(原價$98)
4) 灣景餐廳消費滿$50或以上, 即免費任擇甜品一份.
5) 於園內任何餐廳消費滿$200可享八折之優惠券一張.

遊人仲可以免費走入「財神殿」向財神爺逗利是及影相.

 

 

行行吓...竟然睇到有上海婆、飛機頭等懷舊電影角色齊齊以連串經典金曲載歌載舞嘅"新春金曲歌舞街"之表演...

 
相信有好多人都從未坐過咁老爺嘅電車啦~

 之後行行吓竟然見到一個50至70年代的"香港老大街"...
老大街嘅店鋪有好多港式地道小食, 有碗仔翅、魚蛋、沙爹串燒、豉油皇炒麵、腸粉...等等, (大約平均HK$20-35) 味道一般! 始終唔夠出面好食!

 見到D舊式電錶制, 點都要影吓相啦!

 

再坐架空纜車...

 仲見到我好鍾意嘅鸚鵡, 當然要影吓相啦~

 跟住去到動感天地睇人哋玩快速搖擺嘅"翻天覆地"及仿滑翔機設計嘅"超速旋風"機動遊戲, 唔敢玩嘅我...企係度睇都覺得好刺激! 如果我玩...一定會嘔!

 去冰極天地嘅南極奇觀可以近距離睇到皇帝企鵝.

 入到"水母萬花筒"...真係覺得D水母好靚!!

 

 

 

當然一定要去探吓34歲嘅大熊貓"佳佳", 可惜"安安"無行出嚟...

七點鐘於夢幻水都睇獨一無二極具視聽震撼的水上煙火特效大匯演.

主角水龍和火龍會演出由互相激鬥到化敵為友的精彩故事！

最後去埋世界十大水族館之一嘅"海洋奇觀", 其中一個高8公尺、闊13公尺的巨型觀賞屏, 企係度可以睇到好多珍貴嘅魚類.

然後行出去坐車返屋企啦...

總結: 海洋公園多嘢睇及多嘢食過迪士尼公園, 難怪香港海洋公園勇奪2012年度「The Applause Award」(全球最佳主題公園)大獎，成為亞洲首間獲得此項殊榮的主題公園.

香港人生日免費入場

作為「香港人的主題公園」，遊客只需於海洋公園票務部出示香港身份證明文件或香港出生證明書，便可於生日當天日間免費遊覽海洋公園。

日間入場門票:成人$280小童$140

有晚放工, 竟然見到工聯會貼咗張海報, 工聯會會員可以於工聯會購買香港海洋公園日場門票有特別優惠:成人: 特價HK$200小童: 特價HK$100優惠適用於: 2013年2月25日至3月6日、3月11日至3月20日、4月15日至4月24日嘅其中一日.   

後來又見到另一張海報, 工聯會會員可以於工聯會購買香港海洋公園日場門票之特別優惠:

成人: 特價HK$200小童: 特價HK$100
優惠適用於:2013年5月6日至6月30日嘅其中一日.

隨優惠門票贈送園內飲食及購物優惠券.

至於2013年7月1日-8月31日, 工聯會會員可以有現金優惠價:
成人: 特價HK$229小童: 特價HK$116

2013年9月起調整入場票價
成人門票由$280 加至$320小童門票由$140 加至$160
新票價實施後首兩個月，即九月及十月，香港巿民以正票價購買成人或小童票可享八五折優惠。

此外，今年夏水禮期間，海洋公園特別推出消暑夜場，由7月20日至8月25日，每逢星期六及日，公園將延長開放時間至晚上10時，並特別推出夜場優惠門票，成人票只需港幣160元，小童票港幣80元，入場時間為下午5時。而未來一年，有些項目將持續進行，當中包括:
1) 每位香港市民於其生日當天可免費入場

2) 3歲以下小童及65歲或以上的香港市民可免費入場

3) 持「殘疾人士登記證」的人士及其一位同伴可分別獲免費及半價入場優惠

4) 領取綜援家庭成員可以港幣二十元的象徵式票價購買入場門票