筲箕灣譚公誕巡遊2018

今日(農曆四月初八)佛誕假期，原本好想去長洲睇飄色，不過天氣實在太炎熱啦，所以都係去返筲箕灣東大街欣賞譚公誕巡遊。



今次帶埋媽和妹去，大約10：45去到筲箕灣電車總站，就已經見到巡遊隊伍，氣氛非常熱鬧。

後來行進東大街，兩邊都已企滿人，真係估唔到咁熱嘅天氣，嚟欣賞嘅人竟然會比上年多咁多，而今年嘅巡遊據知有20幾隊，大約1500人參與，包括舞龍醒獅、武術表演等。

 

覺得今日最難度高嘅動作，就係以下呢兩張相嘅表演。

中午時段真係烈日當空，好多表演嘅小朋友都熱到出哂汗，有啲貼咗散熱貼，


有啲就開風扇吹，

睇到大約下午一點鐘，媽和妹都已經熱到頂唔順，於是我亦陪佢哋去食晏，之後就去咗維園個佛誕嘉年華。

可能係天氣問題，熱到我都只係行咗個圈，就想走，而最多人逗留嘅都算係亞洲美食坊，臨走之前…我都買咗幾個艾草餅及馬蹄糕返屋企食。

總括: 筲箕灣譚公誕巡遊，真係東區嘅一個重要節日，相信以後無論巡遊隊伍、市民及遊客嘅人數，一定會一年比一年多。

而我今日見到有好多巡遊隊伍嘅隊員，無論男或女，好多都一邊巡遊一邊食煙，搞到好多市民要吸二手煙，希望下年啲煙民，可以忍下口，等行完個路程才食吧！