年初二賀歲煙花

今年新年煙花匯演首次加插激光圖案效果...主題是"新春新氣象", 跟據大會建議於港島區觀賞煙花效果會比較好, 而且今年年初二天氣唔錯又無落雨.  

從未去過灣仔金紫荊廣場睇煙花嘅我...以免好似前幾個月尖沙咀海旁十一煙花時嘅霸位情況, 所以決定下午一點鐘就出門口, 搭車去灣仔金紫荊廣場霸定個位等夜晚放煙花...一直好擔心會無位, 點知真係估唔到...只係得兩個人霸咗位, 而我竟然會係第三個開腳架霸位嘅人.
哈哈~趁得閒用吓手機影張相先...

大約三點鐘開始見到三艘躉船嘅位置之後就開始陸續有人嚟啦...去到六點半左右, 第一排企位先至開始企滿人...



等到黃昏時間, 我終於攞部相機出嚟影吓相啦~ 

仲嘗試影咗一張渡輪經過嘅軌跡

哈哈~依然用緊入門級單反Canon 600D + 18-135 kit 鏡嘅我,
終於等到七點半啦~首先先睇尖沙咀文化中心外牆激光投射圖案表演,

之後睇住大家都好齊心地大聲倒數
(因為企係港島區仲可以睇到ICC環球貿易廣場嘅倒數顯示)
而萬眾期待嘅賀歲煙花...準時八點正於維港發放!

大家都好尊心地影相, 而我亦嘗試用拉爆影吓煙花...

 

 

今次係我第二次企係維港影煙花, 仲嘗試咗幾個唔同嘅方法去影, 雖然影得唔靚...不過都影得好開心... 

大約廿三分鐘發放咗23888枚煙花彈, 特別係最後一幕...成個天都係煙花, 加上超低音現場環迴立體聲! 嘩~攪到我都...唔識影只係掛住睇
哈哈~雖然食足七個鐘嘅海風, 攪到流鼻水仲好頭痛...不過到最後都覺得好值得, 因為真係好近好震撼!

散場時人群較多...大約十點鐘才返到屋企, 最估唔到嘅係一入屋就見到嘅驚喜...

好靚嘅美心快樂彩虹蛋糕, 包裝得好靚, 盒內七彩嘅圖案, 真係睇到都好開心!

外層鋪滿幼滑忌廉，再以繽紛棉花糖點綴，一切開即見層層色彩鮮艷海綿蛋糕，五層原味蛋糕混合四種不同滋味夾心，包括鮮士多啤梨片、鮮芒果片、柚子醬、鮮奇異果片。 (蛋糕資料copy自美心西餅.)
哈哈~~真係好好食!!!! 好開心!!!!