活化後的中環街市

1993年建成嘅中環街市，自從2003年起就陸續停用，關閉咗18年嘅中環街市，用咗5億進行活化，呢座三級歷史建築物，終於係8月23日正式開幕！活化後嘅街巿外貌及外牆顏色都係跟返以前一樣。

而我怕開幕首日會有好多人去打卡，所以揀咗第二日（8月24日）至去，仲要係Lunch後至過去，其中一個入口，一入去就見到天花吊咗好多以前照雞蛋用嘅燈，

再行入去見到有個露天中庭位置，據聞係以前用嚟停泊單車嘅地方，已經見到好多人係度影相打卡。

其中一個打卡位，就係水磨石主樓梯啦。

再行上去一樓，就會見到相片回顧展覽，展期至11月。

而一樓及二樓，都可以見到有好多懷舊小店，仲有好多開放式Cafe，仲有間環保主題嘅生活百貨Slowood 及皇玥餅藝 Imperial Patisserie。

亦有由香港科技園公司及數碼港合辦嘅活動，專為6至12歲嘅小朋友而設嘅Steam Playground，有一系列互動遊戲，六大體驗區，包括有問有答、樂趣滿中環、「體」驗機械等等，活動免費入場，日期只係做到8月29日，時間11：00 - 20：00。

仲有24小時開放嘅行人通道及洗手間設施。

街市面積都幾大，暫時店舖應該開咗大約7至8成。

總結：暫時活化後嘅街市，設計上用咗好多環保概念，有好多係玻璃設計，增加咗自然光，天氣好嘅時候，用普通手機影相都可以好靚。位置及交通都比起 PMQ元創方 更為方便，加上街市仍有位置正在進行活化工程，相信陸續會有更多店舖進場，到時人流一定會更加多。