綠在東區環保站

趁放假，帶媽去「綠在東區」環保站，睇下平時我妹攞嘢過去回收嘅地方。

全港暫時只有七個「綠在區區」環保站，港島區暫時只有一個環保站，好彩係東區，筲箕灣愛信道30號，距離西灣河地鐵站（B出口) ，向左沿筲箕灣道行，左轉會見到協青社賽馬會大樓，我媽見到協青社啲塗鴉，都大讚好靚，然後沿住興民街行，就會見到一個天橋底一個好似公園嘅建築物，就係「綠在東區」環保站啦。

「綠在東區」環保站建築設計都好特別，有一排竹枝屏風，又有草地，又用貨櫃組成工作間，雖然環保站回收範圍係室外，但係因為係位於天橋底，所以完全唔怕太陽曬，可以慢慢將帶去嘅物品，睇清楚，擺落正確嘅回收袋或箱內。

今次媽媽第一次跟我去，佢都大讚環保站好乾淨，攞嘢去回收嘅人都好有心及好有耐性，慢慢睇清楚去分類。

我媽一直以為只係分「紙、鋁罐、膠樽」3類，點知去到見到有分（已清洗乾淨）1、2、3、4、5、6號及沒有編號嘅廢膠，仲有玻璃容器、慳電膽、光管、充電池、廢金屬（需分鋁飲品罐及非鋁飲品罐）、紙包盒（需分有鋁箔及無鋁箔）、小型電器、四電一腦、光碟及發泡膠。

仲有個雨傘回收，而呢啲雨傘都可以擺係度俾人用，用完最好可以歸還原位。

最後我仲發現原來「綠在東區」有舉辦好多環保教育活動，有機會都參加下先。

補充：環保署推出「綠綠賞」智能積分卡，當提交回收物時仲可以賺到積分，用嚟兌換禮品。積分卡適用全港18區9個回收環保站、22個回收便利點、超過100個回收流動點及社區智能回收車，希望可以鼓勵到更加多嘅人支持環保回收，儲分認卡唔認人，所以一家人可以共用一張積分卡，既方便又環保。