雲南6天遊

一月中就開始上網睇有關雲南嘅旅遊行程，最後決定報永安旅遊，主要是因為乘坐國泰港龍嘅航班時間及出發日期都好啱我哋，於是二月報名，三月出發。因今次同埋家人一齊去，所以揀咗跟團，對我嚟講亦會比較輕鬆啲。

報名後，就開始準備以下事項：

1) 旅遊保險，今次我又係揀咗網上買豐隆旅遊保險，因為保障及保費都正合我所需。

2) 流動上網卡，去深水埗買$90，可以係大陸用到Whatsapp及Facebook。

3) 雲南紫外線極極極高，唔搽得防曬嘅我，去旅行又要攞住相機影風景，如果用雨傘防曬就會好唔方便，於是淘寶買咗個大包圍嘅防曬帽，超平，而且好好用，可以捲起，方便攜帶，性價比極高。

4) 機鐵香港站來回飛，咁啱睇到KKday網站有做優惠，價錢又最抵，只需去程用QR code入閘，回程出閘時再用多次同一個QR code，真係又方便又環保。(以下是由KK day網頁內之圖片組合而成)

5) 買啲朱古力及得力素葡萄糖，以便補充體力，減低高山反應，因麗江市海拔2900米，玉龍雪山(雲杉坪)3200米，原本想買紅景天，但見到好多人講食咗都未必有用，而且好易失眠，所以唔敢買。

6) 帶幾個插蘇轉頭，以便每晚為手機及相機充電。(以下兩款都啱用)

7) 雲南早晚溫差極大，所以厚薄衫褲都要帶，正如雲南十八怪之其中一怪，四季服裝長穿戴！

8) 帶潤唇及潤膚用品，因當地天氣極度乾燥。

9) 帶人民幣散紙，因為當地實在有好多小食，如果有微信支付，就更加方便，可惜我未開。

10) 帶啲口罩、傷風感冒藥、腸胃藥等平安藥物，以備不時之需。

3月10日(第一天) 香港至昆明

早上坐機鐵9：10去到香港機場集合，11：40由香港 昆明 ，航程約2.5小時，午餐於航機上。落機後，經過櫻花谷，大家都落車影下相，之後又見到一群黑色羊仔，

然後正式第一個行程，去昆明九鄉自然風景區，乘坐遊覽船到蔭翠峽、

地下棉花堡、鐘乳石群、行下行下都行咗成個鐘，

洞穴內又見到有部汽水機，又見到有個雲南紅嘅紅酒窖(我覺得似係廣告位)，







然後再要行上三百幾級石級後就再坐單程索道，如果行唔到嘅話，可以俾人仔￥90俾兩位橋夫抬上去，當去到索道時，可惜已經天黑，完全無辦法影相，唔畏高嘅我，望落去都有啲驚，因為真係好黑，完全睇唔到下面有幾深，好彩好快就到頂，可以轉坐旅遊巴去食晚餐，餸菜偏油及有點辣，好彩都仲有啲唔辣，雖然無香港咁好食，不過我都食得好飽。

大約11點去到酒店，第一晚住昆明三茂城市印象酒店，感覺都幾乾淨，唔錯，好好瞓。

3月11日(第二天) 昆明至大理

早餐係酒店內，雖然早餐唔算多選擇，不過都可以食到飽，然後8點去昆明商業步行街，睇金馬碧雞牌坊，見到有架武警巡邏車隊，附近亦有好多小食及米線店舖 。

午餐食宜良烤鴨宴後 ，餐廳門外亦有賣生果嘅車仔檔，原來大陸無論店舖或街邊流動小販都有收微信支付。

然後再坐車由昆明至大理，車程約4小時到國家5A級景區，大雄寶殿、崇聖寺三塔文化旅遊區，遊覽千尋塔、南北小塔、崇聖寺三塔倒影，仲見到松鼠。

 

然後坐車去食晚餐(大理白族風味餐)，飯後去行大理古城，城內有好多小吃店，仲見到間麥當勞，行到洋人街就行返轉頭集合。

約十點返到第二晚所住嘅(大理五星級)幸福龍國際大酒店，整體都算乾淨企理，不過就無第一間咁新。

3月12日(第三天) 大理至麗江

早餐酒店內，選擇唔多，不過都係一樣可以食飽個肚，然後9點坐車去桃源古渡欣賞洱海風光，欣賞高源淡水湖泊，附近見到個好可愛嘅小妹妹企係田度，諗緊點解會有幾個人係咁對住佢影相嘅呢？哈哈～其中一個就係我。

然後坐車途經遠望見到祟聖寺三塔及田園村屋，仲見到一個油菜花田，而導遊亦好好人，俾大家落車影下相，再坐車去白子人家品嚐三道茶(一苦二甜三回味)及欣賞白族歌舞表演，感覺真係好一般，舞台及表演者都好求其。

食完午餐(砂鍋魚風味餐)後，坐車由大理至麗江，車程約3小時，途經一個中途站，見到用粟米磨粉而制成嘅粟米餅，雖然當時好飽，但都忍唔住口，食咗好多。

到達麗江後就轉當地一位女導遊，帶大家去黑龍潭公園，欣賞麗江世界文化遺產 ，行到大研鎮四方街古城，再自由活動，

而我就行上觀景台，又見到櫻花，最主要係睇到成個古城嘅屋頂，而最可惜係當地的少數民族當日無搞篝火晚會，我個人就都有啲失望，沿途見到一隻畫咗眉嘅狗仔，大家都覺得好有趣。

食晚餐(納西喜宴)後，再坐車去麗江古城，再步行入城內間五星級王府飯店，今次全團住貴賓房，仲連續住兩晚，整體都唔錯，張床有暖毯，瞓得好舒服，背脊好暖，唯一房間燈光比較暗。

3月13日(第四天) 麗江玉龍雪山

於酒店內食完早餐後， 8：15大家準時出發坐車去玉龍雪山，再轉乘雪山專車(環保車)往雲杉坪索道候車站去甘海子 ，再坐索道去主峰扇子陡半山腰嘅一個高山草甸(雲杉坪)，

 

雲杉坪位於海拔3240米，上到去就見到好多遊客手持氧氣樽，而我妹亦係背囊取出一支於古城買嘅氧氣，價錢比山上買嘅便宜好多！而我就做足防曬，哈哈~完全睇唔到我個樣，可能團友都覺得我太誇張，不過自己知自己事，唔想玫瑰痤瘡出嚟，所以一定要咁做。

 

行行下又見到幾隻羊，又見到好多遊客俾￥20著當地民族服裝影相，行咗一個大圈之後(都差唔多行咗一小時)，再乘坐電屏車往白水河和藍月谷，而其中一程電瓶車就要自費，因導遊講，如果按行程步行落去就要行好耐，所以大家都唔介意要付多￥20/人，

去到白水河和藍月谷，真係好靚，仲見到牦牛及黃牛，團友都好興奮，就圍影相，講真行得快，真係會氣喘，有團友亦因此有高山反應，頭痛、無胃口，最後仲嘔埋，而我落山後亦感覺到有少少頭痛，不過好彩都仲好好胃口(海拔高嘅地方，特別容易肚餓及眼瞓)，其他團友全部無事，亦無吸氧氣，相信我都係心急，驚集合遲到而引致，如果慢慢行，就一定唔會係咁。

午餐於玉龍雪山間餐廳食，海拔3100米，餐廳門口可以睇到(甘海子藍月谷劇場)印象麗江嘅後台一小部份，大家食飽後，等旅遊巴嚟嘅時候，都可以睇到少少一角仔嘅表演，期間竟然落咗一陣雪，不過好快好快就落完啦，真係估唔到帶上山嘅遮，竟然係用來遮雪。

之後坐車去東巴文化聖地玉水寨，

行咗一陣再坐車去束河古鎮自由行，今日真係見到好多人影婚紗相，

而我哋都行到有啲攰，就揀咗間酒吧上去飲嘢，等6：00樓下集合，

坐車去餐廳，晚飯後就返酒店休息，不過時間尚早，唔想瞓住，所以我哋自己再出去行古城，買生果食，估唔到夜晚十點後嘅古城街道都仲咁多遊人，我哋行咗兩個鐘後，我個頭都仲有少少痛，於是就返王府飯店休息啦！好彩瞓咗一晚就無事啦。

3月14日(第五天) 麗江至昆明

早餐酒店內，估唔到朝早6：30餐廳已坐滿食客，7：30出發離開古城，由麗江至大理 ，車程約3.5小時，途經一個亭，大家都落車去洗手間，嘩~真係完全無諗過女廁入面會係全開放式(雖然接受唔到，不過急...都要去架，好彩全程只遇到一次，其他旅遊區都算乾淨)。之後繼續坐車去當地餐廳食午餐，餐後坐車由大理至昆明，車程約4.5小時，

18：15晚餐野生菌火鍋，19：30餐後見到好靚嘅黃昏天色，坐車去欣賞《雲南印象》，演出時間20：00到21：40，好彩19：55趕達雲南藝術劇場。

《雲南印象》由著名中國舞蹈家楊麗萍2001年用咗18個月親自編導，以雲南各民族生活、歌舞為元素，創作而成。

最後孔雀舞，雖然唔係楊麗萍親身表演，但佢徒弟一樣好似佢咁無骨酥軟嘅手臂及靈活嘅手指，實在跳得好靚好精彩，表演結束後，演員都出嚟膐謝幕。整個表演都好值得欣賞，不過最可惜係坐得太遠。

門票由導遊代購，亦係旅行社行程表寫咗嘅￥260，一直以為係坐乙票區，因￥260正是乙票區門市價，點知成團人都坐嘅位置竟然都係丙票，唔講優惠價啦，丙票門市價都只係￥180，而我個人就對此安排感覺好失望，真係唔知邊一個人或公司食水食得咁深！

然後再坐車入住第一晚住過嘅昆明三茂城市印象酒店休息及執行李，準備明天回港。

3月15日(第六天) 昆明至香港
早餐係酒店內，9:30出發去昆明瀑布公園觀賞亞洲最長人工瀑布，可以沿橋行到入去個洞口影相，公園內仲有好多櫻花及遊客。

之後再坐車去全新花之城景區，內有所謂大型花卉主題溫室及香料文化博物館，感覺好一般，如果自由行，就真係唔需要此行程啦！

大約1：00坐車去到機場，自費食個午餐後，大約2：00就入去排隊離境及安檢，期間見到一隊解放軍好有秩序地排隊離境，而我哋亦以為過關時間可以好快，點知原來雲南安檢非常仔細，每位離境人士都要搜查全身，所以排隊都用咗成個鐘 ，  (所以奉勸各位自由行人士，當離開雲南，最好預早多啲時間入閘過關做安檢，否則可能趕唔切登機。)  ， 好彩我哋啱啱趕得切登機，最後約3：40起飛， 昆明  5：40到香港機場，6：30坐機鐵轉乘港鐵回家，同時亦代表2018雲南之旅亦完滿結束 。

總結：
坐國泰港龍直航去昆明，航班時間啱哂香港人。至於跟團可以坐大嘅旅遊巴，方便擺放各人每日所需用品。今次全團23人，分三圍枱食飯，坐得舒服，唔會逼。上車又可以沿途睇下風景，輕鬆聽歌瞓下覺，完全唔需要擔心其他嘢，對於我嚟講，真係輕鬆好多。其實對領隊及導遊嚟講，佢哋遇到我哋成團23人都好算佢哋幸運啦，團友全部都都好有禮貌及守時。

至於三月雲南天氣，早晚都比較凍，晏晝就比較熱，個人感覺旅遊巴內比較焗，塊面都會容易紅(始終自己都係玫友)，幸好團餐大部份都好啱我食，因每餐都有菜，而且飯餸嚟到，都唔會覺得熱，哈哈哈哈，微暖正正啱哂玫友嘅我，同枱團友當然唔慣食唔熱嘅飯餸啦，所以今次嘅旅行，都算我好彩，玫瑰無發作，反而返到香港，覺得好濕，眼和咀唇都有啲敏感，證明香港天氣對我嘅皮膚影響較大。

最後補充，雲南真係一個好靚嘅地方，如果想去旅行嘅朋友們，我會建議等年底高鐵通車後才去，因為到時由昆明去麗江車程可以節省六至七小時，而自由行亦一定比跟團慳錢，仲可以慢慢欣賞及了解當地風土人情。