Canon攝影馬拉松2017圓滿結束

10月8號星期日天氣都算唔錯，雖然有啲熱及有陽光，不過…好彩都無落雨，最緊要就係…無打風，可以如期進行Canon 攝影馬拉松2017。

大會亦好快啲將當日精彩照片上載到Facebook專頁，而我當然亦下載咗(以下照片)嚟留念。

當日大約早上11點，我與兩位朋友係灣仔會展中心會合，一齊排隊登記後，就去洗手間換上大會指定嘅圓領黑色短袖T恤。

然後坐定定等開幕典禮嘅司儀『森美』出場，佢真係好識講笑，令到會場氣氛好好，大家都笑得好開心。

之後介紹埋今年嘅評判，Topaz Leung, Celia Ching, Brian Ching, 蔡經仁及Dominic Chan，至於企係右邊第二個日本男士，佢係Canon嘅高層，跟住就同所有參加者一齊影大合照啦。

準時一點鐘發佈拍攝主題後，參賽者都好開心地出發啦。

而今年Checkpoint 地點：香港仔石排灣商場，

哈哈～對我嚟講真係好陌生，因為無地鐵直接去到，好彩其中一個朋友帶路，否則都有啲難搵。

三點及五點鐘分別收到第二及三個拍攝主題，

可能真係開心嘅時間特別快過，七點半前我哋就已經返到會場上載相片，

攞埋個紀念品(Lowepro別注版相機袋)後，

點都要係會場影張相留念啦，

最後聽埋全新EF鏡頭拍攝專業分享會後，就正式圓滿結束今年嘅攝影馬拉松啦。

總結：天氣熱，對玫友嚟講，參加戶外活動真係特別擔心，好彩最後都可以順順利利地完成整日活動，期待下年可以再次『SHOOT FOR HONG KONG』，最好可以秋冬季啦!