筲箕灣譚公誕巡遊2017

(農曆四月初八)佛誕，亦係譚公誕，每年筲箕灣東大街都會有慶賀譚公寶誕巡遊，由早上九點開始就有祭祀祈福、舞龍醒獅、百仙出巡、民族服飾、飄色地飄等巡遊隊伍，約一千多人，再加上兩旁圍觀嘅街坊群眾，就真係成條東大街都逼滿人啦，非常熱鬧！亦有好多警察在場維持秩序。

如果下年再去睇嘅話，我諗我都要好似呢兩位咁，戴個耳塞，因為啲鑼鼓聲真係好大聲，而且係不停嘅。

 

氣氛就真係唔錯，市民都睇得好開心，每當有舞龍出現，就會有好多人專登係龍身下面穿嚟穿去，亦會摸龍頭及獅頭，哈哈，聽聞會帶嚟好運。

估唔到企到咁高舞獅頭嘅竟然係個女仔，仲有個攝影師上咗去停車場上面影相，睇落位置唔錯，可惜我唔識上去。

而今日天氣都算唔錯，無落雨，雖然好熱，但係好彩間中都有啲風，而我就要走嚟走去避陽光，因為塊面唔曬得，不過今日咁熱，塊面都係熱到紅咗，而我睇到大約三點就離開啦，哈哈，因為肚餓，忍唔住要去食晏啦。臨走前，我問咗個警察，佢話都差唔多尾聲啦，所以我食完晏後，相信個巡遊都已經完滿結束啦！

總結：佛誕想影下相，趁下熱鬧，筲箕灣譚公寶誕巡遊的確係一個唔錯嘅選擇。