立山黑部之旅

等咗成年, 終於今年可以於雪之大谷開放期間放大假, 今年開放日期係由4月16日至6月22日.

而我哋就咁啱係5月11日母親節正日, 可以陪同媽咪一齊上立山, 真係好開心!

上立山黑部要乘坐6種交通工具:

一) 於立山站要排隊乘坐立山纜車去美女平站, 車程7分鐘, 能一口氣上海拔500米高,

二) 再乘坐高原巴士, 由美女平站去室堂站, 車程50分鐘, 沿途景色一流...

能夠睇到海拔1500米高嘅大自然景色, 大家都興奮到攞部相機出嚟影相.

最好彩係天氣好好, 無落雨...上到2390米嘅雪之大谷, 發現最多嘅遊客, 好似就係台灣人啦,
( 哈哈~以下兩位正是台灣人啦! )

另一個景點就係雪之迷宮, 唔好以為簡單, 如果一路行一路掛住影相...哈哈~真係會行到迷路.

三) 再由日本海拔2450米最高地帶...排隊乘坐立山無軌電車,

由室堂站去到大觀峰站, 所需時間10分鐘, 由於係用電力, 無排出廢氣...所以我就無暈車浪啦!

10分鐘都幾長架, 而我就只係用咗手機影咗2分幾鐘...

去到大觀峰站, 行樓梯上到去, 又另一個美景...

四) 再坐立山索道(日本最大無支柱嘅空中纜車)由大觀峰就去黑部平站, 所需時間只需7分鐘,

五) 然後再乘坐黑部纜車去黑部湖站, 時間只需5分鐘...

沿途可以欣賞好靚嘅黑部湖, 仲有高186米, 長492米穹頂型拱壩, 係日本最高嘅拱形水庫, 可惜5月份仲未開始排洪, 睇唔到個氣勢, 不過望落去...都有啲驚架...

行到黑部大壩站, 大家都用水樽盛載雪水嚟飲, 喉嚨痛嘅我, 真係唔係講笑... 飲咗雪水即刻覺得無咁痛!!

六) 最後由黑部大壩站乘坐關電無軌電車, 16分鐘就可以去到扇澤站,

總結: 今次立山黑部之旅, 真係要多謝個天! 無落雨亦無吹大風, 聽聞遲一日上去嘅人, 因大風...要折返, 未能坐哂6種交通工具, 亦去唔到黑部...如果係我...一定會好失落!