十一國慶煙花

難得十月一日放假, 趁天氣唔係咁熱嘅時候...我決定過海影煙花.
4點幾去到尖沙咀碼頭, 已經人頭湧湧...而我今次係第一次帶埋腳架 + CANON EOS 600D + 18-135mm KIT 鏡, 去到尖沙咀影煙花, 心情超緊張, 因為得我一個人去...另外兩位朋友去咗影舞火龍.

沿住海旁一直行...都無晒位, 差唔多五點啦...我開始覺得絕望之際...傻吓傻吓...行到星光大道, 見到有個小小吉位, 我就行去問咗位坐係度睇緊卡通片位師兄, 佢真係好好人, 俾我插個位入去, 而另一邊竟然係國內同胞, 佢哋都好有禮貌, 仲讓多少少位俾我.

 

 

而我一直都以為唔靚嘅位置, 當企定定之後...望真D...竟然係最靚最有利嘅位置之一, 哈哈~加上天氣好好, 唔熱又無落雨, 仲好大風, 可以吹走D煙, 令到天空比較清...有利欣賞煙花, 雖然我攝影技術唔好, 不過可以企係現場睇到咁靚嘅煙花, 硬企咗五個幾鐘, 都覺得係值得嘅!!