新加坡自由行4天

咁啱可以同妹妹一齊放大假, 我哋都想帶媽媽去新加坡行吓, 更難得地竟然有3位好友都話可以一齊去玩, 但因時間緊逼, 我和其中一位好友都開始上網揀酒店, 至於行程, 有待酒店及機票確認後才再安排.

酒店方面, 大家都各有喜好, 有:

The Fullerton Hotel(EW14) (NS26) 步行10分鐘 , Swissotel the Stamford (EW13) (NS25) 步行步3分鐘  & Grand Park City Hall(EW13) (NS25) 步行8分鐘...等等.

因為我幾年前已去過新加坡自由行, 所以今次酒店最後都由我決定...而我睇咗地圖後, 為咗方便今次行程嘅安排, 今次人數較以往多, 相信留係酒店嘅時間相對不會太多, 我最後決定揀返殖民區City Hall 站(EW13) (NS25) 附近嘅Grand Park City Hall酒店, 雖然從未住過, 但我覺得地點總算方便, 而且最緊要係價錢合理!

睇咗好多間旅行社, 以及國泰和新加坡航空嘅機票加酒店之優惠套票後, 最後都係決定揀國泰假期, 因為國泰有我想住嘅酒店Grand Park City Hall http://www.parkhotelgroup.com/cityhall/

至於航班時間, 我揀咗早上8:55, 去到新加坡係中午12:30, 然後搭車去酒店check in.

回航就揀晚上18:25, 到香港就22:10, 預計攞埋行李後, 仲可以好方便咁搭車返屋企.

於網上預訂套票後, 我便開始安排行程, 參考我所新買嘅EASY GO 新加坡旅遊通2013年新版，而朋友就買咗另一本正文社新加坡旅遊書. (其實兩本都各有各好, 我比較多睇EASY GO, 睇地圖方便...不過唔夠update...有少少錯誤嘅指示)　

出發前幾日, 我去咗百年找換店兌換新加坡元, 當時美金跌咗, 相對換新加坡元就貴咗, 要
HKD 6.343 = SGD 1.
http://bcel1985.blogspot.hk/

其實去新加坡自由行, 我個人覺得比去台中方便得多, 特別係交通...而且持有特區護照更可以免簽證, 於新加坡逗留30天, 又唔駛帶轉插器, 因新加坡和香港一樣都係用三腳扁型插頭, 電壓220伏特及50Hz.

於啟航48小時至90分鐘前預辦國泰的登機手續, 辦理網上預辦登機, 仲可以重新選擇座位, 列印登機確認頁後, 如沒有寄艙行李最遲可於航班啟航前30分鐘直接前往登機閘口及出示您的旅遊證件以供核對, 如有行李需要寄艙一定要於45分鐘前到達C2 櫃檯, 自助登機行李寄艙櫃檯辦理手續(最好預多D時間, 因為實在太多人啦...) .

當時收到嘅最新出發時間及天氣資訊...嘩~睇到都想喊! 哈哈~點知, 原來新加坡天氣預測和台中的一樣 (唔準!! )

第一天)

搭乘CX759 由香港8:55出發, 下午12:30到達新加坡樟宜國際機場. 一出海關就行去Customer service 攞免費 Wi-Fi (Wireless@SG) 嘅Username & Password, 無需任何申請手續, 只要問...便可以一人有一張, 不過本人就覺得接收一般.

跟住行去Terminal 2 搭MRT, 途經一間蛋糕店, 大家都買咗班蘭蛋糕食, 嘩~真係好鬆軟, 好好味!

沿路搭電梯落去地鐵站...

今次選擇買單程車票, 雖然車費會貴過儲值咭EZ Link 少少, 不過用EZ Link有5元工本費, 係攞唔返嘅(不退回的), 而一日singapore tourist pass, 除非一日搭好多程車, 否則最終都係用單車票比較平, 單程票於出閘後30日內可以退回SG$1(不過我建議...一出閘就退, 以防唔見). 如果逗留7天以上, 而且經常要搭車, 我會建議用EZ Link 咭.

今次我帶埋兩張EZ Link 咭去退, 可惜因已超過五年...已無效, 唯有留作記念.

然後由機場坐地鐵, 兩個站到Tanah Merah(EW4), 落車轉去另一條線 Joo Koon(EW29), 坐9個站就到達City Hall (NS23/EW13), 因第一次要搵...所以步行約10分鐘才到 Grand Park City Hall 酒店 check in.

一入到去酒店大堂, 即刻有人攞嘢俾我哋飲, 服務唔錯, 房間都整齊清潔. 而且酒店坐落於行政文化區, 距離新加坡所新建的地標都可以徒步行過去, 超方便.

於酒店梳洗後, 隨即行去萊佛士商城 Raffles City food count 食嘢, 然後再慢慢行...經過濱海藝術中心, 再散步去魚尾獅公園影相, 可惜個天無白雲...

睇埋8:00開始嘅雷射表演後, 便步行去萊佛士商城後面過兩個街口嘅熟食中心食晚飯. 雖然話係24 時營業, 不過...有好多食檔都只係開到11點左右. 大約11點幾, 我哋食飽之後...慢慢行返酒店, 一入到酒店大堂, 大家都即刻開Wi-Fi免費上網, 坐咗一陣, 大家都覺得好攰, 唯有返上房休息, 點知返房後, 竟然發現酒店房都可以免費上網.

第二天)

7點起身, 8點落去酒店嘅餐廳食早餐, 估唔到...都幾多選擇, 環境仲好舒適...所以比預期中食多咗半個鐘...早餐後, 再返房攞嘢, 然後行去 Swissotel The Stamford坐9:44班免費巴士去新加坡環球影城.

(此巴士僅供外國遊客乘搭, 上車時要出示護照及新加坡入境卡. )

明古連 / 濱海路線

現在去聖淘沙名勝世界, 交通四通八達. 可以有好多選擇...乘搭公車、地鐵、出租車或是自行駕車前往, 都極為方便.

大約 10:25準時到達RWS 聖淘沙, 落車見到嘅係一個超大嘅停車場, 不過都好容易搵到去環球影城個出口.

一行出去...就見到環球影城個地球標誌,

跟住就購票入場...購買之前一定要聲明“MasterCard® 獨家賞 ”先至可以享有優惠.

http://www.rwsentosa.com/language/zh-CN/Homepage/ThingsToDo/UniversalStudiosSingapore/ 

優惠有效於現場與網上購買: 
 2012年7月16日至2012年11月16日之間到訪
每個優惠包括1張新加坡環球影城單日票和1張海事博物館入門票. 優惠不適用於新加坡環球影城超高峰期（2012年9月1日，9月8日，10月26日，10月27日）
1張單日票成人SD$ 60, 兒童SD$ 45, 年長者SD$ 30.

環球影城內有好多水機, 唔駛買水飲. 至於餐廳和小食, 就好貴又唔啱我食...

原來可以行出去, 過去旁邊嘅"馬來西亞美食街"(價錢合理, 又多選擇!)
食飽咗, 再入去玩...不過一定要記得伸手蓋印後才出去, 否則入唔返去.

離開環球影城後, 就行去旁邊嘅"海事博物館"....

大約5:45大家都急急腳地行去搭"聖淘沙快速" Sentosa Express, 免費前往島內嘅遊樂地方,

因為係循環線, 所以揀咗去Beach 站先, 想睇吓日落黃昏,

如果喜歡游泳嘅人, 真係要去多一日聖淘沙, 因為島上仲有好多嘢睇...蝴蝶公園、昆蟲皇國博物館、海底世界、海豚樂園...等等.

而我哋實在唔夠時間睇, 又係要急急腳地走去搭免費聖淘沙快速, 去Imbain 站嘅"魚尾獅塔"The Merlion Tower. 嘩~比起五年前...真係變咗好多, 以前係一條馬路, 現在已經係一個公園.

行完後, 再坐免費聖淘沙快速...返去環球影城, 然後再去返停車場坐免費巴士.

(此巴士僅供外國遊客乘搭, 上車時要出示護照及新加坡入境卡. )

今次坐去烏節路 Orchard road 間文華酒店 Mandarin Orchard 落, 因為想去行吓, 然後再去食飯, 

http://www.rwsentosa.com/LinkClick.aspx?fileticket=dnX4egSlUT0%3d&tabid=962&mid=8113&language=en-US

行行吓...大家都攞住本旅遊書開始搵嘢食嘅時候, 突然有位後生仔( Wilson )走嚟, 問有冇嘢需要幫手!? 知道我哋想搵嘢食, 佢就問我哋跟唔跟佢去一個當地人去食嘅熟食中心, 佢話價錢一定平過紐頓熟食中心 Newton Circus Hawker Centre, 因為係當地人去食嘅地方, 點都平過旅遊區.

而佢爸爸已到該處等佢一齊食飯, 最後我哋就跟佢去 Somerset (NS23)站, 坐 MRT去 Dakota(CC8)站嘅 Old Airport Road 個熟食中心食嘢, 佢仲請我哋食炒蘿蔔糕.

而我哋都食咗好多嘢, 有SD$0.5一串嘅串燒, 好多人買...要等好耐.

最後仲食埋豆腐花, 好似維他奶味, 口感好軟好滑.

食飽後, 坐MRT去濱海中心Esplanade(CC3), 行去酒店都好方便. 返到酒店已經12點. 

第三天)

因為前一晚實在玩得太攰...原本約咗佢哋8:00食早餐, 點知瞓到8點...食埋早餐, 10點鐘出發去小印度Little India (NE7)

經過 Sri Veeramakaliamman Temple 維拉瑪卡里雅曼印度廟...

Tekka Centre 竹腳中心, 係小印度區最旺嘅商場, 有好多印度嘢食...


旁邊公屋嘅電梯都幾特別, 要上去一D都唔困難, 又無閘又冇保安, 又一證明新加坡治安好好. 





由上面25樓可以望到小印度區嘅屋頂設計, 仲可以望到遠處嘅金沙酒店...

離開小印度後, 搭MRT去"牛車水"China Town (NE4)

見到一間Hotel 81...

Sri Mariamman Temple 馬里安曼印度廟,





牛車水兩旁有好多藥房,  大部份都有賣新加坡出名嘅千里追風油!

沿途見到佛牙寺龍華院 Buddha Tooth Relic Temple & Museum, 對面就係Maxwell Food Centre 麥士威路嘅熟食中心, 原來這個熟食中心會於2012年9月29日關閉, 進行維修與重新粉刷工程至11月30日.

好彩我哋9月26日去到, 所以仲可以食到"天天海南雞飯", 這間曾被 MAKANSUTRA 美食評鑑"三碗三筷"最高等級, 更被新加坡旅遊局選為"三大雞飯"之一,

去到當然跟書介紹四個人要一隻雞+4碗大油飯, 兩個人要半隻雞+2兩碗大油飯. (一隻雞SD$24, 半隻雞SD$12, 大油飯6碗SD$4.2) 而我個人就覺得一般...雞無香味, 最好食嘅, 竟然係伴碟嘅脆青瓜.

食完飯, 當然食甜品啦...哈哈~又係豆腐花, 今次這間係香港人開嘅...特別啱食, 比較有口感, 所以超多人買, 特別係原味豆腐花...正!!!

然後行過對面佛牙寺龍華院, 裡面金碧輝煌, 值得參觀! 
  

沿途見到一個可愛小女孩...

離開牛車水之前, 當然係去"林志源"買手信啦!

行行吓, 已經5:30, 大家又開始急急腳地趕去搭MRT, 目的地係"濱海灣金沙酒店".

而我哋跟住旅遊書嘅指引, 搭到去濱海灣 Marina Bay (NS27), 唉~原來係錯嘅, 又要轉多次車去正確嘅海灣舫地鐵站 (Bayfront MRT station) (CE2), 出口 B、C、D、E都可以直入到金沙商場及賭場, 

因為已近黃昏時份...我哋又再急急腳地行上濱海灣金沙酒店第三大廈(Tower 3)購買濱海灣金沙空中花園Sands SkyPark®參觀門票.

價格：

全票 S$20

半票 S$14（2 – 12 歲）

敬老票 S$17（年滿 65 歲以上）

未滿 2 歲的兒童可免費入場。

可為最早一個月前的指定日期購票。

同天入場門票只可在濱海灣金沙售票處購得。

請注意門票銷售規定，購票後恕無法更換或退費。

原來用 American Express 買門票有優惠.

全額購買一張 Sands SkyPark® 門票, 第二張以後的門票可獲得25%折扣（最多 8 張門票，含全額購買的第一張門票）
(好彩我哋有帶AE card, 即一張原價 SG$20, 四張25%優惠, 各SG$15, 一張長者SG$12.75)

哎呀~早知唔睇書啦...應該一早要睇金沙網址...就可以睇到以下資料~

http://hk.marinabaysands.com/Sands-SkyPark/Tickets/

濱海灣金沙售票處：

1)  藝術科學博物館大廳

2)  飯店 1 號塔樓大廳，禮賓服務櫃檯

3)  飯店 3 號塔樓大廳，禮賓服務櫃檯

4)  購物區禮賓服務，購物商城 L1

5)  金沙空中花園售票櫃台，3 號塔樓 B1

6)  劇院，購物商城 B1

入口：飯店 3 號塔樓外（上下車處）

持票者可進入金沙空中花園公共觀景台欣賞美景。（很抱歉，無邊際游泳池僅供濱海灣金沙住房賓客使用。）

為了確保所有賓客的舒適與安全，限制每次參觀人數。門票適用於上午 9:30 到晚上 10:00（星期五、六、日則到晚上 11:00）單次入園。住房賓客停留時間則沒有限制。

這個150公尺長的無邊際游泳池, 只限酒店客人使用.

一般持票公眾只能欣賞它的獨特設計, 不能享受懸空游泳的感覺.

留意每日三次免費導覽解說, 每次限 50 位賓客, 於每日上午 9:30 開始報名, 先到先報名. (只接受當日報名）

最可惜嘅係我哋去到想參加免費導覽解說嘅時候...職員就話一早已經FULL咗...想參加一定要一早9:30去到排隊, 萬一10:00場嘅 FULL 咗, 都可以即時報埋另外兩場時間, 總之一定要係即日報名. 而我哋因時間關係, 如果第二日再去排隊, 實在好趕, 最後, 決定放棄睇泳池, 寧願睇黃昏. 

原來上到去可以無時間限制地逗留至晚上10點, 雖然可以帶腳架上去, 不過就唔可以用腳架, 點知天氣唔好, 睇唔到日落, 唯有等睇鐳射表演, 

哈哈~俾咗錢上去, 緊係要企耐D啦...等到天都黑晒, 最可惜係...唔俾開腳架, 真係好難影相呀~

離地200公尺嘅濱海灣金沙空中花園, 一望無際嘅夜景...

睇完鐳射燈光表演後, 就去金沙賭場參觀, 入到去可以任飲樽裝水、美綠、黑白咖啡...等等.
而一向唔賭錢嘅我, 入到去飲咗支水和一杯美綠, 就已經好開心啦~

入賭場唔可以攜帶大袋和相機袋...等等. 不過可以寄存於櫃檯, 遊客出入都需出示護照.

參觀完賭場, 我哋準備去食嘢之際, 竟然又開始另一時段, 由雷射光、LED 燈、投影機及巨型水流螢幕交織出視覺特效的令人興奮且免費嘅活動, Wonder Full 水舞秀.

Wonder Full 水舞秀於晚上演出, 表演長度 15 分鐘.

星期日至星期四：晚上 8:00～9:30

星期五、星期六：晚上 8:00、9:30、11:00 

睇完水舞秀後, 竟然又睇到另一個好特別嘅大旋渦Ned Kahn 的「Rain Oculus（雨之窗）」是一個直徑 22 公尺的壓克力纖維製碟形巨碗, 放置在一個 90公噸重的鋼結構上. 從底層的洞中所釋放的水會形成漩渦，再流洩至相隔二層樓的水道中。企係上面睇, 真係好震撼!

所謂逆向噴泉, 經過下面, 原來係咁樣流水落嚟嘅~

途經水晶閣嘅LV專門店, 又幾靚喎!
夜晚9:30大家都行入去商場搵Food Count, 準備食晚飯...

食完晚餐後, 決定由金沙經螺旋橋, 全長280公尺, 慢步行返去Grand Park City Hall...都要半個鐘...返到酒店又12點幾啦...哈哈~大家都好攰...估唔到3晚都玩到咁夜...

第四天)

天氣好好, 有藍天白雲, 大家慢慢食完個早餐後, 再上房攞行李, check out 後, 暫放行李於酒店大堂行李部, 然後出發去行商場, 因為真係好熱, 仲好曬, 後來又行去金沙, 因為前一晚都無認真地行過商場睇嘢, 須便又可以影吓相...

  

4點鐘返酒店攞行李, 然後行去搭MRT, 估唔到要打開所有行李俾地鐵職員檢查...去到丹那美拉 Tanah Merah (EW4), 等轉去樟宜機場Changi (CG2) 嘅車, 又係估唔到要等成10分鐘, 最後去到機場已經5點鐘, 朋友去到Terminal 1, 即刻跑去買新加坡 Bengawan Solo班蘭蛋糕, 因為驚會賣晒, 好彩係貨源充足, 買完之後...又跑去CX國泰櫃檯辦理行李寄艙手續, 今次真係好好彩我哋一早已經於網上預辦咗登機手續, 否則...(至於班蘭蛋糕就手提上機, 不用寄艙)









搭乘CX756 晚上18:25起飛, 去到香港22:10, 因為行李輸送帶發生故障, 所以遲咗少少, 返到屋企已經零晨一點, 勁眼瞓, 不過都忍唔住要食咗Bengawan Solo班蘭蛋糕, 先至捨得去瞓.

總結:
新加坡自由行, 好玩到唔想返香港, 除咗交通方便, 暫時去過嘅MRT 站, 個個站都有洗手間, 治安又好, 適合男女老幼去玩嘅好地方. 四天自由行實在比較趕, 如果五天四晚, 就會比較輕鬆.