玫瑰痤瘡、濕疹及敏感皮膚(一)

2007年突然皮膚變得極度敏感，原來係玫瑰痤瘡，所有之前用開嘅護膚及化妝品，全部都唔用得，一用就敏感，後來仲出埋濕疹，真係唔明點解會出現咁多問題!?

亦都睇過幾位皮膚專科醫生，食咗好多抗生素...食到我都怕怕，因為有時會引起頭暈及出紅疹...等等嘅副作用。

之後改去上環東華醫院, 睇 (姓劉) 中醫皮膚專科, 點知...攪到我媽好唔得閒, 因為佢要幫手煲中藥, 一劑中藥要分三次唔同方法煲, 真係要用好多心機! 好彩連續飲咗5星期中藥後, 濕疹皮膚有所改善, 劉醫師便沒有再叫我去覆診了...

雖然皮膚有所改善, 但始終會因天氣及免疫力下降...再度變差, 所以皮膚敏感及有濕疹嘅人, 一定要保護皮膚, 以免乾燥!
曾經有一位出名嘅皮膚專科醫生, 經常都會推薦用A膏沖涼(Aqueous Cream), 建議用E膏潤膚(豬油膏)潤膚, 而我試過一段時間, 皮膚反而比之前敏感, 所以唔敢再用!

後來改用咗Christo Silicone Cream 搽身, 手腳皮膚比之前好咗, 冇咁容易出濕疹, 可惜始終都係化學嘢, 最後皮膚都係再度敏感, 所以之後唔敢再用!

後來改用咗天然嘅甘油 (藥房有好多唔同牌子嘅甘油), 我已經試過幾隻唔同牌子嘅甘油, 全部都可以用, 完全唔會敏感! 保濕效果比椰子油好好多!!
經過一段時間後, 皮膚真係好咗好多, 亦無再咁敏感, 而且價錢又平又安全, 濕疹及敏感皮膚都啱用! 只需沖完涼, 抹乾身後, 隨即用甘油再加少少水搽身便可!

至於塊面就經常敏感, 睇咗幾位皮膚醫生, 都話係濕疹, 搽咗藥都都冇好過, 仲變差咗! 範圍仲越變越大! 好彩最後遇到一位皮膚西醫, 佢話唔係濕疹, 仲話我搽錯藥, 引致皮膚嚴重發炎, 後來用咗佢開嘅藥膏, 以及食咗一個月嘅抗生素, 最後終於好咗. 

至於皮膚敏感、濕疹及玫瑰痤瘡...都係無法根治, 只有避免敏感源頭!
早晚我會用 Aquanil Cleanser 洗面, 然後搽保濕, 冬天可以搽 PHYSIOGEL Intensive Cream, 夏天太熱, 會改搽 PHYSIOGEL Lotion.

而PHYSIOGEL AI cream 及 Cera Ve moisturizing cream 我都用過, 亦都可以保濕, 前者較適合一般敏感皮膚用, 但對玫瑰痤瘡皮膚就不太有用, 反而後者就好適合玫瑰痤瘡皮膚用.

沖涼就用 Sativa 5.5 soap free body wash, 用過一段時間, 後來轉用了Oatmeal body wash 膚潤康, 因為萬寧有得賣, 比較方便! 而價錢亦差不多, 最重要係證明到兩個牌子都係價錢合理, 適合濕疹及極度敏感皮膚嘅人士使用!

另一推介俾啲手腳濕疹或主婦手(手癬)而又搽過好多西藥都唔好嘅苦主, 建議可以用濕疹清浸洗, 照跟盒上說明使用方法, 一定可以好返, 因為我之前拆舊膠袋, 而引致其中一隻手指發炎, 搽咗好多含類固醇嘅藥膏都唔得, 最後仲傳染到五隻手指, 相當辛苦...有一日睇到報紙廣告, 就買返去試下, 點知用咗一星期就好返哂, 好彩係一隻手, 否則就比較麻煩, 因為此藥需要配合熱開水, 唔夠熱又要再整熱...所以唔係好啱無耐性嘅人用.

至於飲食方面, 一定唔好食太熱太凍嘅嘢, 熱氣嘢唔可以食, 玫瑰痤瘡唔可以曬太陽, 人多焗嘅地方, 唔好企太耐, 萬一皮膚出現敏感, 唔好成日照鏡, 以免心情唔好, 盡量放鬆心情, 好快就會好返, 雖然無得斷尾, 不過只要自己多留心及注意平時生活習慣, 從而自我改善, 總之點都好過成日睇西醫, 搽藥膏及食西藥, 而我另一個減壓嘅方法...哈哈~就係唱歌.


玫瑰痤瘡千萬不可搽煩固醇, 否則就會手尾長, 以下係我2016年嘅慘痛經驗...

玫瑰痤瘡、濕疹及敏感皮膚(二)