婦女健康服務

當覺得日子過得越來越快嘅時候，自己亦開始越來越注重健康，亦好想每年可以定期做下婦科檢查，而咁啱俾我見到衛生署有個專為25至64歲婦女提供嘅婦女健康服務。

年費$310，服務範圍：

【健康評估】

1) 病歷查詢、健康風險評估

2) 量度血壓、體重、腰圍和高度

3) 病歷查詢、健康風險評估

4) 乳房和婦科檢查

5) 子宮頸普查及其他檢驗(視情況而定)

【健康教育及輔導】

推廣健康生活模式、關注乳房健康、骨質疏鬆和癌症的預防，及按個別需要提供適切的輔導。如有需要，醫生會安排專科轉介。

提供此服務嘅有衛生署轄下三間婦女健康中心及十間母嬰健康院。

因住東區，所以就致電柴灣婦女健康中心預約做檢查。搭82或682巴士，於康民街落車，行過一條街口，就見到間健康中心，方便過搭地鐵好多。

電梯上到二樓，就已經有職員指示我去登記處登記，估唔到成間健康院嘅職員，個個都好親切及有禮貌，包括清潔姐姐。

由登記至完成整個婦科健康檢查，大約只需要一個小時。走之前仲有本手冊送俾我，內有今次身體檢查嘅記錄。

至於子宮普查結果，正常無問題，大約等兩至三個月就會收到郵寄結果，如果萬一有問題，會好快收到健康院嘅通知。

總結：睇到身邊有3個女同事，因乳癌入院，好彩佢哋都發現得早，最後都可以抗癌成功。所以如果無參加任何婦女健康檢查服務嘅朋友們，我誠意推介此服務。為自己、為家人，更加要懂得重視自己嘅健康，有健康，人都會靚啲！