台北自由行4天

因為塊面嘅玫瑰痤瘡，已有一年多無出外旅行，經過一年嘅中藥調理後，終於可以嘗試先去較近及交通方便嘅台北自由行四天三夜。

首先上網申請台證，繼而揀咗自己喜愛嘅來回航班時間，然後再上網慢慢揀酒店，攞住自己所揀嘅航班及酒店去格價，估唔到今次竟然會係專業旅運收費較平，機票可以累積飛行里數於亞洲萬里通戶口內，所以我就即時付款。至於買旅遊保險，今次我就上網揀咗豐隆保險。

於出發前兩個星期內，我就帶埋電子機票及酒店訂房記錄去尖沙咀新港中心二座十樓台北觀光社攞旅遊贈品，一卡通(內有$50新台幣值)，方便搭車。

仲有就係驚去到台北機場買上網卡要排隊等好耐，所以臨出發前一晚，買咗張台灣5天無限4G上網卡，去門市度買仲可以有5%折扣，折實HK$65。

3月21日(第一天)
早上同朋友搭香港機場快綫，10：00去到香港機場，辦理自助行李託運後，

就入閘去Plaza Premium Lounge 慢慢食個早餐，之後乘坐國泰CX406，12點準時起飛，去台北桃園機場1點40分，過關時非常方便，只需出示特區護照及台證一張，

落機隨即換上香港買嘅台灣4G無限量數據上網卡，可惜搞咗好耐都係用唔到，唯有用機場wifi 嚟上網whatsapp要求技術支援，到最後都係搞唔掂，店主亦承諾回港後可全數退還，而我都唔想再浪費時間搞手機，(最奇怪係去到第二晚張卡突然通咗可以上到網，真係唔知係我手機有問題，亦或個台有問題)早知就去到台灣機場才買，因為機場內有好多間電訊公司，價錢亦唔貴，最主要都唔使點排隊，而且一定用得到，相對仲慳時間。

攞行李後，就於機場內換台幣，又一證明香港百年嘅兌換率較台灣機場好!
(以21號為例：台灣機場HK$1=NT$3.766，再加手續費NT$30，而香港百年就HK$1=NT$3.861，無需手續費) 只可惜我係香港時，一直都唔得閒去換。

之後行到機場捷運入閘前，先攞張一卡通增值咗NT$100先，由機場捷運坐直通車線，只需三個站，大約半個鐘就去到台北站，車費只需NT$80，因首月通車有5折優惠，真係相當抵坐！！

然後再轉坐捷運去淡水線嘅北投站，再轉新北投捷運，

列車內有溫泉木桶車廂及森林車廂，感覺好有特色。

而今次唔再住春天溫泉酒店嘅原因係想更加方便坐捷運，唔需要再坐接駁車，所以選擇第一晚就去住漾館時尚溫泉 AquaBella Hotel，不過呢間酒店，快徑要由新北投站出咗閘後，沿右手邊過馬路後，張相指住嘅樓梯上去，直行轉右手邊就會見到，唔使五分鐘就到，唯一唔方便嘅就係行李要手拎上/落樓梯，其他都好滿意，全館採用負離子新鮮空氣系統，房內溫泉嘅白磺湯池仲大過春天溫泉酒店，入住時間就比較晏，要5點(不過都無影響，因為都要去行街)，漾館位於住宅區，環境寧靜，只需行幾分鐘就到北投街市及捷運站，網上評價都好高，所以入住嘅大部份都係年青人。

當酒店check in 擺低行李後，就落去附近行下，附近有北投溫泉博物館、圖書館、露天溫泉，順便睇下附近有邊間溫泉酒店比較適合一家大細入住，最緊要交通方便，個人覺得北投日勝生加賀屋(上面張相果間)係唔錯嘅選擇。

然後於捷運站附近間24小吃店食台菜(二樓夠大，好坐好多)。

之後坐捷運去士林夜市，最多人排隊買嘅就係豪大大雞排，真係佩服啲人可以食咁大件嘅炸雞，如果換咗係我，食咗肯定唔掂！

大約九點鐘，由劍潭站搭捷運返新北投站，夜晚都係行樓梯上酒店比較快捷方便，

返到房就可以食酒店送嚟嘅消夜湯丸及生果。

之後煲水，沖中藥及攞兩腳扁平頭插蘇充電。

3月22日(第二天)
朝早九點於酒店食早餐，款式及味道都算唔錯，而且職員嘅服務態度非常好，感覺好親切好舒服，真係性價比高嘅酒店！

食完早餐大約十點半就離開北投，坐捷運途經見到位於劍潭站嘅士林臨時市場舊址，依家起緊台北表演藝術中心。

搭捷運去西門站4號出口，沿路直行就會見到好多箭咀指示牌，唔使兩分鐘，又唔使驚落雨，就到咗將要住兩晚嘅德立莊酒店 Hotel Midtown Richardson ，首先上5樓辦理咗check in及寄存行李(因未夠鐘攞房)，

然後就搭捷運去南京復興站嘅兄弟大飯店會合台北朋友一齊食晏，趁未夠鐘，就係附近行咗一陣，見到間東方文華酒店，

準時12：30返到兄弟大飯店內嘅蘭花廳同朋友食台菜，

味道真係好好，特別係地瓜粥，食完仲可以免費再加。

食飽後，提早將第三日嘅行程改於第二日進行，原因睇天氣報告講，第三日將會全台落雨，

所以一食完晏，兩點左右就坐捷運去台北車話轉搭火車去瑞芳(早知就唔買車票，用一卡通仲平啲)

大約一個鐘到瑞芳站，再買平溪線、深澳雙支線(海科館至菁桐)一日票(NT$80)，可以沿途去好多熱門景點，猴硐、三貂嶺、大華、十分、望古、嶺腳、平溪、菁桐站，無限次上落火車，不過每一班車嘅時間都可能要隔好耐，所以要玩，就一定要一朝早出發，仲可以去埋九份，玩足一日，只不過今次因為驚落雨，但又一早約咗朋友食飯，只好食飯後出發，所以得半日時間，真係唔夠！！

時間緊迫，無辦法去哂沿線咁多站，今次第一站就於十分站落車，

參觀靜安吊橋，

沿路兩旁相當熱鬧，好多人放天燈，

而我哋都加快腳步去十分瀑布，可惜去到附近見到個牌寫明開放時間到4：30，唯有走去問人，原來依家仲係當冬令時間，如果夏令時間就收5：30，

即係今次無得入去睇啦，唯有隨緣啦!



然後再行返去睇放天燈，

當火車慢慢駛入站時，兩旁嘅遊客(包括我)都表現得好興奮，大家都攞起手機影相，

然後搭火車去平溪，估唔到平溪已變得冷清清，

而天都開始黑，所以就等火車返瑞芳，一到瑞芳站，遊客都迫埋一齊買車票，而今次我哋就係入口處拍一卡通，

搭火車去台北站，再轉捷運去西門站，

返酒店五樓攞行李及匙卡，拍卡上電梯到八樓間房之後，第一時間就睇下無窗嘅房係點樣嘅，因為預咗早出晚歸，所以我訂嘅係無窗房，價錢又平啲，點知都唔錯，原來無窗嘅意思係望唔到街景，房內都有個窗只可望到其他房嘅窗，而有好多人未瞓嘅時候都會拉開窗簾，望出去見到好多後生仔女好開心地係房內跳舞，玩及大笑嘅情景，都幾得意，比起望街景，更有旅遊輕鬆嘅感覺。

擺抵行李及背囊後，就攞埋把遮出去，因為已經開始落雨，我哋就行去對面馬路嘅西門町食嘢，當然唔少得嘅就係阿忠麵線，當晚因落雨關係，西門町都變得好冷清，

然後再係附近食台菜後，就返酒店休息啦。

3月23日(第三天)
第三日真係瞓得好晏，大約十一點至落去早餐，揀咗附近間三味香食蒸花素菜包、麻醬麵及菜肉大餛飩，味道唔錯!

然後再返去酒店攞相機，坐捷運去睇杜鵑花，去到大同森林公園站內，心情就好興奮，

以為會有好多花睇，點知上到公園，行咗一大個圈，都只係見到好少嘅杜鵑花，花仲少過香港維園嘅花卉展，

所以逗留好少時間，就坐捷運去101站，一出站枱頭就望到101，

雖然唔會係101內買嘢，但點都要上去行一個圈，上到5樓嘅觀景台購票處，睇到同其他地區最大分別嘅就係，呢個景點原來最多嘅就係大陸遊客，而今次我哋就無上去啦觀景台啦，原因十年前都上過去，以下呢張就係當年用A80數碼相機影嘅相，

之後就去附近嘅信義區，途經政府大樓及台北探索館，上去參觀咗一陣，

就行去誠品旗艦店B1食午餐，

之後再係附近新光三越、微風廣場行下hea下，

大約五點，就坐捷運去中正堂站，影下相，順便睇下牌樓和以前有咩分別，可惜天開始黑，天色亦唔靚，所以影嘅中正紀念堂都唔夠靚，上面那張係以前影嘅，下面點影都睇唔出係白色，

紀念堂內仲有國立戲劇院、國立音樂廳、藝文廣場及自由廣場牌坊(即舊嘅：大中至正)

之後再坐捷運去到台北站落車，行去三越後面間光南大批發，由側邊搭電梯上去，然後經店內樓梯行落去，三層分別有化妝品、身體護理用品、食品、文具、CD、雜誌、小家電...等等(有啲似香港12蚊店)，之後順道係附近食晚餐，我揀咗間馨記桐花小吃，而我就食佢招牌客家湯圓，真係好後悔，唔好食，冬瓜荼又超甜，以後一定唔會再食!

然後再坐一個站返到酒店，擺抵背囊後，就行去西門町行下及食小食，因為今晚無落雨，所以西門町好多小食車檔都出咗嚟，夜晚嘅遊人亦明顯多過昨晚好多好多，

行到大約11點，就返酒店休息啦，因為都已經夜啦，所以望出窗外，見到好多人都瞓咗啦！

3月24日(第四天)
第四日朝早，經過蜂大咖啡，真係好多人，因以前飲過，而我又唔識分好唔好飲，所以今次都無再入去。

反而去咗附近一間王記府城肉粽，食咗個麵線、蒸粉粿及肉粽，嘩～估唔到幾啱我口味，難怪日本旅遊書都有推介。



然後搭捷運去淡水，車廂見到個宣傳圖案，同近來港鐵一樣嘅，入車廂放低背囊。

出閘後，估唔到淡水熱到我唔想行，好曬，有啲驚玫瑰會走出嚟。

行車站附近嘅商店街都要開住把遮，

食咗個超抵又好食嘅豆沙餅NT$10，唔食好似對唔住自己咁。







然後就去搭淡水汽車客運去天元宮賞櫻專車，不停站，所以大約15分鐘就去到天元宮，最好惜係今年花期比以往遲咗，大家都估到嘅，雖然我已經知道只係開咗好少，少到幾乎睇唔到，但係趁有專車，而且車費只需NT$15，點都上去睇下，起碼以後都識得再去。

一個鐘後，我哋坐返專車去淡水捷運站，

坐捷運返酒店附近間遠東百貨地庫食午餐，我叫個小南門嘅燥肉飯、白苦瓜排骨湯、菠菜套餐，再加個糖水，嘩，好味過昨晚個晚餐好多，又抵又好食。

可能呢四日天氣變化好大，加上好多人感冒咳嗽，我都開始喉嚨痛，趁仲有時間，返上去酒店五樓休息咗一陣，自己沖咗幾杯茶飲，最後好彩好咗好多。

大約5：30落去攞返行李，再搭捷運去到台北站，轉機場捷運去機場，7點鐘去到，睇埋個寄艙行李經過X光機檢查無問題後，就可以入閘過海關。

登機前去Plaza Premium Lounge 食晚餐，真係好味過香港好多，而且無咁多人，大約8：40登機，搭國泰CX483，9點15分班機，回到香港11點左右，時間啱啱好，返到屋企就可以瞓覺啦。

總結：去台北旅遊，交通方便、物價較香港低，而且台灣人又有禮貌，四日真係唔夠玩，不過夠近，所以可以分幾次去唔同嘅地區玩。