玫瑰痤瘡、濕疹及敏感皮膚(三)

時間真係過得好快好快，呢一年內實在有好多睇過『玫瑰痤瘡、濕疹及敏感皮膚(二)』嘅玫友(玫瑰痤瘡嘅朋友)傾過偈，而大部份嘅問題都係一樣，最多人問嘅問題：

1) 問我最近情況如何？

答：我現時嘅情況穩定，不過偶然都會出一兩粒瘡，無固定位置，不過唔搞佢，過幾日都會消失，如果忍唔住搞佢，就一定好耐都唔會好。至於有時出嘅較大粒嘅瘡，好痕，好驚會變大粒嘅石頭瘡，而我就試過用碘酒滴落棉花棒度，然後才搽落瘡嘅位置，第二日就會有膿頭走出嚟(一定唔會用手搞粒瘡)，由得佢第三日就會開始收細唔痕，不過一定要好小心，千祈唔好俾碘酒整到眼！！

2) 仲有無睇中醫？

答： 有，雖然可以唔去，不過我都仍會一個月去一至兩次東區醫院搵李醫師覆診，當調理身體。等天氣轉涼後，我會開始停藥，到時再分享完全停藥後嘅情況。

3) 點解中醫寫病名唔係寫[玫瑰痤瘡]，而係寫[面游風病]?

答：因為中醫學上是沒有[玫瑰痤瘡]，大部份皮膚病中醫學名都係[游風病]。

4) 點解今年夏天塊面特別易紅及出瘡？

答：因為今年八月特別多颱風，而大部份嘅玫友都對天氣及空氣嘅轉變而皮膚變得敏感，甚至出瘡。

5) 睇咗幾次中醫，點解都仲未好？

答： 睇中醫一定要俾耐性，慢慢醫治及調理，一定唔可以諗住食一兩個禮拜就會好返，一般情況至少都要一兩個月才會見效用。

6) 平時需要戒口嗎？

答：一定要戒口，牛、鵝、蝦、薑、蔥、蒜、甜品、汽水、咖啡、奶茶、酒等等都要戒，煎炸焗盡量少食，最好食蒸煮。仲要煮熟後唔好即刻食，要等無咁熱，最好微暖才食，冰凍嘅嘢都唔好食。

7) 可以做運動嗎？

答：可以，我每星期都會係冷氣房內做個半鐘嘅瑜伽，並且每日食晏後都會去商場逛半小時。

8) 平時用咩清潔護膚品及化妝品？

答：因我皮膚特別容易敏感，所以已無再用化妝品。至於平時洗面仍用緊CeraVe Hydrating Cleanser 及 Moisturizing Lotion作保濕，用緊嘅無敏感就唔需要轉其他，因為成日轉用唔同嘅牌子，反而仲會令皮膚難適應及更易敏感。

買唔到CeraVe Hydrating Cleanser嘅玫友們，我會建議去藥房買Aquanil Cleanser。

9) 有無用防曬搽面？

答：因我皮膚特別容易敏感，所以無搽任何防曬乳，唯有每日都戴把縮骨遮出街，用嚟遮太陽，當然如果太曬就最好唔好出外，盡量留係有冷氣嘅地方啦。

10) 對付玫瑰痤瘡，彩光及激光有無用？

答： 我未試過，所以亦唔知有無用，不過聽過好多玫友講，開頭都幾見效，不過過一段時間後，玫瑰又再出現返，所以想做嘅朋友可能要再問多啲試過嘅玫友啦。

11) Wechat是否有玫友群組？

答：我Anita暫時都無開任何有關玫瑰痤瘡嘅群組，如果玫友有嘢想問，歡迎留言，而我唔開群組嘅原因係唔想有人扮玫友入群組做推銷，利用玫友嘅無助心情而搵錢！

12) 情況穩定後，可以唔需要再戒口？

答：情況穩定後，依然需要戒口，所有容易令塊面紅嘅源頭都要繼續避開，否則都係會再見到玫瑰！

13) 可否分享藥方？

答：雖然病徵一樣，但係因每個人嘅體質都唔同，所以唔好意思，我係唔會公開藥方，希望大家可以體諒！

14) 塊面好熱，是否要立即洗面降溫？

答：每日最好只係早晚各洗一次面，唔好一熱就洗，否則好易乾，而引致濕疹或敏感。

15) 可否又食中藥又食西藥？

答： 我個人就唔贊成咁做，除非兩位中西醫都覺得有此需要。

16) 以前啲濕疹仲有冇再發？

答： 暫時都無，以前容易出濕疹嘅位置，每次沖涼後都一定會用甘油保濕，仲有沖涼唔好沖太熱嘅水，而且唔好沖太耐，咁就無咁易再見到濕疹嘅出現啦。

17) 點解成日會眼紅及眼臉有油脂分泌？

答： 玫友眼睛會比一般人容易乾及紅，所以要滴滋潤眼水，至於眼臉位置的確比一般人多油脂分泌，建議每日用沾濕(蒸餾水或暖水)嘅化妝棉抺眼臉，可以抺走眼睫毛上嘅塵及眼臉油脂，大大減低眼部發炎嘅機會。

18) 如果睇中醫需要留意啲咩？

答：以下係我於睇中醫等攞藥時睇到嘅“看中醫需知八則”

[1] 就診前不要化妝

[2] 就診前不要吃會染苔的食物

[3] 就診前不要清理舌苔

[4] 不要剛吃完飯立即就診

[5] 就診前應該先休息片刻

[6] 不要頻密繁的換中醫

[7] 禁止自行添加藥材於藥方中

[8] 於中藥療程中飲食宜清淡

總結：
玫瑰痤瘡係唔會影響身體健康嘅，患者行得、食得、瞓得…，比起瞓係醫院嘅好多病人已經算係好幸福，所以唔好傷心及灰心，覺得自己好慘成日唔敢見人，每次照鏡都會喊嘅玫友們，我都會建議唔好成日照鏡，一定要放鬆心情，唔好成日唔敢見人而唔出街，一定要多啲走動，行下商場，最介意塊面嘅永遠都只係自己，其他人見到都唔會有任何反應，所以想快啲脫離玫瑰，自己才是最主要嘅主診醫生！記住所有引致面紅嘅源頭，都要避開及記住戒口等，睇緊中醫嘅一定要有耐性，唔好成日轉醫師，咁先至可以快啲脫離玫瑰！亦唔好成日轉護膚品，小心一啲不實嘅傳銷員，以免浪費金錢！才可以完全擊退玫瑰，希望玫友們加油！

玫瑰痤瘡、濕疹及敏感皮膚(四）