玫瑰痤瘡、濕疹及敏感皮膚(四）

 （2020年2月至8月）

知道有疫症後，差唔多日日都戴住口罩超過10小時，起初話要戴口罩嘅時候，真係好擔心，因為玫友一向都係好怕戴口罩焗住塊面，又怕會敏感，又怕會出玫瑰痤瘡。好彩暫時都無乜問題，亦證明5年前兩位中醫師所講嘅是對的，當時佢哋都有講過玫友經中藥醫治過，就算再復發，都可以好快好返，一定唔會好似以前咁嚴重。

而抗疫期間，間中都會係屋企飲下媽咪煲嘅涼茶，主要都係清熱潤肺及預防感冒。而我哋屋企人都好齊心抗疫，完全不敢鬆懈，由今年2月至今，所有親友嘅生日聚餐全部都取消。

放假只好乖乖地留係屋企，上下網，聽下歌，坐多咗，所以個肚腩都大咗。就諗起4年前李醫師有同我講過，叫我要做下運動，但我一直都好怕出汗，怕太熱會影響到到塊面嘅微絲血管，所以就算平時返瑜伽班，都係做啲簡單伸展嘅式子，加上班房又有冷氣，所以唔會覺得熱，不過呢半年疫情關係，瑜伽班暫停，成個人都肥咗，於是就係屋企睇 YouTube 跟住做下運動，做半個鐘已經可以出一身汗，人都舒服好多。

做完運動，就要即刻抹乾汗水，飲返杯水，休息下，沖涼後我都會即搽甘油保濕，咁個身就唔會起濕疹啦，而甘油我會去藥房買，一支都只係$18-20，好用過椰子油好多，冬季用嘅時候都好方便。

而平時返工食完午飯後，我都會係公司附近嘅公園散下步，行下樓梯，當做運動。

早晚洗完面，都會搽保濕，咁就無咁容易敏感。而我依然都仲係用緊 CeraVe Hydrating cleanser 洗面，夏季就用 CeraVe Moisturizing lotion 搽面保濕。

仲有每日至少兩次，用化妝棉濕蒸餾水嚟清潔眼簾，因為戴口罩嘅時候，呼出嚟嘅氣，好多時都會蒸咗上眼，出現眼痕或眼乾等症狀，甚至令到眼簾容易紅腫發炎。

於是買咗一盒 Blink lid-clean 冰藍潔眼棉，一張撕開做兩張，左右眼各用一小張，用嚟清潔眼簾，無需過水，好方便。自從用咗潔眼棉，連滋潤眼水都用少咗好多，最好係可以清潔埋眼簾嘅分泌物，而且可以令到刺痛乾燥嘅眼簾，即時感覺清爽。平時都會放幾包仔係手袋內，以備眼乾唔舒服時用。

當疫情爆第三波時，我真係好希望疫情快快消失，咁我就唔需要每晚再上網睇確診大廈名單，因為萬一自己住嘅大廈有人確診，咁第二朝就要通知公司，並需立即放3日無薪假，去做深喉唾液測試，證明係陰性至可以返工，收費差唔多一千蚊左右，聽聞都要等一星期至有結果，所以每晚睇大廈名單時都幾緊張架。

雖然最近確診數字少咗，不過大家都唔好鬆懈，要繼續戴口罩和勤洗手，期待疫情消失後，經濟可以快啲復甦， 大家可以繼續開開心心地出外旅遊。

而我差唔多兩年都無見過李醫師啦，有時都會拜託要去覆診嘅玫友，幫我向李醫師問好，多謝佢醫好我呢個玫友！記得佢幾年前同我講過，中秋就到，月餅最好就唔好食啦，就算食，都只可以食八分一個，而我今年未到中秋，有個朋友就已經送咗個白蓮蓉月餅俾我，點知今次忍唔到口，食咗四分一個，仲要成日都好夜瞓，第二日起身就出咗2粒瘡仔，好彩大約一星期就無事啦，以後都係要乖乖地，早啲瞓，食清淡啲，煎炸焗嘅嘅食物都係唔食就最好啦！

最後係度預祝所有玫友中秋節快樂﹑身體健康﹑生活愉快﹑大家加油！

玫瑰痤瘡、濕疹及敏感皮膚（五）