參觀啟德主場館

 

1月3日收到電郵，見到可以報名參觀啟德主場館內嘅各個角落，好奇心大嘅我，隨即報名參加。於1月13日，懷著興奮嘅心情出發去參觀。坐地鐵去到宋皇臺站（D出口）出站後向右方向直行，好快就進入啟德體育園區。

經西橋直達啟德主場館，啟德體育園座落於舊啟德機場嘅北停機坪，而西橋位置就係以前嘅13/31跑道範圍，原來係依照跑道方向而建，咁啱呢段期間經過，抬頭仲可以睇埋由國泰呈獻嘅「與啟德再度啟航」視聽體驗。

行到主埸館外圍，點都先行一圈，欣賞下周圍嘅建築後，準時2點鐘到達 F 閘口，由導賞員帶領下先去展覽廳聽啟德嘅歷史及故事。

然後就開始參觀啟德主場館嘅各個角落，行下唔同嘅樓層，首先去到520區，感受下最正中最高嘅位置景觀，抬頭可以望到高達4,800噸的可開合式頂蓋。

仲有世界頂級的球場空調系統，所有座位都有空調，輪椅區亦有空調及充電設施。

行到南看台位置，可以睇到玻璃幕牆，可以睇到維港海景，仲可以欣賞到先進靈活的舞台口設計，反起嘅位置係觀眾席。

去到3樓企業廂內參觀，包廂內嘅座椅比一般觀眾席嘅座椅係軟好多嘅。另外2樓嘅包廂，就無帶到我哋去睇喇，不過我係官網內就睇到2樓嘅包廂座位比起3樓仲更加舒適，肯定就更加貴。

然後去球員熱身室、更衣室及休息室參觀，又行入場地欣賞，因為就嚟開 Black Pink 演唱會，所以見唔到中央真草。

個半鐘嘅導賞團，點都行唔哂成個主場館，因為裏面真係好大好大，期間途經過酒吧區上層，睇到全亞洲最長嘅運動酒吧枱，亦由5樓行到後台，每層都設有多個男女及無障礙洗手間、育嬰室、水機及無障礙升降機等等，至於演唱會音響就由承辦商負責，啟德體育園只係負責提供租場服務。

總結：今次呢個導賞團，完全滿足到我嘅好奇心，亦好期待日後可以實施『實名制』買飛入場，杜絕炒賣，保障市民權益。