海南島儋州海花島自由行

 

難得12月可以放大假，好想帶媽出去旅行，而我又唔想去太遠、太凍、太熱及太多人嘅地方，於是我就揀咗去海南島儋州市排浦港與洋浦港之間嘅人工島，名為「海花島」，係由恒大耗資1600億打造而成，又被稱為「中國小廸拜」及「國際旅遊島」，今次因為係自由行，所以我都叫埋我妹一齊同行。

機票、酒店、旅遊保險、行程，全由我一人負責安排。於11月中計劃期間，我最擔心嘅就係當地天氣，最怕去到打風落雨，所以我拖到11月尾先至訂機票及訂酒店，之後再訂埋機場快線電子車票。

（12月5日）星期四

一朝早坐機鐵去機場，踏入機場心情好興奮，辦理完登機手續後，通過安檢及海關，就步行前往登機閘口，途中經過香港首間無人便利店，我妹就忍唔住拍信用卡進入店內，揀咗支飲品後，當離開店時，系統自動識別購買商品，並於信用卡扣數，如果想要單據，可以係門口左手邊部機按取單據，真係好先進及好方便。

之後再經過天際走廊，我哋3個都企咗係透明嘅步道欣賞飛機，感覺好特別，因時間關係，我哋只係逗留咗好短時間，連前方嘅機場展望台都無時間入去參觀。

今次乘搭海南航空，準時10：15起飛，由香港飛往海口，上到飛機就已經見到每個座位都有一袋小食及飲品，大約11：30就已經到咗海口美蘭機場。

因為自由行嘅關係，我哋3個步伐都放慢咗好多，慢慢行去過關入境，又慢慢行去美蘭高鐵站購買高鐵車票，因為唔趕時間，所以影出嚟嘅相，都唔會見到太多人。

到咗美蘭高鐵站，只需出示港澳居民來往內地通行證（俗稱：回鄉證）購買車票，可以用微信支付、支付寶、銀聯信用卡、雲閃付及現金付款。

唔想咁趕，所以我哋就揀咗乘搭13：03班車去白馬井站，車廂乾淨，座位舒適，遇到嘅所有職員都好有禮貌。

14：15準時到達白馬井站，然後又慢慢行到去旅遊中心，等坐15：30班免費接駁巴士去海花島歐堡酒店。

14：15準時到達白馬井站，然後又慢慢行到去旅遊中心，等坐15：30班免費接駁巴士去海花島歐堡酒店。

Check in 時，搵唔到張回鄉證，到上房後亦攞哂手袋內嘅嘢出嚟睇過，都搵唔到回鄉證，就搞到行程亂咗，酒店職員亦唔知道遊客可以點補辦證件程序，其中一個職員叫我打電話報警查詢，後來警察到咗酒店房，了解情況後，教我後日離開海花島去白馬井站，再搞報失，去到海口再補辦臨時證件。

當警察離開後，我哋擔心海口政府中心星期六﹑日休息，所以我哋決定縮減海花島行程。

於是第一晚我哋乘坐夜晚觀光小火車去教堂睇燈光表演，之後去商業街食嘢。

夜晚11點半，因酒店需要我補資料，而我妹係我手袋內包人民幣內，搵到我張回鄉證，原來我大意，離開高鐵站時，心急無睇清楚就將回鄉證攝錯咗落紙幣內。

搵到張回鄉證，我哋3個都可以安心瞓覺啦。

（12月6日）星期五

朝早8點半鐘，我哋就慢慢行落去酒店食早餐，因為訂嘅房，只包兩位早餐，所以我哋有一位就要俾人民幣￥128元，去到我哋見到室內好多人坐係度食早餐。

我哋見天氣好，所以我哋都揀坐室外，食早餐時又可以吸新鮮空氣，又可以慢慢嘆早晨，雖然話早餐分時段，不過我哋坐耐啲，職員都唔會趕，仲好有禮貌。

早餐後，慢慢行下酒店嘅商店，最啱我哋3個行嘅係超市，其他有游泳用品及時裝店，就啱哂一家大細玩水上活動嘅遊客購買啦。

之後再坐全日觀光小火車，每人只需人民幣￥60元，全日任坐，整日遊一號島，由我哋住嘅歐堡酒店作為起點站，途中經過商業街站、奧特萊斯站、飲食街站、婚禮莊園燈光秀站、商業街金牛廣場站、雙子沙灘星塔站、雙子沙灘月塔站、文化娛樂城站、樂園溫泉站、童世界南天門站、觀海落日廣場站、觀海公園站、尾站又係返到歐堡酒店站。

又去昨晚食過嘅舖頭食嘢，因為真係價錢合理又好食，食店嘅老闆娘都認得我哋，都同我哋傾偈。

夜晚再睇下酒店內行下，買咗啲嘢返酒店房食，然後梳洗休息。

整日超Hea，不設購物站，慢慢暢遊1號島。感覺真係好爽，好舒服。

（12月7日）星期六

 又係差唔多8點半落去食早餐，食到差唔多10點鐘，行下酒店室外嘅時候，遇到一個住2號島嘅退休女士，又傾咗一陣，先知道原來大部份嘅旅遊團都係住係2號島，因2號島好多民宿，價格比1號島便宜好多，屬於住宅區，而1號島就屬於渡假區，所以佢經常搭車或步行過嚟1號島行下，因為佢鍾意1號島寧靜。而我哋因時間關係，無過2號及3號島睇，如果要過去，由歐堡酒店乘搭公車只需要人民幣1元，交通配套，算係十分方便。

大約11：00 拖埋行李落去 check out，行去坐12：00免費接駁巴士去高鐵白馬井站。

再買白馬井站去美蘭站嘅車票，

白馬井站13：13 - 美蘭站14：32 （車程1小時19分）

去到美蘭高鐵站，經過售票處，

再沿住指示牌，好快就行到我哋今晚要住宿嘅海口美蘭國際機場酒店。

登記後，搭電梯上到去就已經見到有位女職員企係酒店房門口後等緊我哋，並手持一袋海南特產，原來係酒店送嘅禮物包，全部都係海南特產，我哋食咗都覺得好味，決定晏啲落去商場買啲返去送俾朋友食。

未落去之前，緊係影下酒店房嘅相先啦，好新好乾淨，雖然對住機場，不過隔音玻璃做得好，完全聽唔到嘈音。

落去第一時間就係去海口航空旅遊城3樓行下，睇下有咩可以買，然後上5樓食下嘢，遇到嘅人都好客氣，仲送咗3碗涼粉俾我哋食，涼粉唔同香港食嘅味道，又軟又好味，亦唔覺得太甜，食飽後又慢慢行去機場客運大樓睇下，順便睇下附近嘅環境配套，感覺都做得唔錯，又係所遇到嘅當地人都好親切有禮。

之後就行返入商場購買手信，入店後，可以慢慢行慢慢揀，就買咗好多椰子味嘅零食及海南島嘅胡椒粉，價錢比起機場內嘅抵好多。

亦買咗啲嘢返上酒店房食，之後就執下行李及梳洗休息。

（12月8日）星期日

8；30 落去酒店餐廳，每人人民幣只需￥58元，就可以食嘅早餐自助餐，真係性價比超高，食到10點鐘。

又上房休息一陣，至落去 check out，坐酒店嘅專車去機場2號登機大樓，車程只係2分鐘，超方便又舒適。

辦理登機手續後，又係慢慢行，

安檢後，再用回鄉證離境時，職員知道我用唔到回鄉證e 通道，都有問我是否想做，我第一時間話係呀，於是佢哋就揾個女職員幫我登記及採集指紋及面相，過程只需3分鐘。

總結：今次天氣比預期中好，行程中又學識咗好多嘢，包括：

1）查唔到回鄉證資料，買唔到高鐵車票，點算？

答：原來可照上車，不過只可以企及需上車後補票，如果車上部機都係查唔到證件資料，最後可以於到達地點站補票。

2）如果唔見咗回鄉證，點算？

答：唔見咗回鄉證就真係麻煩喇，因為當地酒店唔承認香港身份證為旅遊證件，所以一定要好好保管回鄉證，建議旅行前一定要用手機影咗回鄉證嘅前及後嘅相，建議放係微信收藏功能內，以防遺失時，可作為申請提供時最有用嘅資料。仲有建議如果去到邊一個站，如果見到派出所嘅電話都係用手機影咗相先，萬一有遺失證件，都可以打電話去問下點做。

如果內地人唔見咗證件，聽聞可以自己用手機 app 補辦，至於遊客就...離開海口前我仍搵未唔到一個肯定嘅答案。

3）係海南島用咩付款？

答：微信支付（港版及內地版都可以），仲有支付寶及人民幣，如果可以嘅話帶定一張銀聯信用卡。

返到香港機場，所有人嘅步伐節奏都快咗好多，機場人流勁多，勁繁忙，見到好多遊客都係聖誕樹度影相留念，笑得好開心。

最後我亦係度祝大家聖誕快樂！