疫情後第一次唱K

今次係我2019年疫情後，第一次去唱K。而今次揀咗去一間從未去過嘅 SugarK，原因係從同事口中得知呢間 Karaoke 有一個名為「1368」嘅優惠，

即係逢星期一及三，於指定時間內可以唱足4小時，包一杯無酒精飲品，而且仲要係免加一，都係$68/位，於是我就上網 book 咗星期一朝早去唱。

位置其實就係以前銅鑼灣糖街間CEO 嘅3樓，有兩個入口上去，一個係糖街，先上扶手電梯再轉電梯3字，

另一個就係後面對住電車路，電梯直上3樓。

行到櫃枱，只需講手提電話號碼就已經有預訂資料，之後職員亦問我需唔需要咪套及消毒紙巾（要就另加$10），而我當然話要啦。

入房後，見到房間同以前 CEO 一樣，都有獨立洗手間，房內多咗部空氣淨化器，枱上已擺咗咪套及消毒紙巾。

第一時間就開始用消毒紙巾清潔兩支咪﹑及點歌機觸控屏幕。

房間內無電話，如果想問職員問題，就要按個鐘制，等職員入嚟至可以問到。

而點歌系統，顯示嘅中文字有好多係簡體字，介面都算易睇，不過操作上都要一段時間去適應。

因時間關係，我和朋友都急不及待點歌，一人一首輪住唱，每次都係趁一首歌嘅時間去點歌，發現系統內嘅歌曲真係比另外兩間Karaoke 多好多。而音響及咪都好靚聲，只係自己真係太多年無唱歌，唱得好難聽，加上有啲簡體字唔識，而唱錯字。😂

仲有間房嘅冷氣實在開得太低，只得21度，又唔可以自己調校溫度及開關，好彩我帶咗件長袖外套去，而朋友又唔怕凍，大家都唔想浪費唱歌時間，所以亦無按鐘叫職員嚟問。

另外仲可以用自已手機嘅微信點歌，都算方便易操作。

總結：如果唔諗住食嘢，純粹唱歌，真係覺得呢個1368嘅優惠，超值抵玩，下次有機會一定會再去唱。