睇無人機表演

7月20日晚收工時，突然好想去睇多拉A夢無人機表演，於是就 Whatsapp 同家人講，我會遲少少先返屋企食飯。

自己一個就搭地鐵過海，去到尖沙咀站已經7點15分，急步行到去K出口，一出去就發覺已封哂路，得返梳士巴利道一條路可以行。

 行到可以站企嘅位置，抬頭一望，原本我想去嘅位置，原來封咗嚟俾記者企。

最慘係突然間開始落雨，一手攞住雨傘，一手攞住自己嘅兩袋嘢，最主要個個都開哂雨傘，以我嘅高度想睇到都有啲難度。企咗幾分鐘，就正式開始啦，不過當開始咗，大家先知企錯位置，想轉位置，都無辦法啦，只可以向前行幾步，將視線轉向另一邊。

當多拉A夢出現嘅時候，真係要多謝天公，突然停雨，大家都隨即收遮，我亦都可以用手機影相啦。

可惜身高問題，加上有棵樹遮住，所以有啲睇唔到，不過都已經好開心，因為自己咁遲先決定去睇，又可以係無雨嘅情況下睇哂，走嘅時候又好快地行到去港鐵站，樣樣都好順利，好快又返到屋企食飯，所以已經好滿足啦。

其實我已經係第二次睇無人機表演，第一次係我和媽於6月10日端午節晚，當晚我掛住睇其他嘢，而錯過海景位置，所以影出黎嘅相，背景都係唔靚，不過都係睇得好開心！

總之就係『開心簡單』！😄